LUKA 10 - Bibilia Kui Mdedie fo Kimochi

¹ Iya numa-numa Mndumii kasambuṟa wasoṟo wengi makumi mfungade, kawaduma wawi wawi wahende imsongoya, wahende kundo ko mṟinyi kose, na handu hose ekaa nache naho.

² Kawawia, “Shesambuo nyi shifoi, indi weṟunda-ho wakanyia. Keterewenyi Mndumii menyi shesambuo nadume waṟundi ipfo kisambuyonyi kyake.

³ Kuhendyenyi! Ambuyenyi nyi ngamduma mui cha machondi hai kiidi kya shisii.

⁴ Mulahende murie kichoṟe, manya kikuchu, ma shadu, manya mulaiṟikiṟe mndu njienyi.

⁵ Indi mkaida na mba ko mndu, kuwooka hambenyi, ‘Ofoṟo lukae na mba-i.’

⁶ Na kokoya ipfo kuipfo mana o ofoṟo ofoṟo lonu nyi lochimkaika; na kokooya alaipfo, nyi lochiwuya-se na konu.

⁷ Kyasia kaenyi mba iya mochikulia na ikunyooya isho wamwinenga. Kipfa moṟunda nyi asumuhanyie woṟunda woke. Ma mlaṟaheṟahe ihenda mba-i na ii.

⁸ Na orio mṟi moida napfo, wandu wafo wakamuambia, shelya wamuomoya lyenyi.

⁹ Chiṟenyi wandu-wo wakeri-pfo waluo, muwawie, ‘Wumangi wo Ruwa womchea hafui.’

¹⁰ Na orio mṟi moida, wandu wafo walamuambie, wukenyi-pfo muhende ipfo njienyi tsafo muhambe,

¹¹ ‘Ma kiluli-kyo kya ipfo mṟinyii fonu kikuwode kunu madende kodu, nyi lochimuangatsia, kyaindi manyienyi, wumangi wo Ruwa womcha hafui!’

¹² Na inyi ngamuwia, Kilya kya Sodoma nyi kechianguo mfiri fulya kota kaa mṟi-fo!”

Ochia lo mṟi ilechidumbuya

¹³ “Ochia lopfo iyo Korasinyi, ochia lopfo iyo Betisaida; nokooe nyi kulya Tiro na Simon kulewutikia shindo-sho sha pfinya cha ishi shiwutikie kunu kiidi kyanu, nawo nyi wawechidumbuya lilya kacha, wakuṟike na shisaṟa sha wukiwa na idamia mafunyi.

¹⁴ Kyaindi kilya kya Tiro na Simon nyi kyechianguo ili mfiri fo mondu kota kyanu.

¹⁵ Na iyo Kapernaumu chi uweei mdose kokooya ruwehu? Nyi ochikaa noolotso noshike kulya kundu ko wapfu.

¹⁶ Ulya amwicho nyio nyi anjicho inyi, na ulya amleha nyo nyi anjileha inyi; na ichu anleha inyi, nyi aleha ulya anjidumie.”

Walya makumi mfungade wawuya

¹⁷ Wasoṟo walya makumi mafungade wakawuya wai wachihiye, wakahamba, “Mndumii, kui rina lyapfo, waṟufu wawicho na waleluicho, nyi wai wawike shi yadu.”

¹⁸ Nao kawawia, “Nyi njilewona Satan kechioloka ruwehu cha mbawa.

¹⁹ Kyasia na inyi nyi njimwinengie pfinya yechumia njoka na shisuwa na ya orio pfinya yose ya mkituwa, ma kuipfo kindo ma kida ma kida kechimukapapfo!

²⁰ Kya kake mulawone mochichihio ili mumuyo mbicho imbike shi yanu ikamuicho; indi chihionyi kya ili marina hanu hamaṟehie kulya ruwehu.”

Sia ya Yesu

²¹ Saa iya iya kakeseka kui Mumuyo Mwele kahamba, “Ngakuana Wande, ui Mndumii menyi ruwehu na oruka, kipfa ili mbonyi-tsi utsiṟikie iwo waṟango na iwo waṟamtsu, kowuya idambuya shikoku; ee-wo Wande, na kiweekuchihie kihendeke kido.”

²² Kaindukia walya wa kiloshionyi kyake kahamba, “Shindo shose nyi njiledambikio nyi Wande, ma kuwode msa aichi ke Mana nyiupfo, shile na Wande, ma ke Wande nyiu, shila na Mana, na ichu Mana akundi imdambuya.”

²³ Kaindukia walya wa kiloshionyi kyake kyaanya kahamba, “Wungusu walya meso hawo hechiwona isho nyo muwonyi.

²⁴ Cha kipfa nyi ngamuwia; Waikimbi wafoi na wamangi nyi wawelangie wawone ishi nyo muiambuya, manya walashiwone, na iicho isho nyo mokeicho, manya walaicho.”

Mfanano fo Msamaria mcha

²⁵ Adi a ulya mndu mlaanyi o mawawaso kakure kacha imhesha namtewe kahamba, “Alewo Mlosha Mwaaria. Nyi wuda njiechiwika ngesa njikuoṟie-wo moo fo mlungana?”

²⁶ Nao kambia, “A ipfo wuwawasonyi nyi kii kiṟehie-pfo kida, nyi usomie-pfo kuda?”

²⁷ Nao kahaluo kambia, “Kunda Ruwa Mndumii opfo na ngoo yapfo yose, na mrima fopfo fose, na pfinya yapfo yose na makusaṟo hapfo hose, nowekunda na odoo chando ukundi moo fopfo kumonyi.”

²⁸ Yesu kambia, “Na ohaluo kisumhanyi, kewewuta kudo na ochikaa uwone moo.”

²⁹ Nao kakunda ikutana mcha asumhanyi kawia Yesu, “A odoya oko nyiu?”

³⁰ Yesu kamhaluo kahamba, “Nyi kuwekeri mndu alewuka Yerusalemu kesoka na Yeriko, katumukio nyi wasoki, wakamwatuo nguwo, wakamkapa, wakambika maṟishi, wakamda kinawo-nawo kyepfa na ikia.

³¹ Kyasia mkohanyi kasoka na njia iya-iya, alakusirie, kambona kaida kihadi wokusheṟuo.

³² Na mndu Mlewi nawo kashika-ho, kambona, kawekusheṟuo.

³³ Kyasia mndu Msamaria arie njia yake, kashika alyando ai, kambona, kamwichio wukiwa.

³⁴ Kasembelia kufui, kampfunga shifaṟe shilya na shidami, kaletsia-ho mafuda na mvinyio; kamwira kamdosia mhongo fo indo lilya lyake liwembawie, kamduo mbenyi ya wahenu kamwinduṟia-ho.

³⁵ Na ili lya ngama ngamenyi kakure nahende, kawuta dinaṟi tsiwi kainengia ulya menyi mba kahamba, ‘Njikanya imbawaṟa, na kokooya owutase kindo kya ngoseṟa, na njekutaa njimonyi ili njewuya.’”

³⁶ Yesu kambesa, “A wandu-wa waṟaṟu nyiu-ho awekeri odoe o ulya aletumukio nyi wasoki walya? Nyi ohamba kuda?”

³⁷ Nao kahamba, “Nyi ulya alemsaṟia ko.” Yesu kambia, “Henda-ng'u nowute kudo.”

Yesu aiṟikiṟa Marita na Maria

³⁸ Nawo wechichumia wadi na njia, nao kaida na kundu ko mṟinyi. Mndu mka umu, rina lyake nyi Marita kamwambia, kamduo kulya kanyi koke.

³⁹ Nao nyi awewode mana o mae elaho nyi Maria; nao kacha damia alya madendenyi ha Mndumii, kaadanyia madedo hake.

⁴⁰ Marita kapfuṟukana imtomboshanyia shelya, numa kacha na hafui kahamba, “A nyi kulaikusaṟa-wo Mndumii, ili manowama anjidea shindo ngapfuṟukana njimonyi? Kembie-wo nawewika-ho owoko loke lutomboshane kimu.”

⁴¹ Mndumii kamhaluo kambia, “Marita, Marita, kyapfo nyi uwodo nyi makusaṟo ha shindo shifoi na ikuwinyisha kowekuwinyisha.

⁴² Indi, kindo kiwaṟi nyi kimu tupu; Maria o nyi asangie-ho kiteeno kii kicha, nakyo ekaanakisoko adipfo.”