LUKA 18 - Bibilia Kui Mdedie fo Kimochi

¹ Kawawia ifano lyehamba, n'kimuwaṟi iterewa kitsitsi mlechilemo.

² Kahamba, “Kundu ko mṟinyi kuweepfo mchili modumbuo mondu, alaweowoye Ruwa ma ikusaṟa kya mndu ma uhya.

³ Kuweepfo-se na mka mkusu kulya mṟinyi, kawa mohenda-henda ko mchili ulya modumbuo mondu kahamba, ‘Dumbuo-wo mondu foko na mosile chu oko!’

⁴ Nao nalakunde, kambetesa haleshe. Numa kawuya ihamba ipfo mrimenyi koke, ‘Ngakaa njilaowoye Ruwa, na ikusaṟa kya mndu ma uhya.

⁵ Kyaindi ili mka-chu anjichungia-chungia adi kitsitsi, na njimweke idumbuo mondu foke, kundu nalawone kefurumia icha injiraha-raha kyamu.’”

⁶ Mndumii kahamba, “Keadanyenyi mchili-chu modumbuo mondu kilasumhanyi chando ahamba.

⁷ Aka Ruwa awechidumbuo mondu fo iwo awasambuṟie, iwo wekemfuhia mfiri na kio? A ngesa nyi echiwawetesa?

⁸ Nyi ngamuwia, nyi echikambiṟa idumbuo mondu fowo owinyi. Nyi mohamba muda? Ili Mana o mndu echicha na echiwona ofoṟo orukenyi?”

Mfanano fo Mfarisayo na msanyi o okamba

⁹ Kuweepfo wandu wawekusaṟye kyawo wawenyi ke nyi wai wecha wasumuhanyi, wakapiṟa wengi; kawawia ifano-li,

¹⁰ “Wandu wawi waledo na hekalunyi iterewa Ruwa; umu nyi Mfarisayo, na o kawi nyi mosana okamba.

¹¹ Mfarisayo ulya kahoṟoka, katerewa mrimenyi koke adi, ‘Ruwa ngakuichika, kipfa ili njilafananyi na wandu wengi, wasoki, wa ukika, waṟuhui, ma ndafananyi na msanyii-cho o okamba.

¹² Mfungade fumu nyi njekekuotoya kawi, na shilya njiwode shose, ngawedambika kenga kya ikumi.’

¹³ Kyaindi msanyi ulya o okamba kahoṟoka haleshe, nalakarie ma iiria meso huye ruwehu, indi kakukapa kipeeta kahamba, ‘Hoi Ruwa, kenjisaṟia-wo inyi mokudekio!’

¹⁴ Kyasia nyi ngamuwia, ‘Ichu nyi alesoka na kanyi koke amsumuhantse kota ulya.’ Chakipfa orio mokung'anyisha amonyi, nyi echinyiiṟo, na mokunyiiṟa amonyi, nyi eching'anyisho.”

Yesu awikia ona wana watutu

¹⁵ Wakamwendie na shiwana, kundu nashipaaye. Walya wa kiloshionyi wekiwawona, wakawatukia.

¹⁶ Yesu kawalaha wache na koke kahamba, “Kelekenyi shiwana shikucheye na koko, ma mulashiime; cha kipfa wumangi wo Ruwa nyi wo iwo wai chasho.

¹⁷ Nyi kya lohi ngamuwia, ‘Mndu alaambia wumangi wo Ruwa ai cha mana nechishika-pfopfo.’”

Mndu umu msuṟi

¹⁸ Kuwei-pfo mndu ang'anyi, kambesa kahamba, “Mlosha mcha, ngawika njida, njioṟe moo fo mlungana?”

¹⁹ Yesu kambia, “Nyikipfa-ki ili onyiilaha Mcha? Kuipfo mchapfo, shile Ruwa amonyi.

²⁰ Mawawaso na uhaichi ke, ‘Ulaṟuhuye; Ulawaahe; Ulaiwe; Ulairie sha wongo; India ndeyo na mayo.’”

²¹ Nao kahamba, “Isho shose nyi njishiwode wookia wututu woko.”

²² Yesu aicho ado kambia, “Utsiheṟe kindo kimu henda kumba isho uwode shose nohawie wakiwa, nlyondi ochiwada kisa kulya ruwehu. Komemarisa, nocheng'u nonjioshe.”

²³ Kekiicho ado kasokio mnu nyi fowa kakuinadia mnu, kipfa nyi awesuṟie mnu.

²⁴ Yesu kekimbona ado kahamba, “Ambuyenyi chando kiumie wasuṟi ida na wumanginyi wo Ruwa!

²⁵ Kipfa nyi kyangu ngamia iide ṟochenyi lya sindanu kota mndu msuṟi iida wumanginyi wo Ruwa.”

²⁶ Walya waleicho wakahamba, “Aka nyi mndu ada echikiṟo?”

²⁷ Kahamba, “Isho shilechiidimika ko wandu, ko Ruwa nyi shechiidimika.”

²⁸ Petro kahamba, “Ambuya, so nyi luleda shindo shadu shose, lukakuosha.”

²⁹ Yesu kawawia, “Nyi kya lohi ngambia, Kuwode mndu aleda mba ang'u mka, ang'u wanawamae, ang'u iwo wamfeye, ang'u wana, kipfa kya wumangi wo Ruwa.

³⁰ Aleekaa nawihiṟio sha ngeria kafoi shiheri-shi shekaa iya wanda, na shiheri shechicha, nasumbo moo fo mlungana.”

Yesu ahamba lya kaṟaṟu kya opfu loke na iṟuka lyake

³¹ Kyasia kasanza walya ikumi na wawi handu hamu kawawia, “Ambuyenyi, nyi lukeri-ng'u ido luhende kulya Yerusalemu, na shilya shii shiṟehie kya Mana o mndu nyi waikimbi wa Ruwa, nyi shechihoya shose.

³² Kipfa nyi echihenda idambikio wandu wawicho, wamwisaluche, na imruma, na imwiselia mnyeri.

³³ Wawemkapa na ngowa tsiwode msha, numa wambaahe. Nao mfiri fo kaṟaṟu nawuye iṟuka.”

³⁴ Na iki walakimanyie ma kitung'tu. Idedo-lyo likawaṟikikia, walalimanye kimaduma, walamanye kilya lyahamba.

Yesu achiṟa mndu mpfu meso

³⁵ Lilya aweshikie kufui na Yeriko, adi a ichu mndu kipfupfuṟe adamie mbarinyi ya njia kechiterewa shiinengo.

³⁶ Aicho tendemra ya wandu yechiida, kawesa, nkyo kiki ikyo?

³⁷ Wakamwongoya ke nyi Yesu o Nasareti aiida.

³⁸ Nao kakoṟoṟoma ilaha kahamba, “Hoi Yesu, mana o Dawidi, njisaṟia-wo wukiwa.”

³⁹ Walya wawesonguo wakamkanga natsie. Kyaindi o kaengeṟa ilaha, “O mana o Dawidi, njisaṟiawo wukiwa mmbe!”

⁴⁰ Yesu katirima, kawawasa naendo na alyando ai. Kekishika-ho, kambesa.

⁴¹ “Nyi kiki ukundi njikuwutie?” Nao kahamba “Nyi njiwuye yambuo-se Mndumii.”

⁴² Yesu kahamba, “Ambuo-se; nyi iidikia lyapfo lyakukiṟa.”

⁴³ Naalyo kaambuo, kahenda nao kechiidapfuma Ruwa. Na wandu walya walewona, wakang'anyisha Ruwa.