LUKA 24 - Bibilia Kui Mdedie fo Kimochi

¹ Mkonu fo kuwooka fo mfungade wakacha na alya opangenyi ngamenyi otuko warie mdi iya ya opfaamo waweṟeheṟie.

² Wakakooya iho lilya liliwute-ho, likapiṟimitsio mbai.

³ Waida napfo walawone-pfo mnying'a fo Mndumii Yesu.

⁴ Wechiṟumo-ṟumo wado, wadi a iwa wasoṟo wawi wahoṟoki alya mbarinyi yawo waṟee nguwo tsikengemae.

⁵ Wawodo wado nyi wuowu, wechiinamitsia na mdo yawo wanda, nawo wakawawia, “Ichu ai na moo nyi wuda muimpfula ko wapfu?

⁶ Akeri ipfo-sepfo, indi ameṟutso. Kekumbuonyi-wo shilya alemuwia lilyandi awekeri kulya Galilaya.

⁷ Kechihamba, nkishikie Mana o mndu nadambiko mawokoonyi ha wandu wanyamaṟi nakapio msalabenyi na mfiri fo kaṟaṟu nawuye iṟuka.”

⁸ Nawo wakakumbuo madedo halya hake.

⁹ Wakawuya wawuka alya opangenyi, wakacha yongoya walya ikumi na umu shindo-shi shose, hamu na walya wengi wose.

¹⁰ Nawo nyi, Maria Magidala, na Yohane, na Maria mae o Yakobo, nawaka wodoya, nyiwo walewia wasu walya shindoshi.

¹¹ Madedo-ho hakawawiia cha kihano tupu walahaidikie.

¹² Kyaindi Petro kakure kakambia na kulya opangenyi, kaimehya-pfo, kaaambuya kawona shidami shilya sha owiṟo tupu shi-shileṟyeho; kawuya kechiṟihio mrimenyi kya shilya shawutika.

Kyaṟo kya Emao

¹³ Kyasia mfiri fulya tichi wandu wa mbari yawo wawi wakahenda kundu ko mṟinyi, napfo kowuka kulya Yerusalemu nyi kukuleshe cha mchumie fo saa tsiwi; na rina lyafo nyi Emao.

¹⁴ Nawo wakahenda wechikapa sumu tsa mbonyi tsilya tsiwutikie.

¹⁵ Wechikapiana wado sumu na iwesana, Yesu kacha kaduana nawo.

¹⁶ Kyaindi meso hawo hakawooho walammanye.

¹⁷ Nao kawawia, “A nyi mbonyi tsida mukeri ihaluyana ili mukeri ichumia lanye?” Indi wo wakahoṟokaho wakuinadie.

¹⁸ Na ulya umu owo, rina lyake nyi Kleopa, kamhaluo kambia, “Ate na iyo kumonyi ukeri kunu Yerusalemu kulaichi mbonyitsi tsiwutikie mafiri-ha?”

¹⁹ Nawo kawawia, “Antso njiki?” Wakambia, “Nyi tsa Yesu o kulya Nasareti, ulya aweei mdedi o Ruwa awode pfinya yewuta na yededa sumuhana na Ruwa na wandu wose.

²⁰ Ichu-ng'u wakohanyi wadu wang'anyi, na waitoṟi wadu, nyi alemdambika kundu nahutyso owingo lombaaha, wakambambya msalabenyi.

²¹ Natso nyi luwekusirie nao ke nyi awechikaa naletse Israeli. Kyasia-ng'u ishi shose shambutika, mfiri fo inu nyi fo kaṟaṟu.

²² Na kingi nyi waka wa kodu maata wameluwuta madima, nawonyi washika kulya opangenyi ngamenyi kilawo.

²³ Walakooye-pfo mnying'a foke. Wakacha wakahamba, nyi wawonekio nyi wamalaika, wakawawia nyi ai na moo.

²⁴ Nyi wudo na wodoyadu waangu wahenda kulya opangenyi, wakawekooya wado chando waka walya waluwia, kyaindi o walambone.”

²⁵ Nao kawawia, “Nyo mulaichi mbonyi mui mudo na ngoo njilemeri iidikia shilya waikimbi wa Ruwa wahambie.

²⁶ Alae Kristo chi kiwemsumhanyie iliso wukiwa kundu naidime ikuidia wusuṟinyi woke?”

²⁷ Nao kawoka alya ko Mose na waikimbi wose kawatambahaluya shilya shi-shidede sha mbonyi tsake kadung'atsa mṟeho yose.

²⁸ Wekisembelia hafui na mṟi fulya waweihenda, kakuhesha cha ili akundi ihenda.

²⁹ Nawo wakamlemba-lemba wakahamba, “Shika-wo kodu, kipfa nyi iila kui, na mfiri fomekelia.” Nao kaida na mba, kakaa nawo.

³⁰ Kikashika lilyandi awedamie nawo kilionyi kya shelya, kaira mkate fulya, kaidapfuma, kafupeṟenguo, kawainengia.

³¹ Nawo wakatambaruka meso hawo, wakammanya nyio. Nao kawadekia-dekia walakimbonese.

³² Wakawiana wa-wawi, “A chi luweihya shimbadu kunu ngoonyi tsadu lilyandi aweideda naso kulya njiehu kelutambahaluya mṟeho iya?”

³³ Wakakure oweṟe lulya, wakawuya na Yerusalemu; wakakooya walya ikumi na umu wakuwumbie handu hamu, na walya wodoyawo wakeri nawo.

³⁴ Wechihamba, “Mndumii na kya lohi ameṟuka opfunyi, amekuloṟa na Simon!”

³⁵ Nawo wakawaongoya mbonyi tsilya tsilewutikia kulya njiehu, na chando alemanyo nyiwo lilyandi alefunja mkate fulya.

Yesu awonekya wakiloshyonyi kyake

³⁶ Wechideda wado, o amonyi kacha kahoṟoka oo kiidi kyawo kawawia, “Ofoṟo lukae nanyo.”

³⁷ Wakawuko m'madima, wakaowuo wakahia kulako nyi kiṟishe wawona.

³⁸ Kawawia, “Nyikili moangalala mdo, nkili mahio mawicho hadi hakuwada ngoonyi tsanu?

³⁹ Njiambuyenyi mawoko hako na madende hako, mumanye nyio inyi, njiwade-wadenyi, muwone. Kipfa kiṟishe kiwode nyama na mbihu na mafuo chando muwonyi njiwode inyipfo.”

⁴⁰ Kekimaa ihamba ado, kawaloṟa mawoko na madende.

⁴¹ Nawo wakeri wado walameidikia wawodo nyi mkeu-keu fo sia na iṟihio, kawawia, “Muwode kindo kelya ma kida iya?” Nawo wakamneenga ora lo ikunga lu-ukahaṟe.

⁴² Kaluambia, kalulya wawonyi.

^43-44 Kawawia, “Iha nyiho madedo hako njilemuwia lilyandi njiwei nanyo ke, shilya shii shiṟehie nyi Mose ipfo wuwawasonyi na ipfo ko waikimbi na ipfo saburinyi na shikae shihoye shose.”

⁴⁵ Nahong'u katambaṟuo wuṟango wulya wowo wakatamuo mṟeho iya mwele.

⁴⁶ Kawawia ke, “Nyi wudo kikiṟehie ke Kristo nyi awechikaa naliso ado wukiwa, na ili lya kaṟaṟu naṟuke wapfunyi.

⁴⁷ Numa wandu wa mbaṟi tsose tsa masanga waongoyo rina lyake wadumbuye, waidime ihoorio manyamaṟo. Nasho shiwoke Yerusalemu.

⁴⁸ Nanyo nyi mochiwa waṟingishi wa mbonyitsi.

⁴⁹ Keambuyenyi, nyi njiechimdumia kyaasa kya Wande kimuwonekie, nanyo kaenyii-ng' kunu mṟinyi ifu itane mowonyio pfinya iwukie huye.”

Yesu ado Ruwehu

⁵⁰ Kahenda nawo, kawaduo kulya Betanyia, Kawaṟambatsia mawoko, kawawikia ona.

⁵¹ Kechiwawikia ona, kalekana nawo, kairio huye ruwehu.

⁵² Nawo wakampfiria ndi, wakawuya na Yerusalemu wawodo nyi msiha fung'anyi.

⁵³ Wakahenda ika kulya hekalunyi mafiri hose wechiadapfuma Ruwa.