MAITALA 1 - Bibilia Kui Mdedie fo Kimochi

Itala lya kuwoka lya Waisraeli

¹ Mkonu fo kuwoka fo meri fo kawi, maka fo kawi fo wana wa Waisraeli wamewuka kulya Misri, Mndumii-Ruwa nalededa na Mose kiidi kya ihema lyesanzia kulya nuka ya msanga ya Sinai kambia adi,

² “Iyo na Aroni italenyi mamwingi fose fo Waisraeli, mba imu imu chandu shishari shawo shii; na itala lya marina hawo orio mndu-msoṟo umu umu;

³ iwo wose kiidi kya Israeli sa weidima ihenda shidenyi; wawode maka wokia maka makumi hawi na ngoseṟa; mochiwaachikia kui shidembo shidembo.

⁴ Kingise mndu-msoṟo umu o orio kishari nechikaa hamu nanyo, orio umu ai msongoru ipfo mmbenyi ya kishari kyake.”

⁵ Iha nyiho marina ha wandu wechikutarama: Kishari kya Rubeni: Elisuri mana o Shedeuri;

⁶ Kishari kya Simeoni: Shelumieli mana o Surishadai;

⁷ Kishari kya Yuda: Nashoni mana o Aminadabu;

⁸ Kishari kya Isakari: Nathanael mana o Suari;

⁹ Kishari kya Zebloni: Eliabu mana o Heloni;

¹⁰ Kishari kya Efraimu: Elishama mana o Amihudi; Kishari kya Manase: Gamalieli mana o Pedasuri;

¹¹ Kishari kya Benyamenyi: Abidan mana o Gidioni;

¹² Kishari kya Dani: Ahiezeri mana o Amishadai;

¹³ Kishari kya Aseri: Pagieli mana o Okrani;

¹⁴ Kishari kya Gadi: Eliasafu mana o Deueli;

¹⁵ Kishari kya Naftali: Ahira mana o Enani.

¹⁶ Iwa nyiwo wasongoru walesambuṟo kiidi, kya mamwingi fose fo Waisraeli, cha wasongoru wanene wa shisharinyi shawo.

¹⁷ Kyasia Mose na Aroni wakaduo wanduwo walesendo,

¹⁸ na mkonu fo kuwoka fo meri fo kawi, wakasanza mamwingi fose fo wandu wawei waitale orio umu na wa kanyi koke na kishari kyake. Umu umu kui chandu marina ha wandu wawewode maka makumi hawi na ngoseṟa;

¹⁹ Chandu Mndumii-Ruwa alewawasia Mose. Mose kaitala wanduwa kulya nuka ya msanga ya Sinai.

²⁰ Wandu walewuka kisharinyi kya Rubeni, ai mana mmbe o Israeli, kui iosha ufee wowo, kihiani na mba tsawo na mbaṟi yawo, kui iitala lya marina hawo umu umu, orio mndu msoṟo awewode maka makumi hawi na ngoseṟa, aleidima ihenda shidenyi,

²¹ wawei wandu shiku makumi hana na shiṟandaṟu na mahana hatanu (46,500).

²² Kuwuka kisharinyi kya Simeoni kui iosha ufee wowo kihianyi mba tsawo na mbaṟi yawo, kui iitala lya marina hawo umu umu, wawode maka wokia makumi hawi na ngoseṟa, sa waleidima ihenda shidenyi,

²³ wawei wandu shiku makumi hatanu na kenda na mahana haṟaṟu (59,300).

²⁴ Kuwuka kisharinyi kya Gadi kui iosha ufee wowo kihianyi na mba tsawo na mbaṟi yawo, kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi,

²⁵ wawei wandu shiku makumi haana na shitanu mahana haṟandaṟu na makumi hatanu (45,650).

²⁶ Kuwuka kisharinyi kya Yuda kui ufee wowo kihianyi na mba tsawo, na mbaṟi tsawo, kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi,

²⁷ wawei wandu shiku makumi mfungade na shiina na mahana haṟandaṟu (74,600).

²⁸ Kuwuka kisharinyi kya Isakari kui iosha ufee wowo kihianyi na mba tsawo na mbaṟi tsawo na kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi,

²⁹ wawei wandu shiku makumi hatanu na shiina na mahana haana (54,400).

³⁰ Kuwuka kisharinyi kya Zeblon kui iosha ufee wowo kihianyi na mba tsawo na mbaṟi tsawo kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi,

³¹ wawei wandu shiku makumi hatanu na mfungade na mahana haana (57,400).

³² Kuwuka kisharinyi kya Efraimu, mana o Yosefu, kui iosha ufee wowo kihianyi na mba tsawo na mbaṟi yawo kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi

³³ wawei wandu shiku makumi haana na mahana hatanu (40,500).

³⁴ Kuwuka kisharinyi kya Manase, mana o Yosefu kui ufee wowo kihianyi na mba tsawo na mbaṟi tsawo kui iitala lya marina hawo umu umu, sa wawode maka makumi hawi a ngoseṟa, sa waleidima ihenda shidenyi,

³⁵ wawei wandu shiku makumi haṟaṟu a shiwi na mahana hawi (32,200).

³⁶ Kuwuka kisharinyi kya Benyameni, kui iosha ufee wowo kihianyi na mba tsawo na mbaṟi tsawo kui iitala lya marina hawo umu umu, wawode maka makumi hawi na ngoseṟa, sa waleidima ihenda shidenyi,

³⁷ wawei wandu shiku makumi haṟaṟu na shitanu na mahana haana (35,400).

³⁸ Kuwuka kisharinyi kya Dani kui iosha ufee wowo kihianyi na mba tsawo na mbaṟi tsawo kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi,

³⁹ wawei shiku makumi haṟandaṟu na shiwi na mahana mfungade (62,700).

⁴⁰ Kuwuka kisharinyi kya Aseri, kui iosha ufee wowo kihianyi na mba tsawo na mbaṟi tsawo, kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi,

⁴¹ wawei wandu shiku makumi haana na kimu na mahana hatanu (41,500).

⁴² Kuwuka kisharinyi kya Naftali, kui iosha ufee wowo kihianyi na mba tsawo na mbaṟi tsawo; kui iitala lya marina hawo umu umu, sa wawode maka makumi hawi na ngoseṟa, sa waleidima ihenda shidenyi,

⁴³ wawei wandu shiku makumi hatanu na shiṟaṟu na mahana haana (53,400).

⁴⁴ Iwa nyiwo wandu wawei waitale sa Mose na Aroni walewaitala wechitaramo nyi wasongoru walya ikumi na wawi wa Waisraeli, orio msongoru kaende kishari kyake.

⁴⁵ Ko ikyo iitala lya wasoṟo wa Waisraeli wawewode maka makumi hawi na ngoseṟa waleidima ihenda shidenyi orukenyi lo Waisraeli.

⁴⁶ Wawei wandu shiku mahana haṟandaṟu na shiṟaṟu mahana hatanu na makumi hatanu (603,550).

⁴⁷ Kyaindi Walewi waleitalo handu hamu na shishari shilya shingipfo,

⁴⁸ cha kipfa Mndumii-Ruwa nalewia Mose,

⁴⁹ “Kulaitale kishari kya Lewi manya kulawawikie kiṟehionyi kiidi kya wandu wa Waisraeli;

⁵⁰ indi nochiwasahuo wawe weambuya ihema lya lyekoyanyia, shihia shalyo shose na orio kindo kiipfo kyose; wechiwamolikudika handu hamu na shihia shalyo shose. Wechiṟundia ipfo mba nawo wawike mahema hawo walitengetie.

⁵¹ Na kingise kiheri kekuṟuo ihema Walewi nyiwo wechilikuṟuo na kiheri keilika ihema na Walewi nyiwo wechilihoṟotsa.

⁵² Waisraeli wengi wose wechiwika mahema hawo kui matorito, orio mndu kiidi kya itorito lyake na bendeṟa yake.

⁵³ Kyaindi Walewi wechiwika makambi hawo itengetia ihema lya mdumbuye, wechiliringa kundu mndu oose nalache na afui ilisembelia natewe nyashi yako iakie mamwingifu fo Waisraeli; kyasiang'u Walewi wechiringa ihema lya mdumbuye.”

⁵⁴ Ko ikyo Waisraeli wakatana chandu Mndumii-Ruwa alewawasia Mose.