LUKA 14 - Bibilia Kui Mdedie fo Kimochi

¹ Kyasia kaida na mba ya mnene umu o Wafarisayo ili lya mkonu fo sabato nalye-pfo shelya; nawo wakambikia ndeheka.

² Napfo nyi kuwekeri-pfo mndu aluo, aambi mṟinga, ai alya sumuhana na oshangu loke.

³ Yesu kawesa walanyi walya wa wuwawaso na Wafarisayo walya kawawia, “Kuipfo mti kochiṟa mkonu fo sabato ang'u ote?”

⁴ Nawo wakatsia do. Nao kambada, kamchiṟa, kamsama.

⁵ Kawawesa, “Nyiiu onu pung'a yake ang'u nzoi yake ikaoloka ṟungunyi lya mṟinga, nade alaidosa-pfo oweṟe kudi ili kui mkonu fo sabato?”

⁶ Nawo walaidime imhaluo ma-nta.

Ilekiya na ikunyiiṟa

⁷ Kyasia kawia walya wa-walahe ifanano, kipfa alewona chando walesambuṟa shidembo sha kusonguo, kawawia.

⁸ “Kowona olaho nyi mndu walinyi, manya kuladamie kidembo kya kusonguo, kipfa nyi kochiwona kochicha mndu amlahe awode kiṟumi kota iyo.

⁹ Na ulya amlahie mu-wawi nache nakuwie, Kesehia ichu; na iyo nyi ochiwooka iwado nyi rihima ili ochiwada kidembo kya numa ya wose.

¹⁰ Kyaindi kolaho, damia kidembo kya numa; kundu ulya akulahie ili echicha nakuwie, mbuya, tikira alya huye. Nlyondo ochiṟumisho nyi walya wadamie na iyo shelyenyi wose.

¹¹ Chakipfa orio mokudosa amonyi nyi echisotso, na mokusotsa nyi echidoso.”

¹² Kyasia kawuya iwia na ulya awemlahie, “Kowona osungusia choonga ya kyahuo ang'u ya kilaayo, manya kulalahie mbuya tsapfo ma wana wa mayo ma wodoo ma wamṟasa wasuṟi, wawone wechikulahia-se iyo kiwe matalana.

¹³ Indi kosungusia choonga ya mpfuho, lahia wakiwa na shileta na weriteka na shipfupfuṟe.

¹⁴ Na iyo, nanga iyo; kipfa wo walawode kekutaa. Kipfa kitaayonyi kyapfo nyi alya maṟutsyonyi ha wecha wasumuhanyi.”

Mfanano fo mfuho fung'anyi

¹⁵ Kyasia umu o walya wadamie nao shelyenyi aicho ado kambia, “Wungusu ichu ekaa nakuliie choonga ipfo wumanginyi wo Ruwa.”

¹⁶ Na Yesu kambia, “Mndu umu alesungusia kilaayo king'anyi, kalaha wandu wafoi.

¹⁷ Kyasia, kiheri kya kilaayo kaduma msoṟo oke nahende-wia walya wawalahe, ‘Kenjonyi, kipfa shose shamewa!’

¹⁸ Iwo wose wakawooka yoka mtambo na kamu yekuwuta-ho. Ulya o kuwooka kambia, ‘Nyi njilehuṟa mdemi foko, nyi kinjiwaṟi njihende ifuambuya, ngakuterewa kenjieeka iwuya.’

¹⁹ Na o kawi kahamba, ‘Nyi njilehuṟa mbe ikumi, nyi njihenda itsihesha kokooya na tsiichi ikuruo magari, nyi ngakuterewa kenjieeka iwuuya.’

²⁰ Na o kaṟaṟu kahamba, ‘Nyi njiilealika mka, kwi kipfa ikyo, ngaidima ichapfo.’

²¹ Msoṟo ulya kawuya kaongoya mndumii oke ado. Naalyo menyi kanyi kapfuluko nyashi, kawia msoṟo ulya oke, ‘Kure owinyii faṟa nohende ipfo mtandarenyi na ipfo njienyi tsa mṟi noende wakiwa na shileta na wapfu-meso na wairiteka nowaitse na kunu.’

²² Msoṟo ulya kahamba, ‘Mndumii, kilya ulembawasa kyambutika; indi na kuwode-se mwaanya.’

²³ Mndumii ulya kawia-se msoṟo ulya, ‘Kure nohende mtanunyi na mṟasenyi ya kuleshe, uwaitike wache na iya, kundu mba yako iichuo pacha.

²⁴ Kipfa nyi ngamuwia; Wasoṟo walya waweei-walahe, ma umu owo, echisonja kelya kyakopfo!’”

Wuhuru wo wuṟundi

²⁵ Kyasia mamwingi fo wandu fufoi fukaawishana nao, nao kawaindukia kawawia.

²⁶ “Mndu kacha na koko, alasuo ndee na mae na mka na wana wake na wanawamae wa kyumi na wa kika na mrima foke amonyi, echiidima iwa mloshe okopfo.

²⁷ Orio sa ada alakudika msalapa foke fopfiaho nanjioshe-ng'u inyi, echiidima iwa mloshe okopfo.

²⁸ Kipfa nyi mndu ada o konu ili akundi iwika imba ling'anyi, alechidamia, naitale kuwooka, kokooya awewode shelimarisa?

²⁹ Kulawone kechiwooka ilisumia, na numa elechiidima ilimarisa, na wose wechiwona wawooke imtaluo.

³⁰ Wahambe, ‘Mndu chu nyi alewooka isumia imba, nalakidime ilimarisa.’

³¹ Ang'u na kuipfo mangi echihenda shidenyi iwinzana na mangi ingi, alechiwooka idamia nadede chila, kokooya na ekaria imsembelia na wasoṟo wake shiku ikumi nawingane na ichu arie wasoṟo shiku makumi hawi?

³² Kawona alechimwidima, nyi echimdumia wasu ai kuleshe namterewe wawade ofoṟo.

³³ Nyi wudo-ng'u na orio umu onu, echiidima iwa mloshe oko, alawooka ikuletsana na shilya awodepfo.”

Chumwi ilawode mlodo

³⁴ “Chumwi nyi injicha, kyaindi kombona yamepuo nyiki kechiwiko-pfo ichie-se?

³⁵ Ma yeewa-se iwiko mdemenyi ma kyalenyipfo, shile nyi ikumba ipfo nja wandu wachume-chume. Ichu awode madu heicho naicho.”