LUKA 6 - Bibilia Kui Mdedie fo Kimochi

¹ Kyasia ili limu kui mkonu fo Sabato kaida mademenyi ha ngano, na walya wa kiloshyonyi kyake wakatufwo-ho mahaa wakahasisa na mawoko wakalya.

² Kyaindi Wafarisayo waweiho wakahamba, “Nyiki ili muiwuta kindo kilasumuhanyi kiwuto ili lya Sabato?”

³ Yesu kahaluo kawawia, “A mlemsome kilya Dawidi alewuta lya mandi wawado nyi njaa na walya werianyi nao.

⁴ Chando aleida na kulya mba ya Ruwa kaira-ho mkate iya iweembike mesehu ya Ruwa, ilamteṟie ilio nyi wandu shile nyi wakohanyi wawenyi?”

⁵ Kawuya iwawia, “Mana o Mndu nyi akeri mnene na o Sabato.”

Mndu awei mhulyi owoko

⁶ Kukacha-se mkonu fungi fo Sabato, nao kakuidia na singogenyi kalosha-pfo. Napfo nyi kuwei-pfo mndu owoko loke luwekachukie.

⁷ Walaanyi walya wa shitapu na Wafarisayo wakambikia meso waambuye kokooya nyi aikiṟa ili lya Sabato, kundu wawone kemkumba.

⁸ Nao kamanya mahio halya hawo; kawia mndu ulya owoko lukachukie, “Kekure uhoṟoke oo mtengele.” Nao kakure kahoṟoka.

⁹ Kyasia Yesu kawawia, “Nyi njiimbesa-wo ke, na kisumhanyi iwuta shicha ang'u shiwicho ili lya Sabato? Ikiṟa moo ang'u ifudetsa ngesa?”

¹⁰ Kekiwaṟengutsia meso wose, naalyo kambia, “Hoṟuo owoko-lo lopfo.” Nao kawika ado owoko loke lukawuya ichia.

¹¹ Nawo wakawado nyi oṟuuṟe, wakadeda kyaama wo wenyi na wenyi chando wechitana Yesu.

Yesu asanga wakiloshyonyi ikumi na wawi

¹² Mandi halya kawuka-pfo kakuhendia kundu ko mafumvunyi naterewe Ruwa. Kalaa dembo tambaṟu kechiterewa Ruwa.

¹³ Koikikya kalaha walya wa kiloshionyi kyake kasambuṟa-ho wasoṟo ikumi na wawi kawalaha nyi wasu,

¹⁴ nyi Simon, kamlaha-se rina nyi Petro, na Andrea manomae, na Yakobo na Yohane, na Filipo na Bartolomayo.

¹⁵ Na Matayo na Toma, na Yakobo o Alifayo, na Simon elaho Selote.

¹⁶ Na Yuda o Yakobo na Yuda Iskariote ulya alewa mṟiingi.

Yesu ailosha na ichiṟa wandu

¹⁷ Kasoka nawo kahoṟoka handu ha rendewele arianyi na mamwingi fufoi fo walya wa kiloshionyi kyake, na tendemra ya wandu ifoi, wawewukie Yudaya na Yerusalemu, na Tiro na Simon kulya kundu kukinganyi na ipalyipalyi, walecha imwadanyia na ichiṟo ndaaṟe tsawo.

¹⁸ Na walya wawei waosose nyi mumuyo ya ngafu wakawechiṟo.

¹⁹ Tendemra iya ya wandu yose nyi iwekundi impaaya, kipfa ipfo koke nyi kuwewuka-pfo pfinya ikakiṟa wose.

Nanga na Ochia

²⁰ Naalyo kairia meso kaambuya walya wa kiloshionyi kyake kahamba, “Wungusu nyo mui wakiwa, cha kipfa wumangi wo Ruwa nyi wui wonu!”

²¹ “Wungusu nyo muwodo nyi njaa wulalu, cha kipfa nyi mochikaa muihutso!”

²² “Wungusu nyio ili wandu wechimsuo na imuuma wakawemuuma na imruma-ruma na ikumba rina lyanu kuleshe cha ili liwei liwicho, nasho na kitewe kya Mana o Mndu.”

²³ Chihionyi mfiri fulya muwetoola-tola, kipfa woṟunda wonu nyi wufoi kulya ruwehu; kyamba nyi wudo wandeawo walewewutia wadedi walya wa Ruwa.

²⁴ “Kyaindi ochia lonu mui wasuṟi, cha kipfa ikyo kyechimuwihiṟia moo, nyi mulememaa ikudaaya!

²⁵ Ochia lonu nyo muihutsu wulalu, cha kipfa nyi mochikaa muwado nyi njaa! “Ochia lonu muiseka wulalu, kipha nyi mochikaa mkuinadie na ilia!

²⁶ “Ochia lonu ili wandu wose wekemudedia necha; kyamba nyi wudo wandeanu walewewutia waikimbi walya wa wongo.

²⁷ Kyaindi nyi ngamuwia nyo muiadanyia, Kundenyi wakituwa wanu, na iwo wamsuo muwewawutia mecha.

²⁸ Kundenyi iwo wekemsesa mboṟa, muweterewia iwo wekemruma.

²⁹ Ichu echikukapa nguchu-yo, mhaluye-se na iyo ingi, na ichu echikusoka ikonya lyapfo, manya ulamiime ma kanzu-yo.

³⁰ Orio akuterewa mnenge, na ichu mokusoka shindo shapfo, ma ulakishiwese-se koke.

³¹ Nanyo chando mukundi muwutio nyi wandu, nanyo kewewutenyi mudo.

³² Aka nanyo mukakunda walya wamkundi tupu, nyi wucha wuhya muwode? Kipfa ma wadeko na wakundi walya wawakundi-wo.

³³ Aka nanyo mukawutia mecha iwo wekumuwutia nyo, nyi wucha wuhya muwode? Ma wandu wadeko na wekewuta wado.

³⁴ Aka mkaakuya iwo mochihamba ke nyi wechiidima imuwihiṟia, nyi wucha wuhya muwode? Ma wandu wadeko na wekeakuya wanyamaṟi wengi iwo wechiidima iwawihiṟia wado kuhyanyi.

³⁵ Kyaindi kundenyi wakituwa wanu, muwewawutia na mecha, muakuye mulakundi iwihiṟio-se kindo; mukawuta mudo nlyodo woṟunda wonu wochifo, nanyo nyi mochiwa wana wa ulya ai huye ya shose; kipfa o nyi aololye wandu wechimwana na walya wawicho.

³⁶ Kyasia, angenyi wesaṟia; chando na Ndeanu ai msaṟi.”

Ianduya wengi

³⁷ “Ma mlawone mochiwonyia wengi wuwicho, nanyo mochiwonyiopfo; ma mulatetekie owingo, nanyo mochitetekyopfo, leheṟenyi, nanyo kundu muleheṟo.

³⁸ Inengienyi, kundu nanyo muinengo; kihesha kicha kii kitsindie kii kisikyesikye kiitsye msanjika, nyikyo wechimbikia ipfo ndenyi tsanu. Kipfa kihesha kilya mokeheshia nakyo, nyikyo mochikaa muheshio nanyo.”

³⁹ Kawuya iwawia ifanano, “Alae mpfu meso na echiidima iduo mpfu meso, ungi na njia ngesa; aka chi wechioloka ṟungunyi wawawi?

⁴⁰ Molosho naidye momloshapfo; kyaindi orio mndu ainutsie shose nyi eching'ang'ana na mlosha oke.

⁴¹ A iyo, nyiki ili okeambuya kinana kii risonyi lya manomayo, na iyo ulawonyi mriti-fo fui ipfo risonyi lyapfo?

⁴² Aka nyi wuda ochiidima iwia manomayo, Manowama, keleka njiwute kinana-kyo kikeri ipfo risonyi lyapfo, na iyo kulawonyi mriti-fo fui ipfo risonyi lyapfo, iyo? Iyo nyi mokulembetseṟa! Kemewuta kuwoka mriti-fo fui ipfo risonyi lyapfo, numa noambuye-ng'u necha chando ochiwuta kinana kii risonyi lya manomayo.”

Ikidi lyekemanyika kui ndunda tsalyo

⁴³ “Ikidi icha lyechidima ikumbia ndunda njiporu-pfo na ikidi liporu likumbia ndunda njicha-pfo.

⁴⁴ Kyamba orio ikidi nyi lyekemanyika kui ndunda tsalyo lyilyenyi cha kipfa ipfo mshenyi wandu wechitowa-pfo mkuyupfo, ma isikinyi lya msha kochihao-pfo sabibupfo.

⁴⁵ Mndu-cho mcha nyi ekeloṟa kilya ki kicha ipfo kisenyi kya mrima foke, na mndu-cho mbicho kaweloṟa kilya kii kiwicho. Kyamba ikyo kiichuo ipfo ngoonyi, na dumbu-lyo naakyo lyechihamba.”

Mbaṟi tsiwi tsa wewika mba

⁴⁶ “Aka-nyo, nyiki ili mokenjilaha, ‘Mndumii, Mndumii,’ nanyo mlekewuta ikyo njekehamba?

⁴⁷ Orio mndu mokuchea na koko, kawa moadanyia shidedo shako na ishiwuta, mndu-cho nyi njiechimloṟa sa aṟinganyi nao,

⁴⁸ nyi aṟinganyi na mndu mowika mba, kaisumia, kaisotsia wanda, kawika itsinde lyayo iṟaṟehu lya iho. Kyasia, mfu fukacha, mṟinga fulya fukatsindika-tsindika mba iya fulaidime iihutsa; kyamba kimae kyayo kiwei kisotsie necha.

⁴⁹ Kyaindi ichu moicho madedo hako kada alahawuta, nyiaṟinganyi na mndu alewika mba yake terihu ya kimamile, nalawanze kimae kyayo, mfu fulya fukaitsindika itane yawunduka, na mbundukie foyo fukaṟihisha mnu.”