LUKA 21 - Bibilia Kui Mdedie fo Kimochi

¹ Nao kairia meso, kawona chando wasuṟi wechiwika shindo sha nnga ipfo sandukunyi lya njodambiko.

² Kawewona na mka umu mkiwa, ai mkusu kechiwika-pfo shisenti shiwi.

³ Kahamba, “Nyi kya lohi ngambia, Mka-chu mkiwa ai mkusu, nyi awika-pfo kya ngoseṟa kota wose.

⁴ Chakipfa iwo wose nyi wawuta ipfo mfoeṟenyi fo masaa hawo, kyaindi ichu, ipfo wukiwenyi woke, nyi adambika shose ashiwode, isho shiwechimbanza moo foke.”

Yesu ahamba kya isaramaya lya Hekalu

⁵ Na wandu wengi nyi wawei ikapa sumu tsa hekalu lilya chando liweishele necha na maho mecha na mchopie ingi iwenji sanzie-pfo nao kahamba.

⁶ “Kya ishi muyambuya wulalu, nyi kochikaa kuche shiheri, kulechideo ma iho huya iho lingi lilaiwunduye wanda.”

Mawukiwa

⁷ Wakambesa wakahamba, “Mlosha, nyi indi isho shechikaa shishike; na kitaanyio kyasho nyi kiki ili shechikaa shiwe?”

⁸ Nao kahamba, “Ambuyenyi mlawone mochidetseṟo; kipfa nyi kochicha wafoi kui rina lyako wahambe nyio inyi; wawehamba, Kiheri kyamesembelya. Manya mulahende ilungana nawo!

⁹ Nanyo ili mochiicho mbonyi tsa shida na tsa shipfulu-pfulu sha wandu, ma mlawuko nyi madima. Kipfa shindo-shi na shikaki na shikae shiwooke iwutika, indi, imarisio lyechicha owinyi lidopfo.”

¹⁰ Naalyo kawawia, “Wandu wa mbaṟi imu nyi wechiapfinyiana na mbaṟi ingi, na wumangi na wumangi wungi.

¹¹ Na handu hengi na hengi nyi kochiwoneka na shidihinyisha-shi shing'anyi, na kungi na kungi njaa na ndaaṟe tseambukia, kuwewoneka na makindo hechikangaṟitsa wandu; na riho tsing'anyi tsioweshie tsiwoneke huye ruwehu.

¹² Kyaindi kuwooka, isho shose shilameshika, nyi wechimuitsa kiterengionyi wamukape na imufuna, wawemduo masinagogenyi na mengenyi, wamuhoṟotse oshangunyi lo wamangi na lo wachili waitoṟi, nakyo nyi kipfa kya rina lyako.

¹³ Ishi nyi shechimuwonekia nyo kundu muidime injiṟingishya.

¹⁴ Mukuteṟye ipfo mrimenyi konu ke mulawooke ihia kekuashuo.

¹⁵ Kipfa ipfo madumbunyi hanu nyi inyi njechimbikia-pfo madedo ha wuṟango, na iwo wemkaṟuo wose, wechidima ihakaṟuo ma ihakanapfo.

¹⁶ Nanyo nyimocheṟiingio na nyi wafee na wanawamaanu, na wodoyanu wa kishari na wakunde wanu.

¹⁷ Nanyo nyi mochisuikia wandu wose kui kipfa kya rina lyako.

¹⁸ Kyaindi ma ochui lumu lochimdekia mdonyi konupfo.

¹⁹ Damiṟenyi mrima yanu kui ikutirisya.”

Yesu ahamba kya inyamaṟo lya mṟi fo Yerusalemu

²⁰ “Kyaindi ili mochiwona mṟi fo Yerusalemu fochitengetio nyi masiṟi, wutenyi-ho imanya, kiheri kyafo kenyamaṟo kyamshika.

²¹ Kiherikyo sa wakeri kulya Yudaya, wadichie nja; na iwo wai nja, ma walawuye napfo.

²² Kipfa shiherisho, nyisho shewuwuya kisecha, kundu shilya shii shiṟehie shishike shose.

²³ Kyaindi ochia nyi lo waka walya wekooyo waai walemo na weonza mandi-ho! Kipfa iya wuyana nyi kochiwada kiwi king'anyi, ili wa oshari-lu wechiwuwuyo kui nyashi ing'anyi.

²⁴ Wengi nyi wechiwooho kui njoshu, wengi wadao wafungo njosharinyi tsose. Na Yerusalemu ideo yechichumo-chumo nyi wandu wa mbaṟi njihenu, itane shiheri sha mbaṟi-tso njihenu shainutsio.”

Icha lya mana o mndu

²⁵ “Kochiwoneka na ṟiho tsa njofano ipfo mnengeṟinyi na merinyi na nyenyerinyi, na iya wuyana wandu wa mbaṟi tsose nyi wechikapo ngoo walechimanya kimaduma, kipfa masinanu ha ipalyipalyi nyi hechiengeṟa ihaluka-haluka na idihina.

²⁶ Wandu nyi wechiuma ndadya kwi kitewe kya wuowu na iwedia shilya shechihoya wuyana; kipfa pfinya tsa ruwehu nyi tsechisingitso-singitso.

²⁷ Kiheri-kyo, nlyondo wechiwona Mana o mndu kechicha ario nyi ipuchi, awode pfinya na kiṟumi king'anyi.

²⁸ Kyasia, ili isho shechiwooka iwa, kekuheluonyi, mbeiria mdo yanu huye, kyamba momshika hafui na iletso.”

Kuloshe kui mkuyu

²⁹ Kawawia ifanano, “Keambuyenyi mkuyu-fo, na orio mashidi hengi hose.

³⁰ Mukamewona haoṟa, nyi mokemanya mbenyi ke, kiheri kya masambuyonyii kyameshika hafui.

³¹ Nyi wudo nanyo, mkamewona shindo-sho shamewooka iwa, manyenyi ke, wumangi wo Ruwa womshika afui.

³² Nyi lohi ngambia; Oshari-lu lochiarisika manya-lepfo, na kutane ishi shawutika.

³³ Ruwehu na oruka nyi shechikaa shimande, kyaindi madedo hako hechimandapfo.”

Kiwaṟi ilaa dembo

³⁴ “Kyasia, kuṟisenyi, mulawone ngoo tsanu tsechilemeṟo nyi itandaluo ndeu na wunanzi na mawinyisha ha wanda-i, mfiri fulya fuwone fochimutowokia mulakusirie.

³⁵ Kipfa chando mdeho fokerakuo, nyi kechichea wose handu hose wai kunu wuyana.

³⁶ Nanyo, laenyi dembo mfiri yose mochiterewa, kundu muidime ikuashuo isho shose shikundi iwa, na ihoṟoka alya sumuhana na Mana o mndu.”

³⁷ Kyasia, nao orio mkonu, ili mfiri, nyi awekewa molosha kulya hekalunyi, kukameila kakure-pfo kahenda ilaa kulya fumvunyi lya mashidi ha msinepfu.

³⁸ Wandu wose wakawemchea ngamenyi kilawo kundu wamwadanyie.