LUKA 3 - Bibilia Kui Mdedie fo Kimochi

¹ Kyasia Kaisari ulya Tiberia ambada wukaisari kushikie maka fo ikumi na katanu, lilya mandi Pontio Pilato ai mchili o Yudaya, na Herode ai mangi ya Galilaya, na manomae Filipo ai mangi ya Ituraya na Oruka lo Tirakonyiti, na Lisanyia ai mangi ya Abilene.

² Mandi Ana na Kayafa wawewode wukohanyi wunene, naalyo kidedo kya Ruwa kikachea Yohane ulya mana o Sakaria kulya nuka kundu akeri.

³ Nao kacha na kulya orukenyi kukinganyi na Yordanyi kose kaonguo-pfo mbonyi ya wupatiso wo ihaluka mrimenyi wuendie iletso njonyamaṟo.

⁴ Chando kii kiṟehie ipfo kitapunyi kya mwikimbi Yesaya kehamba “Ailyo ṟu lya mndu moedia kulya nuka! Teseheṟenyi mtanu fo Mndumii, muwetembecheṟa na njia tsake.

⁵ Orio mapichi hose haweikilio, na orio mafumvu hose na shitoṟomoso shose shihende idemo; na handu ha kilemekonyi kuwehoṟo-tso kuwe njia njihoṟotsu. Na handu kui kipilipili kuweanjaṟyo kuwe njia njidamiri.

⁶ Na orio wai na mbihu, na wehiwona okiio lo Ruwa.”

⁷ Kyasia kawia mamwingi fulya fuwekemchea ke wache ikupatisio nyio. “A lanye mui malea ha njoka, aichu alemoṟa ke mochikudichia nyashi iya yekaa iche nyiu?

⁸ Kyasia loṟenyi kui mawuto hasumhanyi ke modumbuya, ma mlawone mochideda muhambe, Luwode ndeadu nyi Abrahamu; cha kipfa ngamuwia, Ma maho-ho, Ruwa nechiidima yalutsia-ho Abrahamu luwa.

⁹ Wokya wulalu soka nyi li iwike tsindenyi ya mashidi-ho; akashika ikidi lilechiwika ndunda njicha chi lyechimanyo na ikumbo modonyi?”

¹⁰ Mamwingi fulya fukambesa fukahamba, “Aka luwike luda ngesa?”

¹¹ Nao kahaluo kawawia, “Msa awode kanzi tsiwi nainenge ulya alawode, na ulya awode kando nawewika ado.”

¹² Kukawecha na wasanyi wa okamba ke wapatisio-ho wakambia, “Mlosha, a so nyi lochiwika luda?”

¹³ Nao kawawia, “Ma mlakiwese kindo kya ngoseṟa ya kilya mui wateṟie.”

¹⁴ Na sa wawekehenda shidenyii wakawembesa, “A so nyi lochiwika luda?” Nao kawawia, “Ma mlawone mochisohuo mndu ma isoka mndu kindo kya wuilo, mwefuda na wueri-wo wonu.”

¹⁵ Kyasia wandu walya wakawa mohinga-hinga, wakawehia-hia ngoonyi tsawo kya Yohane ke, kulako nyiio amonyi akeri Kristo.

¹⁶ Naalyo Yohane kahaluo kawawia, “Inyi nyi njekempatisa na mṟinga; kyaindi nyi kukeri icha msa anjieṟie, nao kinsumuhanyie ma yoṟowuo ngowa tsa shadu shakepfo, o nyio echikaa nampatise na Mumuyo Mwele na modo.

¹⁷ Nao nyiawode mpongo ipfo owokonyi loke, nyiechiseṟewenda kiwuha kyake kiile pang'a, mbeke-tso naingie kikumbinyi kyake, kyaindi muulu-fo nyiechifukoṟa na modo fulechiruma.”

¹⁸ Kyasia kawa moongoya wandu walya mbonyi tsiwode sia na iwatutuma-tutuma shindo shingi shifoi.

¹⁹ Kyaindi mangi ulya Herode kekidedio nyio kipfa kya Herodia, ulya mka o manomae, na kipfa kya mawicho halya hengi Herode awenyiamaṟie hose.

²⁰ Kaengeṟa iwichuo, itane amshingia mbenyi ya wapfungo.

Yesu akeri ipatiso

²¹ Kyasia lilyandi wandu walya waweikupatisio wose, na Yesu kekipatiso, kyechiterewa Ruwa; naalyo kulya ruwehu kukang'alawuka,

²² na Mumuyo Mwele kamsokia ai cha mbeta; na ṟu likawewuka kulya ruwehu likahamba, “Iyo nyi ui manoko mkunde unjichihiṟie.”

Oshari lo Yesu

²³ Nao Yesu amonyi lilyandi alewooka ilosha wandu nyiaweshikie kufui na mndu o maka makumi haṟaṟu, kyake nyi eeichio ke nyi ai mana o Yosefu nao ai o Eli;

²⁴ O Matati, o Lewi, o Meliki, o Yanai, o Yosefu,

²⁵ O Matatia, o Amosi, o Nahumu, o Esili, o Nagai;

²⁶ o Matatia, o Matatia, o Semei, o Yosefu, o Yuda;

²⁷ o Yoana, o Resa, o Zerubabeli, o Salatieli, o Neri;

²⁸ o Meliki, o Adi, o Kosamu, o Elimadamu, o Eri;

²⁹ o Yosua, o Elieseri, o Yorimu, o Matati, o Lewi;

³⁰ o Simeon, o Yuda, o Yosefu, o Yonamu, o Eliakimu;

³¹ Melea, o Mena, o Matata, o Natanyi, o Dawidi;

³² o Yese, o Obedi, o Boasi, o Salmone, o Naason;

³³ O Aminadabu, o Adiminyi, o Arinyi, o Hesironyi, o Faresi, o Yuda;

³⁴ o Yakobo, o Isaki, o Abrahamu, o Tera, o Nahori;

³⁵ o Seruki, o Ragau, o Pelegi, o Eberi, o Sela,

³⁶ o Kainanyi, o Arfakisadi, o Semu, o Noe, o Lameki;

³⁷ o Metusala, o Enoki, o Yeredi, o Mahalaleli, o Kainanyi;

³⁸ o Enoki, o Seti, o Adamu, o Ruwa.