LUKA 8 - Bibilia Kui Mdedie fo Kimochi

¹ Kukashika ili numa-numa, nao kawa motengeta mamṟinyi na shimṟinyi sha wandu kechilosha na yonguo mbonyi tsiwode sia tsa wumangi wo Ruwa arianyi na walya ikumi na wawi.

² Na waka wengi sa walekiṟo mṟufu mbicho na ndaaṟe nyi wawerianyi nao; nyi Maria, amlahe Magidala, nyio ulya alechiṟo mṟufu mbicho mfungade.

³ Na Yohane, mka o Kusa, nyi awei msoṟo mokalia shindo sha Herode, na Susana, na wengi-se wafoi wawekemtarama na shindo shawo sha nga.

Mfanano fo mkumbi o mbeu

⁴ Lilyandi wandu wafoi walekumbuhanana wawuka mṟinyi yawo, kadeda nawo kui mfanano.

⁵ “Mkumbi mokumba mbeu alehenda ikumba mbeu tsake, na lilyandi awekeri ikumba, maata tsikaoloka mbai ya njia tsikachumo-chumo, na shilehe shikacha itsitola shikamaa-ho.

⁶ Tsingi tsikaoloka ihohu lya iṟaṟa, tsamedo tsikawuya yuma, kifa kulawei-ho mchoweṟa.

⁷ Tsingi tsikaoloka mshenyi, msha iya ikadosana natso ikatsichoronguo.

⁸ Na tsingi tsikaoloka terinyi njicha tsikado tsikang'ana, makumbienyi hatso, imu ikakumbia ihana.” Kekiidima ihamba ado kadeda na ṟu ling'anyi kahamba “Ichu ai na madu heicho naicho!”

Kitewe kyelosha kui mfanano

⁹ Kyasia walya wa kiloshionyi kyake wakacha imbesa mbonyi tsa ifanano lilya nyiiwe tsa iki.

¹⁰ Nao kahamba “Sa wai wainenge imanya mbonyi tsa kiṟika tsa wumangi wo Ruwa nyinyo; indi iwawengi nyi kui mafanano, kundu ma ili wewona walawone, na ili wechiicho walamanye.”

Yesu atambahaluo mfanano fo mkumbi o mbeu

¹¹ “Na ifanano lilya nyi ili; mbeu tsilya nyi idedo lya Ruwa.

¹² Na tsilya tsa mbai ya njia nyiwo iwo weadanyia; numa Satana kacha iwuta kidedo kilya ipfo ngoonyi tsawo, kundu walawone wechiidikia wakiṟo.

¹³ Na tsilya tsa ihohu nyi iwo wekeicho idedo lilya wakaliwada na sia, indi kindo walawode nyi mri, nyi wandu wekeidikia oweṟe kitutu, na kiheri kya mahesho wakakuletsana-ho.

¹⁴ Na tsilya tsiolokie mshenyi nyi iwo wekeadanyia idedo, wakahenda ishingio nyi makusaṟo ha wukiwa na masaa na malango ha moo-fu, walakikumbie ndunda.

¹⁵ Indi tsilya tsa terinyi njicha, nyi iwo wekeicho idedo lilya, wakaliwada na ngoo njilalutsu wakakumbia ndunda na itirisia.”

Taa injiwike shiya kisoṟo

¹⁶ “Ma kuipfo mndu echiatsa taa naipfinyikie nungunyi ang'u naiwike shi ya kitaṟapfo; indi nyi echiiwika kidi-hu kyemasa taa, kundu orio wandu waida napfo wawone sayo.

¹⁷ Kipfa kuipfo kindo kii kipfinyike keeda kilapfunuka numapfo, ma kindo kii kiṟike keeda kilamanyika na iwoneka na patapfo.

¹⁸ Kyasia ambuyenyi mnu chando mokeicho; kipfa ichu awode nyi echinengo, na ichu alawode, ma isho ekekusaṟa nyi shake necheshisoko.”

Mae na wana wa mae wa Yesu

¹⁹ Alyando awei kukawecha naho mae na wana wa mae, indi walaidime ishika afui nao, nyi kipfa waleshingio nyi mamwingi fo wandu.

²⁰ Kawio ke mayo na wana wa mayo nyi wahoṟoki oo njia, nyi wakundi ikuwona.

²¹ Nao kahaluo kawawia “Wama oko na wana wa wama nyi iwo wekeadanyia idedo lya Ruwa wakawewa moliwuta.”

Yesu awawasa masinanu hatsie

²² Kyasia naalyo mfiri fumu kadooya ngalawenyi arianyi na walya wa kiloshionyi kyake; kawawia “Ndenyi luambadie kulya kya ora lungi lo nduwa.” Wakahenda.

²³ Wechihenda wado na ngalawa iya, nao kalaa mado. Naalyo kukacha otanu sa lwafinya kulya ipalyipalyi-hu, wakawona ngalawa iya iichuo mringa, wakawado nyi fowa.

²⁴ Wakahenda imwamtsa wakahamba “Mndumii Mwaaria, Mndumii Mwaria, nyi ideka-ng'u lui!” Nao kakure madonyi kadedia otanu lulya na masinanu halya ha mṟinga; nasho shikatsia sau-sau, kukahutsa olele.

²⁵ Nao kawawia “A iidikia lyanu nyiiku li?” Wakaowuo, wakaṟihio, wakawiana wo wenyi na wenyi “A ulalu nyiu-wo ichu, ili awawasa otanu na mṟinga nasho shikawemwicho?”

Yesu achiṟa mndu awodo nyii mṟufu mbicho

²⁶ Wakaambadya, wakashika ohambehu lo oruka lo Wageraseno, nalo nyi mambatsana na Galilaya.

²⁷ Kawuka ngalawenyi kadooya kulya orukenyi, kakumbuhana mndu o kulya mṟinyi ai mosose nyi mṟufu mbicho, alawekeṟa-se ma nguwo handu ha mfiri ifoi ma ikaa kundu ko mba, shile na shifunyi tupu.

²⁸ Kekiafuṟa Yesu kafihiṟa kamwolokia kadeda na ṟu ling'anyi “Nyikiki njiwode na iyo Yesu Mana o Ruwa ichu ai huye ya shose? Ngakuterewa ma ulantuure.”

²⁹ Kipfa nyi awemewawasa mṟufu ulya mbicho nalekane na mndu ulya; cha kipfa nyiawemwosose, kakuruo-kuruo shiheri sa shifoi kawa moringo ampfunge na mshe na matima, nao nyiawekedumbuo-dumbuo shilya shiwempfungie, kawa motengesho-tengesho nyi mṟufu ulya kundu ko nuka kulaai wandu.

³⁰ Yesu kambesa “Rina lyapfo nyiu?” Nao kahamba, “Nyi Legionyi (isiṟi).” Kyamba awemwosose nyi waṟufu wawicho wafoi.

³¹ Wakamterewa nalawawawasie wasoke ngolokionyi.

³² Napfo nyi kuwekeri-pfo poo lya nguwe tsifoi tsiweiliso alya fumvunyi; wakamterewa nawainenge momu wahende itsiososa-tso.

³³ Kawainenga momu. Naalyo mṟufu iya ikawuka mndu ulya ikahenda yosoosa nguwe tsilya. Poo lilya likapiṟimika kulya msaṟi-hu, likaoloka kulya nduwenyi, likapfumbo nyi mṟinga.

³⁴ Walisi walya wawona wado, wakadicha, wakashitsa mbonyii-tso kulya mṟinyii na ko wademi.

³⁵ Wandu wakakure wahende yambuya kilya kyawutika, wakashika alyando Yesu ai, wakakooyaho mndu ulya alewuto waṟufu walya wawicho adamie; aṟee nguwo, apfudie, ai alya madendenyi ha Yesu; wakaowuo.

³⁶ Na walya wawewonyii wakawaongoya chando ulya awewodo nyi waṟufu wawicho achiṟo.

³⁷ Na wandu walya wose walee mṟasenyi ya Wageraseno wakamterewa nawuke kulya kowo, kipfa lyandi walehoyo nyi wuowu wung'anyi; nao kadoya ngalawenyi, kawuya.

³⁸ Msoṟo ulya alewuto waṟufu walya wawicho kamterewa ke nakukaye nao. Nao kamsama kambia.

³⁹ “Kuwuuye na kanyi; nohende yonguo shindo-shi shing'anyi shidi Ruwa akuwutia.” Nao kakuhendia; kawa moonguo kulya mṟinyi kose shilya Yesu alembutia.

Mana o waka o Yairo na mndu mka umu wachiṟo

⁴⁰ Lilyandi Yesu alewuya, mamwingi fulya fo wandu fukamwambia, kipfa nyi fuwei imbedia fose.

⁴¹ Adi a ulya mndu, rina lyake nyi Yairo; kacha naho, nao nyi awei mwitoṟi o mba yeterewia. Kakuhutsa oo madendenyi ha Yesu, kamterewa nahende kulya kanyi koke.

⁴² Kipfa nyi awewode mana kimumu o waka aweshitsie maka ikumi na iwi, nao nyi aweshikie hafui na inenuka. Nao kechihenda mamwingi fulya fuka-peṟehetsana nao.

⁴³ Na mka umu aweluo ndaare ya samu handu ha maka ikumi na iwi, awemarisie shindo shake piu ko wahanga nalaidimike ichiṟo nyi mndu.

⁴⁴ Kacha kya ipfo numa, kapaaya mambo tsa nguwo tsake, naalyo lienyi ndaaṟe iya ya samu ikamsia piu.

⁴⁵ Yesu kahamba “Njiu anyipaaya lanye?” Wechikana-kana wose Petro na wodoe wakahamba “Mwaaria, nyi mamwingi-fu fuipeṟe-hetsana na iyo na ikutsindika.”

⁴⁶ Yesu kahamba “Kuwode mndu amenjipaaya, kindo ngamanya nyi pfinya yanjiwuka.”

⁴⁷ Mka ulya awona kechiidima imwowyapfo, kacha naho kechidedema, kamwolokia ndenyi, kamwongoya alya kiidi kya wandu wose kimarete kampaaya, na chando awechia oweṟe lulya.

⁴⁸ Nao kambia “Wuyo nyi moo manoko, kiidikio kyapfo kyamekukiṟa; kuhendie kipuo.”

⁴⁹ Alamhutsia ado, adi a ulya sa awuka kulya ko mwitoṟi ulya o mba yeterewia kawia Yairo, Mana ulya opfo amenenuka, ma kulawinyishe-se mlosha.

⁵⁰ Yesu aicho ado kamhaluo “Ma ulaowuo, idikia tupu, na echichia-se.”

⁵¹ Kekishika kulya kanyi nalalekie mndu echiida nao kulya mba, shile nyi Petro na Yohane na Yakobo, na ndee o mana na mae.

⁵² Nawo nyi wawekeri ifihiṟa wechimkapya shilio wose. Nao kahamba “Mulafihiṟe, kipfa amepfapfo, nyi alee mado!”

⁵³ Nawo wakamseka mnu, kipfa nyi waweichi nyi apfiie.

⁵⁴ Nao kambada owoko, kamlaha kahamba, “Iyo mana, kure!”

⁵⁵ Mumuyo foke fukambuya, kakure. Kawawasa nainengo shelya.

⁵⁶ Wafee wake wakaṟihio. Nao katutuma walawie mndu ikyo kyawutika.