MAITALA 10 - Bibilia Kui Mdedie fo Kimochi

Taṟumbeta tsa fesa

¹ Mndumii-Ruwa kawia Mose,

² “Sungusia taṟumbeta tsiwi tsa fesa intsane, tselaha wandu na kiheri kewunduo handu hesia moo.

³ Tsose tsitsiwi tsikamekapo handu hamu, wandu wose wechikuwumbia kufui na iyo kufui na mongo fo ihema lyesanzia.

⁴ Kyaindi kokoya nyi taṟumbeta imu tupu yakapo, nyi wasongoru wa shishari sha Waisraeli tupu wechicha kufui na iyo.

⁵ Kichanokyo kekapa taṟumbeta kikameloṟo wandu wa makambi ha ora lo ngamenyi wechiwooka kyaṟo.

⁶ Kichanokyo kikakapo lya kawi, walya wa makambi ha ora lo nuka wechiwooka ikure. Kichanokyo kya tarumbeta kechiloṟo orio kiheri kewooka kyaṟo.

⁷ Kyaindi kiheri kelaha wandu wakuwumbie handu hamu, taṟumbeta tsechikapo chandu waichiwie.

⁸ Washari wa Aroni, wakohanyi, nyiwo wechikapa taṟumbetatso. Wuhendeliwu wochiwa wo kiheri kyose shisharinyi shanu shose.

⁹ “Kiheri kya shida orukenyi lonu yekapana na wakituwa waimuṟinjawia, mochiloṟa kichano kya shida mochikapa taṟumbetatsi kundu Mndumii-Ruwa, Ruwa onu namukumbuo na imwashuo na wakituwa wanu.

¹⁰ Nawudo-da kiheri kya mfiri yanu ya sia, cha mkonu mnene fo meri, na mfiri ingi ing'anyi, mochikapa taṟumbetatsi kiheri muilekia shidaso shanu shemaya modonyi, na shidaso sha mwano ya ofoṟo. Nlyondi njechimukumbuo Inyi Ruwa onu. Inyi nyio Mndumii-Ruwa, Ruwa onu.”

Waisraeli wai kyaṟonyi

¹¹ Mkonu fo makumi hawi fo meri fo kawi, maka fo kawi wokia wandu wa Waisraeli walekure kulya Misri, ipuchi liwei huye ya ihema lya mndumbuye lileirio huye,

¹² nawo Waisraeli wakaira kyaṟo kyawo kewuka nuka ya Sinai. Ipuchilyo likado huye na lyefurumia likachakaa nuka ya Parani.

¹³ Nyi kamba lya kuwoka Waisraeli waleira kyaṟo kui iwawaso lya Mndumii-Ruwa chandu Mose alewawia.

¹⁴ Walya waweisongoyo nyi bendeṟa ya chekeṟo lya kishari kya Yuda walesonguo, ichekeṟo kui ichekeṟo. Msongoru owo nyiwe Nashoni mana o Aminadabu.

¹⁵ Nethanaeli mana o Suari, nyiwe msongoru o ichekeṟo lya kishari kya Isakari.

¹⁶ Nao Eliabu mana o Heloni, nawei msongoru o ichekeṟo lya kishari kya Zebloni.

¹⁷ Nahong'u ihema likasotsio wanda, wandu wa mba ya Gershon na Merari wakalikudika, wakawoka ihenda.

¹⁸ Numa, wandu warie bendeṟa ya ichekeṟo kilesongoyo nyi kishari kya Reubeni wakaituma ichekeṟo numa ya lingi. Msongoru owo nyi Elisuri mana o Shedeuri.

¹⁹ Shelumieli mana o Suri-shadai nalesongoya kishari kya Simeoni.

²⁰ Na Eliasafu mana o Deueli, kasongoya kishari kya Gadi.

²¹ Numa wakaituma wandu wa mba ya Kohathi wakudikie shihia shiele. Wekiafukia wakakoya ihema lyamemariso ihoṟotso.

²² Numa ya iwo, wakaosha wandu wawerie bendeṟa ya ichekeṟo lilesongoyo nyi kishari kya Efraimu, ichekeṟo numa ya ichekeṟo. Msongoru owo nyiwe Elishama mana o Amihudi.

²³ Gamalieli mana o Pedasuri nalesongoya kishari kya Manase,

²⁴ Nao Abidani mana o Gideoni nalesongoya kishari kya Benyameni.

²⁵ Lyefurumia, walya wawerie bendeṟa ya ichekeṟo kilesongoyo nyi kishari kya Dani, wawei cha waringi wa machekeṟo hose, walechumia ichekeṟo numa ichekeṟo. Iwa walesongoyo nyi Ahiezeri mana o Amishadai.

²⁶ Pagieli mana o Okrani nalesongoya kishari kya Aseri.

²⁷ Nao Ahira mana o Enani, kasongoya kishari kya Naftali.

²⁸ Iwu nyiwo wuhendeli Waisraeli walewuosha chandu machekeṟo hawo hai, orio kiheri wameatuo handu hesia moo na iwokase kyaṟo.

²⁹ Mose kawia lautanyi oke Hobabu mana o Reueli Mmidiani, ndeyomka oke, “So loira kyaṟo kehenda handu Mndumii-Ruwa alehamba, ‘Njechimuinenga nyo handuha.’ Kyasia, nnde hamu naso, lochikuwutia mecha, cha kipfa Mndumii-Ruwa nalewika kiasa keinenga Waisraeli Ngano.”

³⁰ Kyaindi Hobabu kahamba, “Inyi njechihenda nanyopfo; indi njechiwuya na orukenyi loko, na ko washari wako.”

³¹ Mose kambia, “Hoi kulalude, kyamba iyo noichi handu lochiidima iwika handu hesia moo kunu nuka, na nochiidima iwa msongoru odu.

³² Kingise koduana naso ikyo kyose kicha Mndumii-Ruwa echiluwutia, nakyo ochewutio iyo daa.”

Kyaṟo kyawoka

³³ Kyasia, wandu wakakure wokia Sinai fumvuhu lya Mndumii-Ruwa, mchumie fo mkonu iṟaṟu. Isanduku lya Mndumii-Ruwa lya mkundana likawasongoya handu ha mfiri iṟaṟu iwashihia handu hewika handu hesia moo.

³⁴ Orio mandi wamechumia kuwuka handu hesia moo tane lyingi ipuchi lya Mndumii-Ruwa liwei huyawo mfiri.

³⁵ Orio kiheri isanduku lyamewasongoya, Mose nawekehamba, “Eewo Mndumii-Ruwa, kekure, nopaṟatsane wakituwa wapfo, na iwo wakusuo nowakangaṟitse wadiche oshangunyi lopfo.”

³⁶ Na orio mandi lyamehoṟoka, Mose nawekehamba, “Hoi Mndumii-Ruwa, kewuuya shiku na shikushi sha Waisraeli.”