LUKA 16 - Bibilia Kui Mdedie fo Kimochi

¹ Kyasia kawia na walya wa kiloshionyi kyake, “Kuwekeri-pfo mndu msuṟi awewode mwiṟichi oke momringia kanyi, o kakumbo koke ke nyi ekeola-ola masaa hake.

² Kamlaha kambia, ‘Nyi kiki iki ngaicho kyapfo; kenjiloṟa itala lya shindo sha wuiṟichi wopfo, kipfa nyi njiwonyii ochiidima-se injihidiapfo.’

³ Mhidi ulya kahia ipfo mrimenyi koke, ‘Nyi wuda njechiwika ngesa, ili mndumii oko anjifuna wuhidinyi? Idema njechiidimapfo, na yeṟeṟa nyi njechiwado nyi sonu tseeṟeṟa.

⁴ Hoo! Ngamemanyia chando njechiwika, kundu ili njechiwuto wuhidinyi wanjiambie, wanjiitse na mba kowo.’

⁵ Kyasia kalaha wasile wa mndumii oke wose umu-umu kawia ulya o kuwooka, ‘Nyi sile ya kiki uwode ya mndumii?’

⁶ Nao kahamba, ‘Nyi matanaki ihana ha mafuda.’ Nao kambia, ‘Ambia paruo yapfo nodamie, noṟehie-ho owinyi fara makumi hatanu,’

⁷ Kawia na ulya ungi, ‘A iyo nyikiki uwode?’ Nao kahamba, ‘Nyi mkunja ihana ya ngano.’ Nao kambia, ‘Nga paruo yapfo noṟehiye-ho makumi nyanya.’

⁸ Kyasia mndumii ulya kaṟumisha mwiṟichi ulya awenyamaṟie, kipfa lilya alewuta ado na wuṟango; kipfa wana wa wuyana-wu wo wulalu nyi wa-waṟango kota wana wa sa ipfo sumuhana na kishari kyawo wawenyi.”

⁹ Nyi wudo-ng'u na inyi ngamuwia, “Kehenda kuwadienyi mbuya na shindo sha mamona ya wuwicho, kundu ili shechishika isenekia, wamwambie, wamdamiṟe alyando kochikao mlungana mandi-ho masaa hanu hechimdekia.

¹⁰ Ichu ai mhendeli o shindo shangu, nechiwa na mhendeli o shindo shifoi.

¹¹ Na ichu atahacha kindo sa kitutu, nechiwa motahacha na kindo king'anyi?

¹² Akashika mkada mlaiwahendeli kya mamona ya wuwicho, ichu echimasia sha lohi nyiiu?

¹³ Nanyo mulamewa wahendeli kya shindo sha wengi, aka-shika ichu echimwinenga shii shanu nyiu.”

Madedo maata ha Yesu

¹⁴ Kwipfo mṟundi echidima ipfuṟukanyia womi wawipfo. Kipfa nyi wudi kechihendeka, “Nyi echisuo ichu o kuwooka, nakunde ulya o kawi, ang'u nakuwade na ichu o kuwoka, naisaluche ichu o kawi; Mochiima iṟundia iwa wawi; Ruwa na Mamonapfo.

¹⁵ Kyasia Wafarisayo walya waicho wado nawo nyiwe-wandu wawelangie mnu mapesa, wakakutsinyia kyake. Nao kawawia, ‘Nyo nyi mokekuhaluo wecha wasumhanyi oshangunyi lo wandu muwenyi, kyaindi Ruwa nyio aichi ngoo tsanu; cha-kipfa wutumbe wo ki-wandu nyi kindo kisuikie ko Ruwa.’

¹⁶ Mbonyi tsa wuwawaso na tsa waikimbi nyi tsileedio itane Yohane acha, na kiwokia-lyo nyi kokeongoyo mbonyi njicha tsa wumangi wo Ruwa, na orio mndu nyiekepario-pfo na pfinya.

¹⁷ Nyi kyaangu ruwehu na sanga shisaramaye, kota kimṟeho kimu kya wuwawaso kechideka.

¹⁸ Orio mndu alekana na mka oke kaalika ungi nyaṟuhuya; na ichu echialika ulya alekana na mii, nyi aṟuhuya.”

Msuṟi na mkiwa Lasaro

¹⁹ “Kuwekeri mndu msuṟi awekeṟaa nguwo tsa king'aring'ari na tsa kimamile tsa owiṟo pang'a, kawa mokukesekia na shiweṟe mkonu yose.

²⁰ Na mndu mkiwa, rina lyake nyi Lasaro awe-mkumbe alya mongo koke, nao nyi awewodo nyi matiinga,

²¹ kalanga ikuihutsio nyi shipeṟengu-sho shechioloka ipfo mese-hu ya mruṟi ulya. Kyaindi na shite itane shacha shikamkomba-komba matiiga halya.

²² Kukashika, mkiwa ulya kapfa, kahenda-dao nyi wamalaika kulya nndenyi tsa Abrahamu. Na msuṟi ulya kawepfa, kaṟiko.

²³ Msuṟi ulya akeri kulya kundu ko wapfu mawukiwenyi, kairia meso kawona Abrahamu kuleshe, na Lasaro ai ipfo nndenyi tsake.

²⁴ Kalesha ṟu, kamlaha kahamba, ‘Hoi wande oko Abrahamu! Kenjisaṟia-wo wukiwa, nokeduma Lasaro nakape kimdo kya kimnyo kyake mṟingenyi nache injioloṟa olimi-lu; kipfa ili njiilya mnu wukiwa kunu ngumienyi ya modo-fu.’”

²⁵ Abrahamu kahamba, “Manoko, kekumbuo-wo chando iyo kuwei-yambia mecha hapfo lilya mandi uwei na moo orukenyi, na Lasaro kyake kaambia mawawio tupu na wuale, nao wulalu iya nyi aiwihiṟyo moo na iyo kowawiṟo.

²⁶ Ma koda isho shose, kunu kiidi kyadu nanyo nyi kung'alawukie-ho pichi lya ngolokio ing'anyi, kundu iwo wakundi yambadia ipfo konu walaidime, na iwo wa konu walaidime yambadia kodu.

²⁷ Nao kahamba, ‘Kyakusiia, indi ngakuterewa, ndeyako, nokekumdumia kulya kanyi ko wande.

²⁸ Kipfa nyi njiwode wanawawama wako watanu, nakehenda iwakekedia, kundu wo walawone wechicha-se na kundo-ku ko mawukiwa.’

²⁹ Abrahamu kahamba, ‘Na wawode Mose na waikimbi wa Ruwa, leka wawaadanyie-wo.’

³⁰ Nao kahamba, ‘Ote-wo, Abrahamu oko, ndeako, indi kokooya wacheyo nyi mndu o kunu ko wapfu, nalyondi wechidumbuya mrimenyi yawo.’

³¹ Abrahamu kambia, ‘Wakamda walaadanyia Mose na waikimbi wa Ruwa, na nokoe mndu awechiṟuka awuka ko wapfu, wawechiidikishopfo.’”