LUKA 22 - Bibilia Kui Mdedie fo Kimochi

¹ Kyasia, kukatikiria mkonu mnene fo mkate ilamtarang'ashe; fulya fumlahe nyi fo pasaka.

² Na wakohanyi wang'anyi na walaanyi wa shitapu wakashiha mweke fombaaha; kipfa nyi waweowoye wandu.

Yuda aidikya iṟiingia Yesu

³ Kyaindi Satana kahenda yososa Yuda ulya amlahe Iskariote, nao nyi umu o walya ikumi na wawi.

⁴ Kakure, kahenda ideda na wakohanyi wanene na wachili walya wa wasikari, kundu namdambike mawokonyi hawo.

⁵ Nawo wakachihio, wakaidikiana nao kya pesa wechimnenga.

⁶ Nao kaidikia na pata, kashiha mweke fomdambika kundu wandu walamanye.

Iṟeheṟa Pasaka

⁷ Koikishika mkonu fulya fo mkate ilamtarang'ashe, nafo nlyondo kokedaso kidahina kya Pasaka.

⁸ Kaduma Petro na Yohane, kawawia, “Hendenyi muluteseheṟie handu lochiliia kiidahina kya pasaka.”

⁹ Nawo wakambia, “Nyiku ukundi luhede isungusia, Mndumii?”

¹⁰ Nao kawawia, “Ili mochiida na kulya mṟinyi, nyi mochikumbuhanana na mndu arie nungu ya mṟinga, mwoshenyi, itane kulya mba kundu echiida napfo?

¹¹ Muwie ichu menyi mba, Mlosha nyi akuwesa, nyi'ku kui mba yekaa, kundu njiliie-ho Pasaka hamu na wa kiloshionyi kyako?

¹² Nao nyi echimloṟa kiṟiha kinene ki-kyale nguwo; nyipfo-ndo mochilusungusia.”

¹³ Nawo wakahenda, wakawewona chando alewewawia, wakawaṟeheria-pfo kidahina kya Pasaka.

Kilaayo kya Mndumii

¹⁴ Kiheri kikashika, kacha idamia shelyenyi hamu na wakiloshionyi kyake.

¹⁵ Kahamba, “Nyi mbelangie mnu ngawewado na nyi macha helya nanyo Pasaka-i ili ndameshika mawawiṟionyi hako.

¹⁶ Kipfa nyi ngamuwia; Njechilya-se ma ntapfo, na iwede ishika ipfo wumanginyi wo Ruwa.”

¹⁷ Kaira kirahu kiichuo mwinyo, kakiterewia, kakiwainengia kahamba, “Ambienyi iki, hawianenyi mu-wenyi na wenyi.

¹⁸ Kipfa nyi ngamuwia, njechikinyo-se kya ndunda tsa msabibu wumangi wo Ruwa wulachapfo.”

¹⁹ Kaweira na mkate, kafuterewia, kafufunja kafuwainengia kahamba, “Ifu nyifo mbihu foko [fuimdambiko. Wutenyi iki kiwe ngumbuo yako.”

²⁰ Na wudo kaweira na kirahu, wammaa ilya, kahamba, “Kirahu-ki nyi mkundano mhya fo ipfo samunyi yako impusuyo nyo.]

²¹ Kyaindi ambuyenyi owoko lo monjiṟiingia ailu lui kunu mesenyi hamu na inyi.

²² Mana o mndu na echihenda njia yake chando amteṟie, kyaindi ochia lo mndu ulya momṟiingia.”

²³ Naalyo wakawooka iwesana wo wenyi na wenyi, “Iya kodu-so nyiu echiwuta iki?”

Nacho ang'anyi

²⁴ Kukaweamka na marekiano ipfo kambenyi lyawo ke, nyiu o kambenyi lyadu ai mnene kaida wengi.

²⁵ Nao kawawia, “Wamangi wa mbaṟi tsa wandu nyi wekewaitoṟia, na iwo waapfinya ipfo kowo wakalaho nyi wandu wang'anyi.

²⁶ Nyo, ma mlawone mochiwa mudo. Indi ichu ang'anyi ipfo kambenyi lyanu nakutane cha mtutu, na ichu ai msongoru, nawecha mopfuṟukanyia.

²⁷ Kipfa ang'anyi nyi uhya, nyi ulya adamie ailya a nyi ulya momwendiye? Chi ichu adamie ailya? Kyaindi inyi kambenyi lyanu nji cha mopfuṟukanyia.

²⁸ Nanyo nyinyo mulewatiṟana na inyi kulya maheshionyi hako.

²⁹ Na inyi nyi ngamdambikia wumangi, chando na Wande oko anjidambikie inyi.

³⁰ Muwe welya na wenyo mesenyi yako ipfo wumanginyi woko; nanyo nyi mochikaa mudamie maloṟike-hu ha wusuṟi mochichilia njoshari-tso ikumi na tsiwi tsa Israeli.”

Yesu ahamba kisuku kya ikana lya Petro

³¹ Kyasia kahamba, “Simon, oo Simon, keambuya, Satan nyi amkundi nyo namuwiwite chando mokeela ngano.

³² Kyaindi inyi ngamekuterewia, kundu iidikia lyapfo lilamande; na iyo komewanga, wanza wanawamayo.”

³³ Nao kambia, “Mndumii, nyi hamu na iyo! Nyi njikuteseheṟie ihenda na iyo kipfungonyi ma opfunyi.”

³⁴ Nao kambia, “Nyi ngakuwia Petro, olong'onyi lochikapa inu kulamaa injikana kaṟaṟu ke, Unjiichipfo.”

Maheri ha fowa

³⁵ Kawawesa, “A mandi halya ndemduma mlarie kichoṟe ma kikuchu ma shadu, kuipfo kindo mulewuṟa ma kimu?” Wakahamba, “Ma kimu lulewuṟapfo?”

³⁶ Kawawia, “Kyaindi ulalu ichu awode kichoṟe na kikuchu, nashiduo, na ichu alawode oshu nahende ikumba ikonya lyake nahuṟe oshu.

³⁷ Cha kipfa ngamuwia, ‘Isho shi shii-ṟehie na shikaki na shikae shishike shewutikia iya koko. Nasho nyi ishi, katalio wanyamaṟinyi,’ kipfa isho shinjiwaṟi na shikae shiwutike.”

³⁸ Nawo wakambya, “Mndumii, ambuya iya nyi kwiho njoshu tsiwi.” Nao kawawia, “Kyakusiia!”

Yesu aiterewa

³⁹ Yesu kawuka-pfo kahenda kulya fumvunyi lya mashidi ha msinepfu chando aweichiwie; na wa kiloshionyi kyake wakamwosha.

⁴⁰ Ameshika handu halya kawawia, “Terewenyi, mulashike iida kiheshonyi.”

⁴¹ O kahenda kyaada, handu ha mkumbie fo songoṟo, kapfira ndi, katerewa kahamba,

⁴² “Hoi Wande, kokukundia, njiashuo kirahu-ki, kyaindi kilahendeke channdo inyi njikundi, shile chando ukundi iyo.” [

⁴³ Kacheyo nyi malaika awuka ruwehu kambanza.

⁴⁴ Nao kakaa kelimbana na opfu, indi kaengeṟa mnu iterewa; itane mbiṟuko foke fowa cha matacha ha samu hetonyiikia wanda.]

⁴⁵ Nao kakure kulya kiterewionyi kakooya walya wa kiloshionyi walee kitewe kya fowa.

⁴⁶ Kawawia, “Kimaduma nyiki mukalaa? Kurenyi muterewe, mulawone mochida kiheshionyi.”

Yesu awado

⁴⁷ Kechededa ado, alamhutsa, kukacha wandu wafoi, na umu o walya ikumi na wawi, rina lyake nyi Yuda, awasongoe, kasembelia Yesu kamkomba.

⁴⁸ Yesu kambia, “Yuda, na otana oṟingia Mana o mndu kochimkomba?”

⁴⁹ Na walya wa weei nao wamṟingichie wekiwona chando kiiwa wakahamba, “Mndumii, lukawakapa na oshu?”

⁵⁰ Odoyawo umu kamanya isinga lya mkohanyi ang'anyi, kasunukuṟa-ho kudu kulya ko kulyo.

⁵¹ Yesu kahaluo kahamba, “Tsienyi wamarise kyawo!” Kapaaya kudu kulya, kamchiṟa.

⁵² Yesu kawia walya walecha imbada; nyi wakohanyi wang'anyi, na wachili wa hekalu na wameku, “Nyi mokure na njooshu na nguwidi cha wandu wewatiṟa msoki.

⁵³ Orio mkonu nyi njiwekeri nanyo ipfo hekalunyi ma mulanjileshie mawoko; kyaindi ii nyiyo sa yanu, nyihondo meema fuwodie pfinya.”

Petro akana Yesu

⁵⁴ Wakambada, wakamduo, wakamwitsa na mba ko mkohanyi ang'anyi. Indi Petro kamiwata ai haleshe-leshe.

⁵⁵ Wakaatsa modo alya osehu lo mkohanyi ang'anyi makiidi hawi wechioda, Petro kadamia alya kiidi kyawo.

⁵⁶ Kisinga kika kekimbona, ai alya senyi ya modo, kikamtukuya, kikahamba, “Na ichu na awei nao.”

⁵⁷ Kakana kahamba, “Wai, njimanya, njimwichipfo mae!”

⁵⁸ Oweṟe ungi kambona kahamba, “Na iyo na umu-mbo owo-e?” Petro kakana kahamba, “Oṟa msumi, njimanya.”

⁵⁹ Saa imu iida-ho, ungi kawanza kahamba, “Ee lohi, na ichu nyi awei hamu nao, kipfa nyi Mgalilaya.”

⁶⁰ Kyaindi Petro kahamba, “Oṟa odoya, njiichi kindo uihamba-nyi.” Kechededa ado, olong'onyi lukatesa.

⁶¹ Mndumii kahalukia Petro, kamwambuya, Petro katamuo idedo lilya lya Mndumii embia, “Inu olong'onyi lochitesa kulamaa injikana kaṟaṟupfo.”

⁶² Kahenda kulya kya nja, kafuha kahutsa tara.

⁶³ Na wasoṟo walya wawemrie wakamtaluo na imkapa-kapa.

⁶⁴ Wakamboshia ipfo mesonyi, wakambesa-wesa, malasha, njiu akukapa?

⁶⁵ Na shitaluo shingi shifoi wakaweshihamba sanza na imruma.

⁶⁶ Koikikya kukakusanza wameeku wa njoshari na wakohanyi wanene na walanyi wa shitapu, wakamduo mengenyi yawo.

⁶⁷ Wakahamba, “Luwie, kokooya nyi iyo Kristo?” Kawawia, “Ngakaa nyechimuwinyiya, mochinjidikia manyalepfo.

⁶⁸ Manya inyi ngamuwesa kindo, mochiidima injihaluopfo.

⁶⁹ Kyaindi wookia wulalu Mana o Mndu nechikaa adamie owokonyi lo kulyo lo pfinya ya Ruwa.”

⁷⁰ Wakahamba wose, “Ate iyo nyi Mana o Ruwa?” Nao kawawia, “Nyo nyi mohamba, kipfa inyi nyo.”

⁷¹ Nawo wakahamba, “A nyikiki luita mbahanyia-se wuṟingishi, kipfa so luwenyi lomemwuicho dumbunyi lyake amonyi wushikie imbinga.”