LUKA 19 - Bibilia Kui Mdedie fo Kimochi

¹ Kekishika kulya Yeriko, kaida na kulya mṟinyi.

² Napfo kuwekeri-pfo mndu awelaho rina lyake nyi Sakayo, aweei mnene o wasanyi wa okamba, awewei msuṟi.

³ Kalanga iwona Yesu namanye chando ai, nalaidime; kipfa kya mamwingi fo wandu, nao nyi awe mfui wumba.

⁴ Kahenda kusonguo kechidicha, kado mkuyu-hu kundu nambone, kipfa njia nyi iweidie handu halya.

⁵ Yesu kekishika-ho, kaambuya huye, kambona, kambia, “Sakayo, soka-pfo owinyi faṟa; kipfa na ngaki, inu na njihende itsinda kulya mba kopfo.”

⁶ Nao kasoka-pfo owinyi faṟa, kamduo kanyi koke amchihiye.

⁷ Na walya walewona, wakamnunuwia wakahamba “Nyi aida na ko mndu mnyamaṟi katsinda-pfo.”

⁸ Sakayo kahoṟoka, kawia Mndumii, “Ambuya Mndumii kenga kya masaa hako njiwode nyi njechiinenga wakiwa, na kokooya ndemlemba mndu kindo, nyi njechimbihiṟia kya ngeria kaana.”

⁹ Yesu kambia, “Kunu mba komewoneka okiio kipfa nao amonyi nyi awei mana o Abrahamu.

¹⁰ Kipfa Mana o mndu nyi alecha ipfula kilya kidekie, nakikiṟe.”

Mfanano fo pesa

¹¹ Wandu wekiicho isho, nao kaengeṟa ideda kechiloṟa mfano, kipfa nyi awei afui na Yerusalemu, nawo wakakusaṟa kulako wumangi wo Ruwa nyi wochikuloṟa oweṟe lulya.

¹² Kahamba, “Mndu o wumangi alehenda oruka lo kuleshe nawade-pfo wumangi, numa nawuye.

¹³ Kalaha wasoṟo wake ikumi, kawainengia mahana ikumi ha shilingi, kawawia, ‘Kape-kapenyi natso mbucha njitane ngawuya.’

¹⁴ Na wandu wa kulya mṟinyi nyi wawemsuo, wakaduma wasu ipfo numa yake wambie, ‘Lukaundi ichu naluitoṟie-sopfo.’

¹⁵ Nao kekiidima iwada wumangi wulya, kawuya, kahamba wasoṟo walya alewainengia pesa tsilya, walaho wache na koke, kundu namanye sa aendie kindo kulya mbuchenyi.

¹⁶ Kukacha ulya o kuwooka kahamba, ‘Mndumii, shilingi tsilya tsapfo ihana tsileṟimiṟa tsingi mahana ikumi.’

¹⁷ Nao kambia, ‘Hoona! Iyo msoṟo mcha, kipfa ui mṟeheṟi o shindo shitutu, wa-ng'u mwitoṟi o mṟi ikumi.’

¹⁸ Kukacha o kawi, kahamba, ‘Mndumii, shilingi tsapfo ihana tsileende tsingi mahana hatanu.’

¹⁹ Kawewia na ichu, ‘Na iyo kewewa-ng'u mwitoṟi o mṟi itanu.’”

²⁰ “Kukacha ungi owo kahamba, ‘Mndumii, ambuya, aitsi shilingi tsapfo ihana. Nyi njiwetsipfungie ipfo kidaminyi kya mbiṟuko.

²¹ Kipfa njikuowoye ili ukeri mndu mkeremi, nyiokekuiria kindo kulaleṟie-ho, kowesambuo sa kulawaaye.’

²² Nao kambia, ‘Na madedo ha dumbu lyapfo nyihechikuwonyia naho owingo, iyo msoṟo mbicho. Nyi uweichi ke nyi njii mndu mkeremi, njekekuiria kindo njilaleṟie na isambuo sa njilawaaye.

²³ Aka nyikili kulaleduo pesa tsako ko menyi mokumba shindo? Na ili njiwechiwuya nyi njiwechitsiambia na tsa ngeria.’

²⁴ Kawia walya wawe-ho, ‘Msokenyi shilingi-tso ihana, mwinengie icho awode mahana ikumi.’

²⁵ Wakambia, ‘Mndumii, nyi awode mahana ikumi!’

²⁶ ‘Na inyi nyi ngamuwia, Orio sa awode echiengeṟa inengo, na ulya alawode, nyi echisoko na kilya awode.

²⁷ Na wakituwa walya wako, walakundi njiwaitoṟie, waendenyi na iya muwarandwo-randwo njiwonyi!’”

Yesu aida na Yerusalemu

²⁸ Kekimaa ihamba ado, kaengeṟa iwada njia yedo na Yerusalemu.

²⁹ Kekishika hafui na Betifage na Betanyia, alya kufui na fumwu lya mashidi ha msinepfu, naalyo kaduma wasu wake wawi, kawawia;

³⁰ “Hendenyi kulya mṟinyi fui mambatsana nanyo. Mkameida napfo nyi mochiwona-pfo ihache lya nzoi li-ipfunge, ilalembawe mndu ma umu, mulipfunguo-ho, munjiendie.

³¹ Na kokooya mndu ambesa, Nyikili molipfunguo-ho, mbienyi, nyi Mndumii alikundi.”

³² Na walya waledumo wakakure, wakahenda, wakawona chando alewawia.

³³ Wechifunguo ihache lilya lyo nzoi, wenyi-lyo wakawawia, “Nyikili mopfunguo ihache-lyo?”

³⁴ Nawo wakahamba, “Nyi Mndumii aliwodie iṟunda.”

³⁵ Wakaliduo ko Yesu; wakaliala nguwo tsawo, wakadosiaho Yesu.

³⁶ Kechihenda ado, wakamwalia nguwo tsawo kulya njiehu.

³⁷ Lilya aleshika kufui na msaṟi fulya fo fumvu lya mashidi ha msinepfu, naalyo siṟi iya ya wandu wa kiloshionyi kyake yose ikawooka ichihio na iadapfuma Ruwa na maṟu hang'anyi kipfa kya ṟiho tsilya tsa pfinya waletsiwona tsose.

³⁸ Wakahamba, “Naleheke ichu mocha iwa mangi kui rina lya Mndumii; ruwehu nyi ofoṟo, na kiṟumi kikae huye ruwehu!”

³⁹ Kyasia, kulya mamwinginyi kuwekeri-pfo Wafarisayo maata, wakambia, “Mlosha, kanga iwo wa kiloshionyi kyapfo!”

⁴⁰ Nao kahaluo kahamba, “nyi ngamuwia, Kokoya iwa watsia, maho na hechikoṟoṟoma.”

Yesu afihiṟia mchenyeṟe mṟi fo Yerusalemu

⁴¹ Ashika kufui na yafukia, kawona mṟi fulya kafulilia.

⁴² Kahamba, “A kulamanya-wo na iyo mfiri-fu fo inu mbonyi-tso tsiwechikuendie ofoṟo! Kyaindi ulalu shameṟiko mesonyi hapfo ulawonyi.

⁴³ Cha kipfa nyi kochikaa kukuhoye mafiri, nlyondo wakituwa wapfo wechikuṟingichia na mfoo na ikutengetia na ikufiṟita kose kose.

⁴⁴ Nawo nyi wechimuwunduya wanda na wana wapfo wai ipfo kiidi kyapfo, wamuole-ole walechida ma iho likae huya iho lingi, kipfa ulalemanya shiheri shilya ulesahio!”

Yesu aida na Hekalunyi

⁴⁵ Kaida na hekalunyi, kawooka ifuna-pfo sa wawei ikumbia-pfo shindo.

⁴⁶ Kawawia, “Nyiki kiṟehie, ‘Mba yako iwe mba yeterewia,’ nanyo mkawuya iihaluo opango lo wasoki!”

⁴⁷ Nao kawa molosha handu halya haele orio mkonu, Indi wakohanyi wanene na walaanyi wa wuwawaso na wanene wa wandunyi wakashiha mwaanya fomrumatsa.

⁴⁸ Walawone kembutia; kipfa wandu wafoi wawewatiṟanyi nao wechimwadanyia.