LUKA 20 - Bibilia Kui Mdedie fo Kimochi

¹ Kukashika, ili mkonu fumu kechilosha wandu kulya hekalunyi, na yonguo mbonyi tsa sia, kukacha wakohanyi, na walaanyi wa shitapu warianyi na wameeku.

² Wakadeda nao, wakambia “Keluwie, Ishi nyi uiwuta kui pfinya ida? A kingise, nyiu akuinengie pfinya-i?”

³ Kahaluo kawawia “Na inyi na njimuwesa kidedo kimu, munjihaluo,

⁴ wupatiso wo Yohane nyi ruwehu wuwukie ang'u nyi ko wandu?”

⁵ Wakakusaṟa-saṟa wo wenyi na wenyi ke, lukahamba nyi ruwehu wuwukie, nao nyiechihamba, a nyiki ili mlalemwidikia?

⁶ Na lukahamba, ko wandu, wandu wose nyi wechilukumbia maho, kipfa wakusirie ke Yohane nyi mwikimbi o Ruwa.

⁷ Wakahaluo, “Luichi kundu wuwukiepfo.”

⁸ Na Yesu kawawia, “Ma inyi nechimuwia pfinya-i njeketana nayo ishipfo.”

Mfanano fo dema lya msabibu na waṟundi

⁹ Kyasia kawooka iwia wandu ifano-li, “Mndu awedemie mdemi fo msabibu; kafudambikia wefulimia, kahenda orukenyi lungi ikaa-pfo mfiri ifoi.

¹⁰ Kiheri kya ndunda tsambiṟa, kaduma msoṟo oke nahende ko walya welimia, kundu wamnengie ndunda tsintowe kulya msabibunyi; na walya welimya wakamkapa, wakamwinutsa wulya.

¹¹ Kawuya iduma msoṟo ungi; wakawemkapa-se na imwinyala, wakamfuna alarie kindo.

¹² Kaengeṟa iduma, kaduma-se o kaṟaṟu; nawo wakambika shifaṟe wakamfunyia nja.

¹³ Menyi dema lya msabibu kahamba, ‘Ngawika njida? Nyi njechiduma mana-chu oko mkunde; kofia ichu nyi wechimwowuo!’

¹⁴ Walya welimia wambona, wakakusaṟa na ideda kyama wo wen na wenyi wakahamba, ‘Hoona ichu nyio mokyoṟa, nndenyi lumbahe-ng'u, kundu na kyora-kyo kechiwa kyadu!’

¹⁵ Wakamkumbalya nja ya mdemi fulya fo sabibu, wakambaaha, ‘Kyasia, menyi dema lilya lya msabibu nyi echiwawutia ada ngesa?’”

¹⁶ “Nyi echicha nawarumatse, na msabibu iya nadambikie wengi.” Na walya waleicho wakahamba, “Kilahendeke kido!”

¹⁷ Nao kawaambuya wowatuma kahamba, “A idedo-lyo li iṟehie lyehamba, Iho lilya wandu wewika mba walelisuo, nyilyong'u lilewa iho ling'anyi lya ndumbenyi; kimaduma kya idedo-lyo nkiki?”

¹⁸ “Orio moho huye ya iho-lyo nyiechifunjika-funjika; na ichu mohoyo nyi iho-lyo, nyi lyechimsonohotsa.”

Itaa okamba lo Kaisari

¹⁹ Walaanyi wa shitapu na wakohanyi wakakunda imleshia mawoko wambade kiheri kilya kilya, indi wakaowuo wandu, kipfa nyi walemanya ke ifano lilya nyi lyahambo kipfa kyawo.

²⁰ Wakambikya ndeheka, wakamdumia wemsoṟa wokulembetseṟa ke nyi wai wecha wasumhanyi na wucha, kundu wawone mti fo madedo hake wahende imdambika wuchilinyi na pfinyenyi ya mchili mwitoṟi o oruka.

²¹ Wakambesa kindo kemsoruo, wakahamba, “Mlosha, nyi luichi nyi okededa kisumhanyi na ilosha kisumhanyi, ma ulekeambuya shamu sha wandu; na njia tsa Ruwa kolosha chando tsii lohi.

²² So na kilusumhanyie iwikia kaisari kodi ang' ote?”

²³ Nao kamanya mkoṟo yawo, kawawia,

²⁴ “Kenjiloṟenyi shilingi. Nyi iwode ofano lou na mṟeho nyi fou?” Wakahamba, “Nyi sha kaisari.”

²⁵ Nao kawawia, “Keinengyenyi kaisari ishi sha kaisari; na Ruwa mbemnenga isho shi sha Ruwa.”

²⁶ Manya walaidime imdeha na madedo hake alya oshangunyi lo wandu, wakaṟihio mhaluye foke, wakatsia.

Iṟutso lya Wapfu

²⁷ Kuwekeri-pfo na Wasadukayo wawekekaṟuo ke kuipfo iṟuka lya wapfupfo, wakacha na koke wakambesa.

²⁸ Wakahamba, “Mlosha, Mose nyi aleluṟehia ke; kokoya mndu, manomae apfa kada mka alawode mana, manomae naoṟe mkachu, kundu nawonyie manomae luwa.

²⁹ Kyasia kuweepfo wasoṟo mfungade wa mndu umu; ulya mmbee kaduo mka, kapfa kada mka ulya alawode mana.

³⁰ Mka ulya kadao nyi ulya momwituma.

³¹ Na ulya o kaṟaṟu naawo, kikahendeka kido, itane wapfa wose mfungade walade ma mana,

³² Mainukionyi na mka ulya kawepfa.

³³ Kyasia, maṟutsionyi ha wapfu, mka -chu nyi echiwa o uhya-ho? Kipfa wose mfungade nyi waweei wamii wa mkachu.”

³⁴ Yesu kawawia, “Nyi wana wa wuyana wu nyiwo sa wekealika na yaliko.

³⁵ Kyaindi walya wechinengo ishika wuyana wulya na iṟutso ko wapfu, wo wechialika ma yalikopfo.

³⁶ Kipfa ma ipfa wechikipfapfo; kipfa wo nyi wechifanana na malaika, wawewa na wana wa Ruwa, kipfa wai wa kiṟukionyi.

³⁷ Kyaindi kui kipfa kya wapfu, ke nyi wechiṟutso, ma Mose na alewelongio ipfo isikinyi kiheri Mndumii alemlaha. Kamhamba, Ruwa o Abrahamu na Ruwa o Isaki na Ruwa o Yakobo.

³⁸ Ruwa chi o mnying'apfo, indi nyi o wai na moo. Kyamba iwo wai ma moo wose nyi wai-ho kipfa kyake.”

³⁹ Wengi wa walanyi wa shitapu wakahaluo wakahamba, “Mlosha, iyo nyi odambuo necha.”

⁴⁰ Nawo walelekaria-se imbesa kindo.

Mbonyi tsa Mesia

⁴¹ Kyasia kawawia, “A nyi wuda ili wandu wekehamba ke Kristo nyi mana o Dawidi?

⁴² Nao Dawidi nyi ahambie amonyi ipfo kitapunyi kya shimbo kehamba, ‘Mndumii nyi alewia mndumii oko, Kedamia kuwokonyi koko ko kulyo.’

⁴³ ‘Njitane ngaleṟia wakituwa wapfo, wanda madendenyi hapfo.’

⁴⁴ “Alae, komkooya Dawidi nyi amlahiye nyi Mndumii, nyi wuda echiwa-se manoke?”

Yesu awawasa walosha na uwawaso

⁴⁵ Kawia walya wa kiloshionyi kyake wandu walya wawei imwadanya waichio wose.

⁴⁶ “Kuṟisenyi kya walaanyi wa shitapu, iwo wakundi ichumia waṟee nguwo tsa mkuruo tsekulembetseṟa, wokulefuo, wawekundi iṟikiṟo nyi wandu ipfo tumo; na ipfo sinagogenyi nyi wakundi-pfo shidembo sha kusonguo; na wakalaho shelyenyi wakasambuṟa alya ko wasuṟi.

⁴⁷ Nyi wekelya mba tsa waka wakusu wakatsimaa, na kwi wulembetseṟi wakakurihiria ihamba ke nyi lokemterewia. Iwo! Iwo, nyi wechikaa wawonyio owingo ngoseṟa.”