LUKA 2 - Bibilia Kui Mdedie fo Kimochi

¹ Mandi halya kukawuka iwawaso kulya ko Kaisari Augusto, ke masanga hose hahende iṟehio paruonyi kya okamba.

² Na kiṟehio-kyo nyikyo kya kuwoka, lilya mandi Kirenyio akeri mchili o kulya Siria.

³ Kyasia wandu wakahenda ṟehio wose, orio mndu na mṟinyi foke.

⁴ Na Yosefu nao kawewuka kulya Galilaya, mṟinyi fo Nasareti, kahenda ido na kulya Yudaya, mṟinyi fo Dawidi, fumlahe nyi Betlehemu, kipfa awekeri mndu o mbaṟinyiya Dawidi, mpfo kikunyi kyake.

⁵ Kundu nahende ṟehio-pfo hamu na Maria ulya awemkosie, nao nyi awei mnene.

⁶ Kyasia wakeri kundu kulya kiheri kyake kyefee kikashika.

⁷ Kafee manoke mbee o womi kamwoṟowia shidami kamlaṟa mponyi, kipfa walalewonyia handu kulya mchalonyi fo wahenu.

Walisi wainengo mbonyi nyi Malaika

⁸ Kyasia na kulya kihongonyi nyi kuwekeri-pfo walisi wai patehu wechiringa poo lyawo kui makamba kiheri kyakio.

⁹ Wadi a ulya malaika o Mndumii, kacha ihoṟoka alyando wai, na ngeela ya Ruwa ikawaṟingichya riti; nawo wakahoyo nyi wowu wung'anyi.

¹⁰ Malaika lulya kawawia, “Manya mulaowuo, ambuyenyi njiimwongoya mbonyi tsiwode sia ing'anyi, nayo nyi yekaa ishike ko wandu wose.

¹¹ Kipfa ili momefeeyo mkiṟa inu; nao nyi Kristo Mndumii kulya mṟinyi fo Dawidi.

¹² Na kitaanyio kyanu kyemumanyisha nyi iki, nyi mochiwona mkoku-cho amwoṟowie shidami amlaṟe mponyi.”

¹³ Naalyo peṟeseng'u kukocha mamwingi fo siṟi tsa ruwehu, fukasanza na malaka ulya, wakaidapfuma Ruwa wakahamba,

¹⁴ “Kiṟumi nyi kya Ruwa kulya huye, na orukenyi nyi ofoṟo, ipfo ko wandu wakundikie!”

¹⁵ Kyasia wamalaika walya wekiwuka kulya kowo wakahenda ruwehu, walisi walya wakawiana wo wenyi na wenyi wakahamba, “Kendenyi-ng'u lanye; lukehenda kulya Betlehemu, isahia kindo-kyo kyambutika; ikyo Mndumii aluongoya.”

¹⁶ Wakahenda wekambia owinyi; wakakoya-pfo Maria na Yosefu; na mkoku ulya amlaṟe alya mponyi.

¹⁷ Wameidima iwona wakahenda wechionguo mbonyi tsilya tsa kidedo kilya walewio kya kimana kilya.

¹⁸ Na walya waleicho wado wakaṟihio wose shilya waongoyo nyi walisi walya.

¹⁹ Na Maria kasuṟuma mbonyi tsilya tsose na mrima ketsihia-hia.

²⁰ Kyasia walisi walya wakawuya na kulya kowo, wakaidapfuma Ruwa na imwana kya shindo shilya waleicho shose na ishiwona chando walewewio.

Mana aninengo rina

²¹ Kyasia mkonu nyanya yameida-ho, kushike madinyionyi hake, wakamdumbuya rina lyake nyi Yesu; lilya lilehambo nyi malaika ulya lilyandi alawememoho.

Yesu adao hekalunyi

²² Kyasia wekimarisa mfiri iya yekuheṟemtsa, iya isumhanyi, chando kiwekiteṟie ipfo wuwawasonyi wo Mose, naalyo wakamduo kulya Yerusalemu wahende imloṟa Mndumii.

²³ Chando kiwei kiṟehie ipfo wuwawasonyi wo Mndumii ke, orio mana mbee o womi nyi echidambikio Mndumii nalaho nyi kyele kyake.

²⁴ Wawewika na kidaso chando kiwei kiwawase ipfo wuwawasonyi wo Mndumii; nakyo nyi kya mbeta tsa ngeṟenyi tsiwi, ang'u tsa mba tsiwi-njikoho.

²⁵ Maheri halya kuwekeri mndu kulya Yerusalemu, rina lyake nyi Simeon, na mndu-chu nyi awei mndu mcha, asumuhanyi, aweowoye mnu Ruwa, kechiwedia ulya mowihiṟa Israeli moo, na Mumuyo Mwele nyiawekeri nao.

²⁶ Nao nyiawewembikie kyaasa nyi Mumuyo Mwele ke, echipfa shile awona Kristo o Mndumii kuwookapfo.

²⁷ Nao kacha na kulya hekalunyi amwamtse nyi Mumuyo Mwele. Kyasia ndee o mana ulya Yesu wekimwitsa na kulya mba, wo hamu na mae, wambutie chando kikiteṟie kyake ipfo wuwawasonyi.

²⁸ Nao kamwambia mawokonyi, kaichika Ruwa kahamba,

²⁹ “Mndumii, wulalu omeinutsia kyasa kyapfo, inenga mṟundi opfo momu nakuhendie na ofoṟo.

³⁰ Kyamba meso hako hamekuwonyia ikiṟa lyapfo.

³¹ Lilya uweṟeheṟie sumuhana na njoshangu tsa wandu wose.

³² Lya ngeela yedambuya wandu wa orio mbaṟi mbonyi; na lya kiṟumi kya wandu wapfo Israeli.”

³³ Kyasia ndee na mae wakawa moṟihio kilya kyahambo kyake.

³⁴ Na Simeon kawawikia mboṟa, kawia mae oke Maria, “Ichu nyi ambike mohutsa na iira wafoi wa wana wa Israeli; nawewa kichano kyechidedo-dedo wokaṟuo.

³⁵ Na iyo kumonyi oshu nyi lochikuambada ipfo makiidi hawi ha mrima fopfo; kundu mahio na ngoo tsifoi hamanyike napata.”

³⁶ Napfo kuwekeri-se mwikimbi mka, elaho nyi Ana; mana o Fanueli; o kisharinyi kya Aseri; nao kui makuyenyi hake nyi awe-mku kaṟatsia; nyiawemkaa na mii maka mfungade numa ya wupora woke.

³⁷ Kawekaa-se ai mkusu itane ashitsa maka makumi nyanya na iina, nao alawekelekana ipfo hekalunyi; kahenda kewuta shindo sha Ruwa tupu kekuotoya na iterewa kio na mfiri.

³⁸ Nao kawecha naho, saa na iya, kaidapfuma Ruwa; kahenda kyechionguo kyake ko walya waweiwedia maletsionyi ha Israeli wose.

Iwuya Nasareti

³⁹ Kyasia nawo wekimaa yawutsia shisumuhanyi na wuwawaso wo Mndumii shose, wakahenda ikuwuuya na kulya Galilaya wakashika kulya Nasareti, mṟinyi fowo.

⁴⁰ Na mana ulya kang'ana-ng'ana, kahenda kewada pfinya, kaweichuṟo wuṟango, na osaṟio lo Ruwa lukamkaika.

Yesu ai hekalunyi amarisiye maaka ikumi na iwi

⁴¹ Kyasia ndee na mae nyi wawekehenda-henda kulya Yerusalemu orio maka yose ili mkonu menene fo Pasaka.

⁴² Nao kekishitsa mndu o maka ikumi na iwi, wakado nao, chando kiweikido kya mkonu fulya mnene.

⁴³ Wekimarisa mfiri iya, warie njia yewuya, mana ulya Yesu kafurumia kulya Yerusalemu, ndee na mae walaichi.

⁴⁴ Wakakusaṟa kulako nyi akeri na walya wa kyaṟonyi, wakatsinda wehenda njienyi ohendo la mfiri fumu, wakampfula ipfo ko walya wa oshari lowo na ko walya waichianyi nawo.

⁴⁵ Wameda walambona-pfo, wakawuya na kulya Yerusalemu wechimpfula.

⁴⁶ Wamemaa mfiri iṟaṟu, wakambona kulya hekalunyi adamie na walosha kewaadanyia na iwawesa-wesa mbonyi.

⁴⁷ Na walya wemadanyia wakatiri mnu wose kipfa kya wuṟango wulya woke na mahaluyenyi hake.

⁴⁸ Kyasia ndee na mae wambona wakauma mkahai, na mae kambia, “Nki ili olutana kudi manoko? Keambuya nyi lomekushiha mnu na madima ndeo na inyi.”

⁴⁹ Nao kawawia, “Aikyo mbeinshihia nkyo kiki? Mlaichi ke nyinjiwaṟi ikukaya ipfo shindonyi sha Wande?”

⁵⁰ Nawo walamanye kidedo kilya awawia.

⁵¹ Naalyo kahenda kusotsanyia nawo, kacha na kulya Nasareti kawa mowahidia. Na mae kasuṟuma mbonyi tsilya mrimenyi tsose.

⁵² Kyasia Yesu kahenda kechiengeṟekia wuṟango na mng'ano na mkundye fokunda Ruwa na wandu.