LUKA 5 - Bibilia Kui Mdedie fo Kimochi

¹ Kukashika mfiri fumu, lilya mandi wandu wechicha imlulumia, kundu wamwadanyie kidedo kya Ruwa, nao ahoṟoki alya ohambehu lo nduwa ya Genesareti.

² Kawona ngalawa tsiwi tsiwekeri alya ohambehu lo nduwa iya; na wadehi walya wawembuka-pfo; wakahenda isanjia mdeho yawo ii ya ndusu tsinjioke maṟawushi.

³ Kaida na ngalawenyi imuho, iya iwekeri ya Simon, kamterewa naiseheṟe kitutu ihende aleshe-leshe na wambaṟa ya nduwa iya; kadamia, kalosha mamwingi fulya fo wandu ai ipfo ngalawenyi.

⁴ Kekihutsia ideda kawuya iwia Simon, “Duo ngalawa ipfo makiidi hawi, ipfo oṟonyi ya nduwa, musotsye-ho mdehoyo yanu mdehe makunga.”

⁵ Simon kahaluo kahamba, “Mwaaria, nyi lulee loitambahana kio kyose kukakya lulawone ma kindo, kyaindi kui kidedo-kyo kyapfo na njechihenda sotsya-ho mdeho.”

⁶ Naalyo wekihenda kuwutia wado, wakakunguwa kilula kya makunga; mdeho iya yawo ikakiṟa itusuka-tusuka.

⁷ Wakatsinyia wodoyawo wa-wekeri ngalawenyi ingi ke wache iwaikanyia; nawo wakacha, wakaichuṟa ngalawa tsilya tsitsiwi itane tsakiṟa isoṟowia wanda.

⁸ Simon Petro awona adi kacha ikuhutsa alya shi-ya madende ha Yesu kahamba, “Kekure nombuke Mndumii, kipfa inyi njikeri mndu makideko.”

⁹ Nyi kipfa waleṟihio mnu o na walya wawekeri nao wose, kipfa kya makunga halya waleorana.

¹⁰ Nyi wudo na Yakobo na Yohane, wana wa Sebedayo walya waweei wodoe wa Simon. Yesu kawia Simon, “Ulaowuo, kimatsika wulalu nyi ochiwa mdehi modeha wandu.”

¹¹ Wameende ngalawa tsilya na wambaṟa, wakakudeya-ho shose, wakamwosha.

Yesu aheṟemtsa mndu awodo saka

¹² Kukashika lilya mandi awetsindie mṟinyi fowo fumu-ho, kuweepfo mndu awewodo nyi saka; nao awona Yesu kakuhutsa wanda na kyamu kamterewa kahamba, “Iyo Mndumii, kokukundia na ochiidima injiheṟemtsa!”

¹³ Nao kahoṟuo owoko loke kampaaya kahamba, “Ngamkunda; heṟemka!” Naalyo saka iya ikasia.

¹⁴ Kambawasa nalakiwie mndu, “Kyaindi henda kuloṟe kulya ko mkohanyi nowewika na kindo kya iheṟemka lyapfo, chando kikiteṟie nyi Mose kiwe kiṟingishio kyawo.”

¹⁵ Kyaindi sumu tsake tsikaengeṟa idung'ana, wakakuwumbia mamwingi ifoi icha imwadanyia na ichiṟo nyio ndaaṟe tsawo.

¹⁶ Nao kawa mosheṟuka, kakaa kundu kulawode wandu kechiterewa Ruwa.

Yesu achiṟa awei mhulyi

¹⁷ Kukashika ili limu kechilosha wandu, kuwedamie-pfo Wafarisayo na walosha na wuwawaso wawewukie orio mṟinyi yose ya Galilaya na Yudaya na Yerusalemu, na pfinyia ya Mndumii ikambanza, kachiṟa wandu.

¹⁸ Wadi aiwa womi warie mndu na kitaṟa, aluo lyetiliwana shiwungo, wakatambahana imwitsa napfo wahende imleṟia alya sumuhana nao.

¹⁹ Walawone mwaanya fomwitsa, kipfa kya mamwingi fulya fo wandu, wakado kulya mbehu, wakamsotsa kulya matofalinyi ha huye ario nyi kitaṟa kyake, wakamsotsia alya kiidi sumuhana na Yesu.

²⁰ Nao awona iidikia lyawo kambia, “Iyo mndu, njonyamaṟo tsapfo nyi tsinjiwute.”

²¹ Walaanyi walya wa shitapu na Wafarisayo wakawooka ihia-hia wakahamba, “A mndu chu-nyi ada, itane adeda ado shindo sheruma Ruwa? Nyiu ichu echiidima iwuta njonyamaṟo tsa wandu shile nyi Ruwa amonyi?”

²² Na Yesu kekimanya mahio hawo kahalo kawawia, “Nyiki muihiha ipfo ngoonyi tsanu?

²³ Sa ki kyangu-ho nyi kihya? Ngesa nyi ihamba, ‘Njonyamaṟo tsapfo nyi tsinjiwute,’ ang'u nyi ihamba, ‘Kure nochuimie?’

²⁴ Kyaindi muwone handu mochimanya ke Mana o Mndu nyi awode pfinya kunu orukenyi yewuta njonyamaṟo kawuya iwia ulya atiliwanyi shiwungo.” Ngakuwia, “Kekureng'u uire kitaṟa-kyo kyapfo nohende kanyi kopfo!”

²⁵ Naalyo lienyi kahoṟoka alya sumuhana nawo kakuhendia kanyikoke kechiidapfuma Ruwa.

²⁶ Na wandu wakaṟihio wose, wakahamba, “E-lae, nyi inu lowona shiṟiha!”

Lewi alaho nawe umu o wakiloshyonyi

²⁷ Shindo-sho shambutika kawuka-pfo kahenda, kawona mndu mosana okamba elaho nyi Lewi adamye alyando okamba lokesanyio, kacha imbia, “Njoo; awishana na inyi.”

²⁸ Nao kada-ho shose, kakure kahenda yawishana nao.

²⁹ Na Lewi kahenda imkoṟia mfuho kulya mba koke; kukakaa-ho mamwingi fufoi fo wasanyi wa okamba na wengi wakundanyi nawo wawedamie kilionyi hamu nawo.

³⁰ Kyasia Wafarisayo walya na walaanyi wa shitapu wakarihinyikia walya wa kiloshionyi kyake wakahamba, “A nyiki ili molya mukawenyo hamu na wesana okamba na wetehia?”

³¹ Na Yesu kahaluo kawawia, “Iwo wai na oru wasarie mhangapfo shile nyi iwo waluo tupu.

³² Chi njicheye ilaha iwo wecha wasumuhanyipfo, indi nyi iwo wanyamaṟie kundu wadumbuye.”

Mbonyi tsa ikuotoya

³³ Nawo wakambia, “Aili wa kiloshionyi kya Yohane wekekuotoya kitsitsi, na iterewa shiterewo, na walya wa Wafarisayo naawo, kyaindi iwo wa kopfo wakawa molya na ikunyooya.”

³⁴ Na Yesu kawawia, “Alae nyi mochiidima iwia wandu wa walinyi wakuotoye mandi-ho menyi wali akeri nawo?

³⁵ Kya kake na kukae kushike mafiri, ili indi menyi wali echiwuto kowo, nlyondo wechikuotoya mafiri-ho.”

³⁶ Kawawia mfanano, “Ma kuwode mndu echiwuta kirache kya nguwo njihya nakiwehie nguwo-hu njikupfo; kokooya nyi wudo echiranduo iya njihya na kirache-kyo kikiwute nguwo-hu nyihya kilaṟinganyi na nguwo iya njiku.

³⁷ Ma kuwode mndu echiwika mvinyio mhya machorenyi makupfo, kokooya nyi wudo, mvinyo-fo mhya mfochiranduo-randuo machoreho, nafo nyi fochipusukia wanda na machore hakanyamaṟika.

³⁸ Kyaindi mvinyo mhya nyi kikundi fuletsio machorenyi mahya, nasho shikakia shishiwi.

³⁹ Ma kuipfo mndu ekenyo mvinyo fukaiye kacha akundi-se mhyapfo; cha-kipfa nyiechihamba, nanga ifu fukaye kacha.”