LUKA 11 - Bibilia Kui Mdedie fo Kimochi

¹ Kukashika ili limu awei handu kechiterewa Ruwa, amhutsia, umu o walya wa kiloshionyi kyake kambia, “Hoi Mndumii, luloshe-wo iterewa Ruwa, chando na Yohane alewelosha walya wa kiloshionyi kyake.”

² Nao kawawia, “Ili mochiterewa Ruwa hambenyii mudi, ‘Nde-yadu ui ipfo ruwehu, rina lyapfo litano lyele; wumangi wopfo wuche. Isho ukundi chando shekewutika kulya ruwehu, na kunu orukenyi shiwewa shido.’

³ “Kando kadu kalufoi uluinenge inu.

⁴ Uludeye sile tsapfo luwode, chando naso lokedeea wasile wadu. Ma ulaluduo kitewionyi. Indi ulukiṟe shindo shiwicho.”

⁵ Kawawia, “Nyiu o konu awewode mbuya yake, kahenda koke kio madumbwo hawi kambia, ‘Mbuya yako, kenjiakuya mkate iṟaṟu.

⁶ Kipfa nyi mbuya yako acha koko wulalu awuka kyaṟo, ma njiwode kindo kemnengapfo.’

⁷ Na ulya o mba nahaluo nahambe, ‘Ma kulanjiwinyishe; na mongo fomemaa ishingo; na wana wako nyi wakeri na inyi kitaṟehu, nyi walee-ng'u; ma njiechiidima ikure njiihende ikuinengapfo.’

⁸ Nyi ngamuwia; Ma kada alakure nahende imnenga ili ai mbuya yake, na awechikure kipfa ili amterewa ado na kituumuo, alawode sonu, namnenge isho awuṟie shose.”

⁹ “Na inyi nyi ngamuwia; Keterewenyi nyi mochiinengo; kepfulenyi nyi mochiwona. Kekapekapenyi mongo nyi mochipfunguyo.

¹⁰ Kipfa orio moterewa nyi echiinengo, na mopfula kawewona, na mokapakapa mongo kawepfunguyo.

¹¹ Ang'u ipfo konu kuipfo ndee o mana, mana kamterewa mkate nao namnenge iho? Ang'u kamterewa ikunga, nao namnenge njoka handu ha ikunga?

¹² Ang'u, kamtereewa ipoṟe lya nguku, nao namnenge lya kisuwa?

¹³ Kyasia-ng'u, kokooya nyo mui wawicho, nyi mokeidima iinenga shiwana shanu shiinengo shicha, aka chi kya ngoseṟa mnu Nde-anu o ipfo ruwehu echiengeṟa inenga Mumuyo Mwele iwo wamterewa?”

Yesu ang'u Belsebuli

¹⁴ Yesu nyi awekeri ifuna mṟufu mbicho ai na pipi; mṟufu mbicho kekimbuka, mndu ulya ai pipi kadeda.

¹⁵ Na maata-ho wakahamba, “Kindo kyainenga kaidima ifuna waṟufu wawicho nyi Belsebuli, ichu ai mnene o waṟufu wawicho weososa wandu.”

¹⁶ Wengi-se wakamhesha wakundi nawaloṟe ofano luwukie ruwehu.

¹⁷ Nao kekimanya makusaṟo hawo kawawia, “Orio wumangi wupaṟakanyi kipfa kyawo wuwuenyi nyi wochihaluka mrapu, na mba nyi yechihoya mba ingi.

¹⁸ Aka kokoya Satan nao nyi apaṟakanyi amonyi, akashika wumangi woke nyi wochiwanga wuda? Kipfa ili muihamba ke nyi Belsebuli anjiwanza ngafuna waṟufu-wa wawicho wekeososa wandu.

¹⁹ Aka kokooya inyi nyi njiekefuna waṟufu wawicho na pfinya ya Belsebuli, aka wana wanu nyi wechiwafuna na pfinya ya wu? Kipfa ikyo wo nyi wechimuwinga.

²⁰ Indi kokooya nyi kimnyo kya Ruwa njekefuna nakyo waṟufu wawicho, nyi wudo-ng'u wumangi wo Ruwa wucheye na konu.

²¹ Ili mndu mwapfinya akupfungie shisha kechiringa mba yake, nzohoṟa tsake nyi tsekaa kipuo.

²² Kyaindi ili mwapfinya amng'anyie amchea kambinga, nyiechiduo shisha shake shose awekusirie nasho na isumba shilya amsoka.

²³ Ichu alawadanyi na inyi anjikundipfo, na sa alasanyia na inyi nyi echiola ola.”

Iwuya lya mṟufu mbicho

²⁴ “Ili mumuyo fufanyi ngafu fombuka ko mndu fochipfula handu heonyonya halawode mṟinga, na ili fulechiwona nyi fokehamba ‘Wai, too, keleka njiwuye na kulya mba koko kundu ndewuka.’

²⁵ Fushika-ho, fukakooya injiahie na ishelo ikaweshelo.

²⁶ Nalyondo fochihenda iende mumuyo ingi mfungade ifuwichuye kundu iidime ikaa-pfo, na numa mawuto ha mndu ulya hefurumia hakawa mawicho kota halya ha kuwooka.”

Nanga ya lohi

²⁷ Lilyandi aweihamba madedo-ha, mndu mka mliwe o masumbuhano halya kairia ṟu kambia, “Nanga wusu wulya wulekuduo na mawṟe halya kulehaonga.”

²⁸ Nao kahamba, “E-wo, kyaindi nanga sa wekeicho idedo lya Ruwa na ikaa wakakaa nalyo.”

Wakundi iwona ṟiho

²⁹ Kyasia mamwingi fo wandu wafoi wakakuwumbia alyando aweei, naalyo kawooka ihamba “Kishari-ki nyi kishari kiwicho, kekepfula ofano luṟihishie; nakyo ma kechiwona ofanopfo, shile nyi ofano lulya lo Yona.

³⁰ Chakipfa chando Yona alewa afano lo wandu wa Niniwe, na wudo na Mana o mndu echiwiia kishari-ki ofano.

³¹ Mangi mka o kulya ora lo-kosoka nyi echikaa nahoṟoke alya mondunyi hamu na wandu wa kishari-ki, nawawinge; kipfa nyiawecheye awuka alyando oruka lutsitsie, kacha yadanyia wuṟango wo Solomon, na kya ngoseṟa kota Solomon aiki.

³² Wandu walya wa Nyinyiwe nyi wechikaa wahoṟoke mondunyi hamu na kishari-ki, wakiwinge; kipfa mrima yawo iletau ikamanya mwongye fo Yona, na kya ngoseṟa kota Yona aiki!”

Sa ya mbihu

³³ “Kuipfo msa echiatsa taa naiwike kimolyapfo ang'u naipfihisie kiponyipfo, kyaindi nyi echiiwika kidihu kehekia taa, kundu orio waida na ipfo mba wawone ngeela-yo.

³⁴ Taa ya mbihu nyi riso. Riso-lyo lyapfo kokooya likeri licha, kyasia na mbihu fopfo fose nyi fuwode sa. Kyaindi ili lii-iwicho, na mbihu fopfo nyi fochiwa meema.

³⁵ Kyasia, wang'u mokuṟisa mnu, kundu sa-yo ii ipfo kopfo ilawone yechiwa meema.

³⁶ Kyasia, ili mbihu fopfo fose fukeri sa, fulawode ma ohawi lui na meema, naaho-ng'u nyi fochiwa sa rambatanyi, cha ili taa yakulimika na ngela yayo ii cha mbawa.”

Yesu adeda kya Wafarisayo na walosha wa wuwawaso

³⁷ Kechideda ado Mfarisayo umu kamterewa nahende ilya shelya kulya koke; kahenda-pfo, kadamia.

³⁸ Lilyandi Mfarisayo ulya alewona alye alawooka isanja mawoko, kaṟihio.

³⁹ Mndumii kambia, “Nyo Wafarisayo nyi mokesanja shirahu na shitela ipfo kya-nja, kyaindi ipfo kiidi kyanu nyi kuichuo wusoki na wuwicho.

⁴⁰ Mui matondo, alae chi ichu mowuta sha kya-nja ekewuta na sha kya-mba?

⁴¹ Kyasia, shilya shii ipfo kya-mba, saṟienyi nasho wandu, na shose nyi shechimbiia sha osu.

⁴² Ochia nyi lonu nyo Wafarisayo, kipfa nyi mokedambika kya ikumi kii kya kyaana na shindunda na mboha, indi mkaidia wuchili wusumuhanyi na ikunda lya Ruwa, ishi nyi shimuwaṟi iwuta kulawode ida shilya.

⁴³ Ochia nyi lonu nyo Wafarisayo, kipfa ili mukundi isambuṟa shidembo sha kusonguo ipfo masinagogenyi, mkawekunda na shiṟikiṟo sha ipfo tumo.

⁴⁴ Ochia lonu, kipfa nyi mui cha shipfu shiwowie, na wandu wakawa moshichuma-chuma walaichi.”

⁴⁵ Kyasia mndu umu o walaanyi wa wuwawaso kamhaluo kambia, “Mlosha Mwaria, kohamba kudo nyi olumina naso.”

⁴⁶ Nao kahamba, “Nanyo walaanyi wa wuwawaso, ochia lonu, kipfa ili mokedika wandu maṟio halechiwa iira, nanyio ma mlekehapaaya ma na kimnyio kyanu kimu.

⁴⁷ Ochia lonu, kipfo ili mokechopa shifu sha wadedi wa Ruwa, na wewawaaha nyi wande-yanu.

⁴⁸ Nyi wudo moketetekia mawuto halya ha wandeyanu, mukawechihiṟo nyiho; kipfa nyiwo wawewawaahie, nanyo mkawachopia shipfu.

⁴⁹ Nyi njechiwadumia waikimbi na wasu, na maata wawo nyi wechiwawaaha na wengi wawafune.

⁵⁰ Kundu oshari-lu luwuwuyo samu tsa waikimbi wose tsipusukie kimatsika wuyana wuwiko shika inu.

⁵¹ Wokya samu ya Abeli itane samu ya Sakaria ulya alewoohio makiidi ha kitaṟa kilya kedasia na omombo. Nyi kya lohi ngamuwia; Wandu waoshari lu nyi wechiiweso!

⁵² Ochia lonu, nyo walanyi, wa wuwaso, kipfa muleduo opfunguo lo wulaany nanyo muwenyi mulaide napfo, na walya wawekundi iida napfo mkawakingia.”

⁵³ Lilya mandi alewuka alyando awei, walaanyi wa shitapu na Wafarisayo wakawooka imtengetia mnu na imbesa shifoi.

⁵⁴ Wakamṟinjawia wechimdeha madedo echihadeda, kundu wawone kemkumba.