LUKA 17 - Bibilia Kui Mdedie fo Kimochi

¹ Kyasia Yesu kawia walya wa kiloshionyi kyake, “Na kukaki kochida kulacha madekeshopfo, indi ochia lo ulya echihaende!

² Nanga kapfungio iho lya iseo ipfo tsingonyi kapfuluyo ipalyipalyinyi, nlyondo kiwechichia kota ili adekesha umu o watutu.

³ Kuṟisenyi Kokoya manomayo akudekio, kemdedie! Kakutochia, mhooṟie.

⁴ Na kakudekio ka-mfungade mkonu fumu, nao kawewuya icha na-kopfo ka -mfungade ihamba, ngamedumbuya, kewemhooṟie.”

Wuidiki

⁵ Wasu walya wakambia, “Mndumii, luengeṟie pfinya yeidikia Ruwa.”

⁶ Mndumii kahamba, “Kokoya mbewode iidikia ma litutu cha mbeu ya haradali, na muwechiwia mkuyu fu, kuṟuka iya, nokudonge ipalyipalyinyi!” Nafo nyi fuwechimwidikia.

Kindo kiwaṟi mṟundi

⁷ “Indi nyiiu onu awode isinga lyake lyedema na mtambo fodema, ang'u molisa, nao kiheri acha awuka demenyi nambie, Kenjo owinyi nodamie?

⁸ Chi echimbia, ‘Njiomoya kando njilye! Kupfunge nonjihidie mṟasa njimae ilya na inyo; ngammaa ilya, nokulieng'u iyo kumonyi na inyo noweku nyooya.

⁹ Alae nyi awechiwia isinga lilya haika kipfa lyaṟunda kilya lyawawasio?

¹⁰ Kyasia, nanyo na wudo, mukamemarisa iwuta shose mui wawawasie hambenyi, So nyi masinga halechiwa; shilya luwutie nyi shilya shiluwaṟi iwuta tupu.’”

Yesu aheṟemtsa wandu ikumi wawodo nyi saka

¹¹ Naalyo kukashika, lilya mandi awerie njia yehenda Yerusalemu, kaida kiidi kya Samaria na Galilaya.

¹² Kekiida na kimṟinyi kimu, naaho wasoṟo ikumi mawawodo nyi saka wakamkumbuhana; wakahoṟoka aleshe.

¹³ Wakairia ṟu wakahamba, “Yesu! Mwaria! Kelusaṟie wukiwa!”

¹⁴ Nao kekiwawona kawawia, “Kuhendyenyi mukuloṟe kulya ko wakohanyi.” Wadi wechihenda-pfo wakaheṟemka.

¹⁵ Na umu owo-ho awona ke amchia, kawuya kaichimbira Ruwa na ṟu ling'anyi.

¹⁶ Kacha, kamhoya na kyamu alya madendenyi hake kamwana. Nao nyi-we o Samaria.

¹⁷ Yesu kahaluo kahamba, “Walya waheṟemka chi ikumi; a walya kenda nyiku waya?

¹⁸ Kowoneka-se-ho ma sa wawuya wache iichika Ruwa shile na mhenu-chu tupu?”

¹⁹ Kambia, “Kure nokuhendie kanyi, nyi iidikia lyapfo lyakukiṟa.”

Icha lya wumangi wo Ruwa

²⁰ Lilyandi aleweso nyi Wafarisayo ke wumangi wo Ruwa nyi wochicha indi, kawahaluo kahamba, “Wumangi wo Ruwa wochicha wochikuloṟa-loṟa na wandupfo.

²¹ Manya wechihamba, aiwu iya, ang'u awulya kulyapfo; kipfa wumangi wo Ruwa nyi ipfo kidi kyanu wui!”

²² Kyasia, kawia walya wa kiloshionyi kyake, “Nyi kochikaa kuche shiheri, nyilyondo mochilanga iwona mfiri fumu fo Mana o mndu, manya mulechifuwona.

²³ Na sa wechimuwia, Ambuyenyi iya, ambuyenyi ipfo; ma mlakure handu mui muhendepfo.

²⁴ Kipfa chando mbawa yekewaṟuka ikawooka ora-lu likakooya ora lungi, ikalimikia shose shii kunu shi ya ruwehu, nyi wudo na kya Mana o mndu kechiwa mkonu-fo foke echicha nafo.

²⁵ Kyaindi kuwooka nyi kimbaṟi ituuro mnu na ileho nyi wandu wa oshari-lu.

²⁶ Na chando kulewa shiheri shilya sha Noe, na wudo kochikaa kuwe mkonu iya ya Mana o mndu.

²⁷ Nyi wawei ilya, wakawenyio, wakaalika, wakaaliko, itane mkonu fulya Noe aleida na kulya ngalawenyi, kukacha mra fukawakombetsa wose piu piu.

²⁸ Nyi wudo shiwefananyi na kiheri kya Loti, nyi waweilya, wakawenyo, wakawehuṟa, wakawekumba, wakawewaaya, wakawewika mba.

²⁹ Kyaindi mkonu Loti alewuto kulya sodoma, kukaoloka modo fo kibiriti-biriti ipfo ruwehu fukawarumatsa wose piu.

³⁰ Na wudo-ng' tichi kochikaa kuwe mkonu fulya Mana o mndu echitarambuyo.

³¹ Mkonu fulya, ma mndu ai kai na masaa hake hai wanda, ma nalawone kesoka ihaira. Na wudo namndu ai mdemenyi, ma nalawuuye shii numa.

³² Kekumbuonyi-wo mka o Loti!

³³ Orio mndu akundi ineneka mrima foke, nyi echifudetsa, na mndu alakundi ifunenekia, nyi echifuinutsia kipuo wyoo.

³⁴ Ngamuwia, kio kilya kilya, wandu wawi walee kitaṟehu kimu, umu-ho nyi echiiroho, na icho ungi nadeoho.

³⁵ Na waka wawi waisea handu hamu, umuho nyi echiiroho, na ungi nadeo-ho. [

³⁶ Wawi wechikooyo wai demehu, umu-ho nairoho, na odoe nadeo-ho.]”

³⁷ Wakahaluo wakambia, “Nyiku Mndumii.” Nao kawawia, “Handu hai mnying'a, nyi'hondo mtonyi (mosuṟa) yekekuwumbia.”