LUKA 4 - Bibilia Kui Mdedie fo Kimochi

¹ Kyasia Yesu amwichuṟe Mumuyo Mwele, kawuya awuka kulya Yordanyi, katengesho-tengesho nyi Mumuyo kulya nuka mkonu makumi haana kechihesho nyi Satan womtewa.

² Nao mfiri iya nalelya kindopfo, yekisia, naalyo kawado nyi njaa.

³ Satan kacha imbia, “Komkoya nyi ukeri mana o Ruwa lohi, kewia iho-lyo lihaluke liwe mkate nolye.”

⁴ Yesu kamhaluo, “Nyi kikiṟehie, Kindo mndu echitawulia nakyo moo chi mkate tupupfo.”

⁵ Naalyo kamduo kamdosia handu, kamloṟa mawumangi hose ha wuyana-wu limu waṟu.

⁶ Satan kambia, “Wuitoṟi-wu nyi njechikuinenga iyo wose na kiweṟe kyawo, kipfa nyi njimdambikie inyi, na njechikuinengia msa ngakumkunda.

⁷ Kyasia iyo kopfira ndi sumuhana na inyi, konjiterewa, isho shose nyi shechikuṟwia shapfo.”

⁸ Yesu kahaluo kambia, “Nyi kii kiṟehie, nyii ochipfiria Ruwa Mndumii opfo ndi nomterewe, na imhidia nowemhidia o amonyi tupu!”

⁹ Nao kamduo kulya Yerusalemu kamhoṟotsa alya huye kitongolo kya hekalu kambia, “Komkoya na ukeri mana o Ruwa, kuolotse alya wanda.

¹⁰ Kipfa nyi kii kiṟehie ke, njechikuwawasia wamalaika wake wakuringe.

¹¹ Kye nawo nyi wechikuduo na mahi hawo, kundu ulawone koikapa mtulia ihohu.”

¹² Yesu kahaluo kambia, “Nyi kikihambe, Ma kulaheshe Ruwa Mndumii opfo.”

¹³ Satan kekimarisa orio kyemhesha namtewe, kambuka, kamda, nawede iwuya shiheri shingi.

Yesu awooka iṟunda lyake kulya Galilaya

¹⁴ Na Yesu kawuya na kulya Galilaya ai na pfinya ya Mumuyo; na kiṟumi kyake kikahenda kedung'ana shihongo shilya shikinganyi na oruka lulya shose.

¹⁵ Kawewa molosha-losha kulya masinagogenyi hawo amichimbiṟe nyi wose.

Yesu apiṟo ipfo Nasareti

¹⁶ Kacha na kulya Nasareti kundu ang'anyie, kaida na mbenyi ya sinagoge ili mfiri fo Sabato chando aweichiwie, kahoṟokaho nasome.

¹⁷ Kainengio kitapu kya mwikimbi Yesaya, kekioṟowuo kitapu-kyo kakooya-pfo handu hahaṟehiye,

¹⁸ “Mumuyo fo Mndumii nyi huyako fui; cha kipfa njimshimbuo na mafuda, njihende yongoya wakiwa mbonyi tsiwode sia. Anjidumie njihende yongoya wapfungo yashuka, na wapfu meso wechiwuya iwona. Njihende ilekia iwo wai wafaṟe wakuashukie.

¹⁹ Na yongoya maka fo Mndumii fukundikie.”

²⁰ Kaoṟowia kitapu kilya, kainengia msoṟo ulya moringa-ho kadamia, na walya wawei kulya sinagogenyi wose wakamkumba meso wechimṟisa.

²¹ Nao kawooka-ng'u ideda nawo kawawia, “Shiṟehiyo-sho nyi inu shahoya ipfo madunyi hanu.”

²² Kyasia wose wakachihiyo kyake, wakaṟihio shidedo shilya sheloda shilewuka dumbunyi lyake wakahamba, “Aka ichu chi mana o Yosefu?”

²³ Kawawia, “Kulako nyi mui injikaṟwo mhambye-fo fokehambo ke, Mhanga kekukiṟe-wo kumonyi. Ke shindo shilya shiwutikie kulya Kapernaumu lukashiicho, keweshiwutie na iya orukenyi lo kikunyi kyapfo.”

²⁴ Kahamba, “Nkya lohi ngambia, Kuwode mdedi o Ruwa ekekundika ipfo orukenyi lo kikunyi kyakepfo.

²⁵ Na lohi ngambia, Na kuweipfo waka wafoi wakusu kulya Israeli matika halya ha Elia, lilya mandi kulya ruwehu kuwei kupfunge maka iṟaṟu na meri iṟandaṟu, kuhaho njaa kulya orukenyi kose.

²⁶ Elia naladumo ma ko umu-ho, shile na kulya Sarepta, mṟi fo oruka lulya lo Simon ko mka mkusu.

²⁷ Na wandu wawodo nyi saka na wawepfo wafoi kulya Israeli mandi halya ha mdedi Elisa, kulakae-ho ma umu aleheṟemtso, shile na Naeman ulya Msiria.”

²⁸ Na walya wawei kulya sinagogenyi wakapfuluko wose waicho wado.

²⁹ Wakakure, wakamkumbalya-kumbalya na kulya kya patehu lya mṟi fulya, wakatana wamduo alya ohambehu lo ifumvu lilya liweiwike-ho mṟi fulya fowo ke wamwombotse-ho.

³⁰ Kyaindi o kaida kulya makiidi hawi hawo kakuhendia.

Mndu awodo mṟufu mbicho

³¹ Kasoka kashika kulya Kapernaumu, mṟi fo Galilaya, kakaa-pfo, kawa mowalosha ili lya Sabato.

³² Nawo wakauma mkahai kipfa kya mloshiye foke, kyamba kidedo kyake kiwewode na pfinya.

³³ Na kulya sinagogenyi kuwekeripfo mndu awewodo nyi mumumyo fo mṟufu mbicho fo ngafu, nao kafihiṟa na ṟu ling'anyi kahamba,

³⁴ “Kudee! Nyiki luwodo na iyo Yesu o Nasareti? Nyi uchee nolurumatse! Na njiichi ke nyi ui u; ke nyi ui Mwele o Ruwa.”

³⁵ Na Yesu kamtilima kahamba, “Tsia-ng'u, nombuke!” Naalyo mumuyo ulya kamhutsa wanda alya kiidi kyawo, kambuka nalambike kifaṟe.

³⁶ Naalyo wakaṟihio wose, wakawiana mndu na odoe wakahamba, “Nyi kidedo kida ikyo katana awawasa mumuyo ya ngafu kui wukari na pfinya, nayo ikawuka!”

³⁷ Iki kyake kikakapo sumu kikadung'ana handu halya hakinganyi naho kose.

Yesu achiṟa wandu wafoi

³⁸ Nao kakure kulya sinagogenyi, kaida na mba ko Simon. Na mamka o Simon nyi awewodo nyi modo, kaaka keng', wakamumterewya.

³⁹ Nao katikirya-ho kaarama ahoṟoki, kakanga modo fulya fukamda; mamka ulya o Simon oweṟe kakure kawapfuṟukanyia.

⁴⁰ Koikiila orio walya wawode wandu wawo waluo ndaaṟe-tsi na itsi, wakawaende na alya handu ai; nao kawahekia mawoko umu umu kawachiṟa.

⁴¹ Na wengi wafoi wakaweleko nyi mumuyo mbicho yechifihiṟa ikahamba, “Iyo nyi ui Mana o Ruwa!” Kawakanga, nalawalekie wahambe ke nyi wamwichi nyi ai Kristo.

Yesu aionguo mbonyi ipfo Yudaya

⁴² Koikikya nao kawuka-pfo kakuhendya kundu kulawode wandu, na mamwingi fulya fukawewa mompfula; wakacha na kulyando awei wakamwima nalalekane nawo.

⁴³ Nao kawawia, “Na mṟi ingi nyi kinjiiwaṟi njihende yongoya mbonyi tsiwode sia tsa wumangi wo Ruwa, kyamba nkyondo njiimdumie.”

⁴⁴ Kawewa moongoya mbonyi kulya masinagogenyi ha Galilaya.