LUKA 23 - Bibilia Kui Mdedie fo Kimochi

¹ Mamwingi fulya fukeri-ho fose fukakure fukamduo kulya ko Pontio Pilato.

² Wakawoka imkumba wakahamba, “Ichu nyi lulembona chando aihaluo-haluo wandu wa oshari lodu na iwaima ke, walataaye Kaisari okamba, kakuhamba inyi Kristo nyi mangi.”

³ Pilato kambesa, kahamba, “Iyo nyi mangi ya Wayuda?” Nao kamhaluo kahamba, “Na chando owehamba.”

⁴ Pilato kawia wakohanyi na mamwingi fulya fo wandu, “Ko mndu-chu njiwonyi-pfo kyemwanduya-nyi.”

⁵ Kyaindi wo wakaengeṟa mnu iitikya-itikya wakahamba ke nyi ekewa mopfuluo-pfuluo wandu kelosha kadung'atsa kunu Yudaya kose awookie kulya Galilaya itane ashika iya.

Yesu adao ko Herode

⁶ Pilato kekiicho ishi kawesa kokooya nyi mndu o Galilaya.

⁷ Kekimanya ke nyi asumhanyie wuchilinyi wo Herode, kamdika kulya ko Herode, kyamba na mandi halya Herode nyi kulya Yerusalemu awecheiye napfo.

⁸ Herode kekiwona Yesu, kachihio mnu; kipfa nyi awelangie imbona wokia shiheri sha haleshe, kipfa nyi awemiicho mbonyi tsake tsifoi kahamba kulako nyi echiwona kindo kiṟihishie kiwuto nyio.

⁹ Kambesa shifoi, indi nalahaluo ma idedo limu.

¹⁰ Na wakohanyi walya wang'anyi na walanyi wa shitapu wakahoṟoka-ho, wakamkumba kui wuitiki.

¹¹ Herode na wasoṟo wake wakamuisalucha na imwinyila, wakamṟika nguwo ikengemae, kambihiṟia Pilato.

¹² Mfiri fulya tichi Pilato wakawada mbuya na Herode, kipfa ili kuwooka nyi wawesuanyi.

Yesu aanduyo ipfa

¹³ Pilato kalaha wakohanyi wanene na handu hamu wameeku wa njoshari, na wandu wose.

¹⁴ Kawawia, “Nyi monjiendei mnduchu cha nyi ai mndu moweṟuo-weṟuo wandu, indi ambuyenyi, ili njilededa mondu foke muweho mkaicho, inyi njilewona owingo lo mbonyi-tso mocha imkumba natsopfo.

¹⁵ Manya Herode na wudo; kipfa ili ambihiṟa na kunu kodu. Kyasia, kuwode kisumhanyie opfu kii iwute nyiopfo.

¹⁶ Kyasia, nyi njechimkapa kya kisamo njimlekie.” [

¹⁷ Indi nyi kuwe-pfo kido kewapfunguya mpfungo umu ili mkonu mnene fo Pasaka.]

¹⁸ Wandu wose dang'a wakafahia wakahamba, “Ichu mduo, nolupfunguye Baraba.”

¹⁹ Na Baraba-chu nyi awemshingie mba ya wapfunguo kipfa kya wuṟiingi wuweamkie kulya mṟinyi na wuwaahi.

²⁰ Pilato kawuya ideda nawo wose lya kawi, kipfa nyi awekundi ipfunguo Yesu.

²¹ Nawo wakakaṟuo wakahamba, “Mbambye msalabenyi, mbambye msalabenyi!”

²² Nao Pilato kawawia lya kaṟaṟu, “A nyi kiwicho kida awutie lanye? Inyi njiwonyi kido limsumhanyie opfupfo. Kyasia, nyi njechimkapa, numa njimlekie.”

²³ Kyaindi wakamrohia mnu wakundi nawambio msalabenyi. Na kifahio kilya kyawo, sanza na kya wakohanyi kikarohia.

²⁴ Pilato kadumbuo ke kihendeke chando wakundi.

²⁵ Kawapfunguya ulya awembike kipfungonyi kipfa kya wusutsu wo wuwahi; nyio walemkunda; na Yesu kamdambika wawute nao chando wakukundia.

Yesu awambyo msalabenyi

²⁶ Kiheri wawemrie, wakakumbuhanana na mndu ewuka mdeminyi foke, ewio nyi Simon o kulya Kirene, wakamdika msalaba fulya foke nafuduo oo numa yake.

²⁷ Kyasia mamwingi fo wandu wafoi fukamiwata numa na fo waka wechifuha na imkapia shilio.

²⁸ Na Yesu kawaindukia kahamba, “Nyo waka wa kunu Yerusalemu, ma mlanjililie inyi, indi lienyi kyanu muwenyi na kya wana wanu!

²⁹ Cha kipfa ambuyenyi, nyi kochikaa kushike mafiri wahambe, nanga iwo wahumba, na wusu-wo wulalefee na mawee-ho halelemeonze!

³⁰ Nlyondo wechiwooka iwia mafumwu, keluhoyenyi, na shitoṟomoso, kelushikienyi.

³¹ Kipfa kokooya wawutia wadi ikidi iwishi, aka ili yumu nyi lyekaa liwiko lida?”

³² Kukawedao-pfo na wandu wawi wewuta mawicho, kundu wawoho wasanzo nao.

³³ Nawo wekishika handu ha-halahe nyi handu ha mbuonyi, wakambambya msalabenyi hamu na wanyamaṟi walya, umu ora lo kulyo, na ungi ora lo kumoso.

³⁴ Na Yesu kahamba, “Hoi Wande uwahooṟie, kipfa iki waiwuta wakiichipfo.” Na nguwo tsilya tsake wakatsihawa wechikapa natso kuṟu kuhya.

³⁵ Na wandu wakahoṟoka-ho wechiambuya. Na waitoṟi walya wakamtaluo wakahamba, “Chi alekiṟa wengi, nakekukiṟa-ng'u amonyi kokooya nyio Kristo amsambuṟe nyi Ruwa!”

³⁶ Na wudo na wasikari walya wakawemtaluo-taluo na imchungia-chungia na imwendie mṟinga futarang'ae.

³⁷ Wakahamba, “Kokoya iyo nyi ui mangi ya Wayuda, kekukireng'u kumonyi!”

³⁸ Na alya msalabehu huye yake nyi kuweeho mṟeho fumṟehie Kigriki na Kiroma na Kiebri, Mangi ya Wayuda nyi ichu.

³⁹ Wanyamaṟi walya wawewamase kimu nao, ulya umu-ho kawemtaluo kahamba, “Iyo chi iyo Kristo? Kukiṟeng'u kumonyi naso-wo!”

⁴⁰ Kyaindi ulya odoe kahaluo kamdedia kahamba, “A iyo okiowuo-se Ruwa ili ukeri iya owingonyi ilu?

⁴¹ So nyi lukeri-ho kya sungusihu, kipfa nyi luiambia kilya kisumhanyie mawuto hadu; kyaindi ichu awode kindo awutie kya wukika manya-lepfo.”

⁴² Kawuya kawia Yesu, “Kewekunjitamuye-wo hoi na hoi Mndumii, ili ochishika ikuidia ipfo wumanginyi wopfo!”

⁴³ Nao kambia, “Nkya lohi ngakuwia, Na inu tichi ochiwona kui na inyi kulya Paradiso.”

Yesu apfa

⁴⁴ Kyasia ili kuweshikie kufui sa ya kaṟandaṟu, kukaho meema puti kulya orukenyi kose mtano saa ya kenda.

⁴⁵ Mnengeṟi fulaloṟe ngeela yafo, isulia lilya lyeshingia hando haele ipfo hekalunyi likarandukia oo makiidi hawi likalekana.

⁴⁶ Na Yesu kalesha ṟu na pfinya kahamba, “Hoi Wande, ngadambika mumuyo foko ipfo mawokonyi hapfo.” Amaa ihamba ado kalekia moo.

⁴⁷ Kyaindi mchili ulya o wasikari kekiwona shilya shewutika, kaidapfuma Ruwa, kahamba, “Na lohi, mndu-chu na awei mcha asumuhanyi!”

⁴⁸ Na mamwingi fulya fuwekuwumbie-ho yambuya shido-sho, wekiwona shilya shilewutika, wakawuya na kanyi wechikapa-kapa shipeeta.

⁴⁹ Na wandu walya waweichianyi nao wose, na waka walya wawemitung'atye wookia Galilaya, nyi waweehoṟoki aleshe wechiamabuya shindo-shi.

Yesu aṟiko

⁵⁰ Nlyondo kulekuloṟaho mndu ang'anyi, rina lyake nyi Yosefu o mṟi fo Wayuda foilaho Arimatia, nao nyiwe mndu mcha o wusumhanyi.

⁵¹ Ichu awekuwode na chila yawo ma mawuto hawopfo; nao nyi aweiwedia wumangi wo Ruwa.

⁵² Ichu kahenda kulya ko Pilato, kamterewa mnying'a fulya fo Yesu.

⁵³ Kahenda-fusota-ho, kafuoṟowia nguwo tsa owiṟo, kafuṟika opangenyi luwei lusume kundu ko ihonyi, sa lulawemerike mndu.

⁵⁴ Nafo nyiwe-mkonu fosaya Sabato, kuile kuamkenyi Sabato.

⁵⁵ Kyaindi waka walya wawehendesanyi nao wookia Galilaya, wakaosha-osha, wakawona opanga lulya, na mbihu foke chando fuleṟiko.

⁵⁶ Wawuya-pfo, wakacha iṟeheṟa mdi ya opfamo hamu na mafuda hemshia. Mkonu fulya fo Sabato wakatsinda wakutsiiye chando kiweei kiwawase.