LUKA 15 - Bibilia Kui Mdedie fo Kimochi

¹ Wesana okamba na wanyamaṟi, iwa wose nyi wawekemchea, kundu wamwadanyie.

² Wafarisayo na walaanyi wa shitapu wakarihinyika wakahamba, “Ichu nyi ekeambia wanyamaṟi na ilya kalya nawo.”

³ Nao kawawia ifano-li kahamba.

⁴ “Nyi mndu uhya o konu awode machondi hake ihana, limu-ho lideke, alechida halya makumi kenda na kenda ipfo patenyi nahende iwatiṟa lilya lidekie itane aliwona?

⁵ Nao kameliwona, kalihekia makoso-hu hake amchihiye.

⁶ Kamecha na kanyi kalaha wambuya na wa mṟasa kawawia, ‘Kechihiyonyi-wo kimu na inyi, kipfa ngamewona ichoondi lilya lyako liwedekie.’

⁷ Ngamuwia, ‘Na wudo kochiwada sia kulya ruwehu kya mndu umu mnyamaṟi adumbuya kota kya wandu wecha makumi kenda na kenda walasaṟie idumbuya.’”

Mfanano fo shilingi idekye

⁸ “Ang'u nyi mndu mka uhya awode shilingi tsake ikumi, ikadeka-ho imu, alechiatsa taa naahie ipfo mba, napfule wo-laalya itane aiwona?

⁹ Na kameiwona kalaha wambuya wake na waka wa mṟasa kawawia, ‘Ke chi-hionyi-wo hamu na inyi, kipfa ili ngamewona shilingi iya yako iwedekie.’

¹⁰ Na inyi nyi ngamuwia, ‘Na wudo kochiwa sia ko wamalaika wa Ruwa kya mndu umu mnyamaṟi adumbuya.’”

Mfanano fo mana adekye

¹¹ Kahamba-se, “Mndu awewode wana wake wa womi wawi.

¹² Ulya manawo kahenda iwia ndee, ‘Wande, njinenga ohawi loko lo masaa lulya luwechinjisumhanyia.’ Nao kawahawia shindo shilya shake.

¹³ Kukaida mfiri sa mwangu, mana ulya lyamkeku kakungura shindo shilya shose kahenda-samia oruka lo kuleshe. Kundu kulya kaola-ola masaa halya hake kui shindo sha seṟeṟia, kawa mseṟeṟi.

¹⁴ Nao kekimaa yola-ola shose, kukacha njaa ing'anyi kulya orukenyi. Nao kawooka iwuṟa shetawulya moo pichu.

¹⁵ Kahenda ikuwada na msuṟi umu o walya wa kulya orukenyi; nao kamduma mdemenyi foke, nahende ilisa nguwe.

¹⁶ Kalanga iihutsa ndeu yake na makanda hekelio nyi nguwe tsilya, indi nalainengo nyi mndu.

¹⁷ Kawuya itawuka mrima kahamba, ‘Nyi waikelei wenga wa wande oko wawode kando kawo kaingiki, na inyi njipfiia njaa kunu wai!

¹⁸ Njechikure njihende ko wande oko njimbie, Wande, njilenyamaṟia ruwehu na sumuhana na iyo.

¹⁹ Ma njikisumhanyi ilaho nyi mana opfo-sepfo; kekunjihaluye umu o waikelei wapfo.’”

²⁰ Naalyo kakure kahenda kulya ko ndeye. Akeri handu sa haleshe alameshika, ndee kambona, kamwichio wukiwa, kakambia, “Kamchunguṟia nzingonyi, wakahekiana momu.

²¹ Mana kambia, ‘Wande, nyi njilenyamaṟa huye ruwehu na sumuhana na iyo; ma njikisumhanyi ilaho nyi manopfosepfo.’

²² Kyaindi ndeye kawia masinga hake, ‘Kambienyi owinyi muhende yende nguwo ya wuitoṟi iya ichihiye tsingi mumṟike, muwembika na rachi ipfo kimnyonyi kyake na shaadu ipfo madende.

²³ Muhende yende na ihache lilya linoru mulishinjie,’ lulye, luchihio.

²⁴ Kipfa mana-chu oko nyi awepfie kawuya iṟuka, nyi awedekie, kawuya iwoneka. Naho wakawooka ichihiyo.

²⁵ Kyaindi mana ulya oke mbee nyi mdemenyi aweei; achepfo ashikie kufui na kanyi, kaicho shinanda na ṟingi.

²⁶ Kalaha-ho ileu limu kaliwesa, ‘Nkiki ikyo?’

²⁷ Nalyo likambia, ‘Nyi mananu acha na ndeyo kashinja ihache lilya linoru, kipfa kya ili awuya imbona ai na oru.’

²⁸ Nao kaichuo nyashi, nalakunde ma iida napfo. Kyasia ndee kaida na ipfo nja kamlemba-lemba.

²⁹ Nao kahaluo, kawia ndee, ‘Keambuya; kiṟa mbeikuṟundia maka ifoi ido, na inyi njilemetehiye ma wuwawaso wopfopfo, ma iyo kulemennenge wudahina wo wuoṟo njihende ma ikuchihiṟanyia na wambuya wakopfo.

³⁰ Kyaindi wulalu omekewona mana-chu opfo ache ichu aolye masaa hapfo ai na shisaya na weṟuhuyo, ate o nyi omshinjia ihache lilya linoru!’

³¹ Nao kambia, ‘Manoko, iyo nyi ukeri na inyi shiheri shose, na ishi njiwode na shapfo shose.

³² Kyaindi nyi kiwewaṟi ichihio na ikeseka, kyamba mana-cho oko nyi awepfiie kawuya iṟuka, nyi awedekie kawuya iwoneka.’”