LUKA 1 - Bibilia Kui Mdedie fo Kimochi

Kitewe kya Luka iṟehia kitapu ki

¹ Kyamba wandu wafoi walewika mawoko hawo iṟehiya, mbonyi tsilya tsilewutika kunu kodu;

² Chando watsiludambikie iwo wawetsiwonyi matsika kuwoka, wawewei na wahidi wa kidedo-kyo.

³ Na inyi kilenjichihia, ngatumatuma mnu tsose kimatsa kimaenyi kyatso; njikukuṟehie wokikisa iyo Teofilo oko umichimbiṟe mnu.

⁴ Kundu nomanye owanzo lo mbonyi-tso uletsipfundo nlo lohi.

Ifeo lya Yohane Mpatisi

⁵ Kyasia matika halya Herode awei mangi ya kulya Yudaya, kuwei-pfo mndu mkohanyi amlahe rina lyake nyi Sakaria, ai o kambenyi lya Abia, na mkooke nyi o kishari kya wana wa waka wa Aron, nao rina lyake nyiwe Elisabeti.

⁶ Nawo wakawa wecha wasumhanyi ipfo sumuhana na Ruwa wawawi, wakahenda wechihendelia mawawaso hose na njopfundo tsa Mndumii tsose, ma walaṟatsie-ho kindo.

⁷ Wawewode manapfo, kipfa Elisabeti nyiwe mhumba, nawo wawawi nyi wawei waku.

⁸ Kyasia kamba lyake likashika lyehenda ṟunda shindo sha wukohanyi woke sumuhana na Ruwa.

⁹ Kakooyo nyi kamba lyake kui kido kya wukohanyi nahende pfo ipfaamiṟa opfaamo, kaida kulya hekalunyi lya Mndumii.

¹⁰ Mamwingi fulya fo wandu fose fukakaa nja fochiterewa Ruwa saa iya kochipfaamiṟo.

¹¹ Kawonekio nyi malaika o Mndumii kahoṟoka oo ora lo kulyo lo kitaṟa kyepfaamiṟia.

¹² Sakaria ambona kawa mkahai, kawado nyi wuowu.

¹³ Malaika ulya kambia, “Ma kulawowuo Sakaria, kyamba kiterewo kilya kyapfo nyiki kiidikie; na mkoopfo Elisabeti nyi echikaa nakufeeye mana o womi, na rina lyake nyi ochimlaha nyi Yohane.

¹⁴ Na iyo nyi ochiwado nyi sia na ikeseka, na iya mafeonyi hake wandu nyi wechiwuta-ho ichihio wafoi.

¹⁵ Kipfa nyi echikaa nawe mndu mnene ipfo sumuhana na Ruwa, elechinyo mvinyo ma kindo kyenanza, naweka amichuṟe Mumuyo Mwele kiwookia awuka wusunyi wo mae.

¹⁶ Nao nyi echihaluo wana wa Israeli wafoi-ho wawuye halukia Ruwa-chu Mndumii owo.

¹⁷ Na isonguo echisonguo ipfo mbele yake awode mumuyo fo Elia na pfinya yake, nakeimbeṟuo ngoo tsa wandee wa wandu tsiimbeṟukie wana wawo, na walya waapfinya wahalukie mhio fo wandu wai wecha wasumhanyi, nao kundu echiṟeheṟia Mndumii wandu wai wasungusie.”

¹⁸ Kyasia Sakaria kawia malaika alya, “Aka-wo kindo njemanya-wo nakyo ikyo nkyo kiki; kipfa njii mmeku namka oko nawei mku?”

¹⁹ Malaika kahaluo kambia, “Inyi nyi Gabrieli, njekehoṟoka sumhana na oshangu lo Ruwa, nao nyio anjiduma njiche ideda na iyo na ikushitsia mbonyi-tso tsiwode sia.

²⁰ Kipfa ili kulaidikya madedo hako nyi ochiwa pipi kulechiidima ideda mtano noshike mkonu fulya kyechikaa kiwutike chando ngakuwia.”

²¹ Na wandu waweiwedia Sakaria wakaṟihio kipfa lya alekaa ado kulya hekalunyi.

²² Kiheri alewuka na kulya nja, nalakiidime ideda nawo; wakamanyia nyi ammbona kiṟiha kulya hekalunyi; nao kawakemya na owoko, kakaa ai pipi.

²³ Kekimarisa mkonu iya ya iṟunda lilya lyake, kahenda kuwuuya na kulya kanyi koke.

²⁴ Naalyo shiheri shilya shamsia, mkooke Elisabeti kakapika, kaowa meri itanu kahamba,

²⁵ “Nyi wudo-ng'u Mndumii anjiwutia mfiri-yo imchihiye yenjiwuta wusutsu woko ipfo kiidi kya wandu.”

Ifeo lya Yesu lyahambo

²⁶ Meeri fulya fo kaṟandaṟu malaika ulya Gabrieli kadumo nyi Ruwa kundu ko mṟinyi fo kulya Galilaya, fumlahe Nasareti.

²⁷ Ko manowaka ashitsye, nao awemkose nyi mndu, rina lyake nyi Yosefu, o kisharinyi kya Dawidi, na mana ulya o waka rina lyae nyi Maria.

²⁸ Kyasia malaika ulya kaida na kulya mba, kahamba, “Ngakuiṟikiṟa iyo umsaṟie; Mndumii nakae na iyo, ui mwonyishe kota waka wengi.”

²⁹ Nao kauma mkahai kipfa kya kidedo kilya, kasaangia kipfa kya kiiṟikiṟo kilya ke nyiwee kya iki.

³⁰ Malaika kambia, “Ma kulaowuo Maria; kipfa nyi kulewona osu ko Ruwa.

³¹ Ambuya, nyiochikapika, nofee mana o womi, na rina lyake nyi ochimlaha nyi Yesu.

³² Nao nyi echikaa nawe mndu ang'anyi, nawelaho nyi ai mana o ichu ai huye ya shindo shose, na Mndumii-Ruwa nyi echimnenga kitima kya wumangi kya ndee Dawidi.

³³ Nao nyi echikaa ai mangi ya oshari lo Yakobo mlungana, ma wumangi woke woikaa wudumbukepfo!”

³⁴ Maria kawia malaika ulya, “A kindo-kyo nyi kyekaa kiwe kida, ili njilawode mii?”

³⁵ Malaika kahaluo kambia, “Nyi Mumuyo Mwele echikusokia ipfo huye yapfo, na pfinia ya ichu ai huye ya shose nyi yechikuwikia mṟishe. Kyainenga kilya kyekaa kifeo kilaho nyi kyele, kii Mana o Ruwa.

³⁶ Ambuya na mshari ulya opfo Elisabeti nao nyiawekupfungie lya mana o womi lya wuku woke, na meri-fu mfo kaṟandaṟu amkapika, ulya awemlahe mhumba.

³⁷ Kipfa ko Ruwa kuipfo kindo kilemie iwutapfo.”

³⁸ Maria kahamba, “Ambuya nyi njikukerie iya njii kisinga kya Mndumii kiwekunji-wutikia chando owehamba.” Kyasia malaika ulya kalekana nao.

Maria ahenda iiṟikiṟa Elisabeti

³⁹ Mfiri iya naalyo Maria kakure kaangusha ihenda kudooya na kulya mafumvuhu, nahende shika kulya mṟinyi fo Yuda.

⁴⁰ Kaida na kulya mba ko Sakaria, kaiṟikiṟa Elisabeti.

⁴¹ Naalyo Elisabeti kekiicho kiṟikiṟo kilya kya Maria, mana ulya katoolatoola ipfo wusunyi koke. Elisabeti kaichuṟo Mumuyo Mwele.

⁴² Kakoṟoṟoma na ṟu ling'anyi kahamba, “Wungusu iyo umbikie mboṟa iidye ya waka wose, na iki kyekaa kifeo ipfo wusunyi wopfo na kiwekiwikie mboṟa.

⁴³ Ale kindo-ki ng'ku kyambukia, itane mae o Mndumii oko akuchea na kunu koko?

⁴⁴ Keambuya, lilyandi ṟu lya kiiṟikiṟo kyapfo lyaida kunu madunyi hako, mana-chu katoola-toola amkesi kunu wusunyi koko.

⁴⁵ Wungusu icho alekuidikia shilya alewio nyi Mndumii ke nyishekaa shihoye!”

Kiimbo kya Maria

⁴⁶ Naalyo Maria kahamba, “Mrima foko foadapfuma Mndumii.

⁴⁷ Na mumuyo foko fukakesekia Ruwa ai mkiṟa oko.

⁴⁸ Kipfa kya ili ameambuya wufafa wo kisinga kyake. Ambuya wokia wulalu marika hose hechianga monjisendia osu loko.

⁴⁹ Nyi ili ichu menyi pfinya amenjiwutia shindo shing'anyi; na rina lyake li-yele.

⁵⁰ Na isaṟia lyake nlyechikaa mtano marika na marika; ko walya wamwowoye.

⁵¹ Nao nyi awutie ngata sa njiyapfinya na kuwoko loke; karahanyitsa walya wakuirinyishie ipfo mahionyi hawo ha mrima yawo.

⁵² Nyi akumbalye waapfinya ipfo maloṟike-hu hawo; kadosya-ho wafafa.

⁵³ Wawodo nyi njaa nyi awaihutsie shindo shicha; na wasuṟi kawasama wulya.

⁵⁴ Nyi airie mana oke Israeli nakutamuye isaṟia.

⁵⁵ Na chando ewewia waku walya wadu, Abrahamu na oshari loke mlungana.”

⁵⁶ Kyasia Maria kakaa nao handu ha meri iṟaṟu, numa kawuya na kanyi koke.

Ifeo lya Yohane Mpatisi

⁵⁷ Kyasia Elisabeti maheri hake hefee hakashika, kafee mana o womi.

⁵⁸ Wandu walya wa mṟasa foke na wa kishari kyake wekiicho ke Mndumii amemnetseṟa ado, wakawado mnu nsia.

⁵⁹ Ili mfiri fo nyanya wakacha napfo idina kimana kilya, wawekundi na ikidumbuya rina nyi Sakaria cha lilya lya ndee.

⁶⁰ Mae kahaluo kahamba, “Ote-ko! Nalaho rina nyi Yohane.”

⁶¹ Nawo wakambia, “Kuwode mndu o kishari kyapfo ekelaho rinalyopfo.”

⁶² Nawo wakakemia nde ke nyi rina lihya akundi nalaho.

⁶³ Nao kakuwesia kiṟaṟo kyeṟehia; kaṟehia-ho, rina lyake nyi Yohane. Wakaṟihio wose.

⁶⁴ Naalyo tichi dumbu lyake likawuya tambalahaluka na olimi loke naawo, kadeda kechikuidapfumya Ruwa.

⁶⁵ Na wandu walya wa mṟasa fowo wakahoyo nyi wuowu wose; na mbonyi-tso tsikadung'ana kulya mafumvunyi ha Yudaya kose.

⁶⁶ Na walya waleicho wose wakatsiwika ngoonyi wakahamba, “A mana-chu nekaa nawe ada wai?” Cha kipfa lyandi kuwoko ko mndumii kuwei nao.

Kiimbo kya Sakaria

⁶⁷ Na Sakaria ulya ndee kaichuṟo Mumuyo Mwele kahamba kisuku kya Ruwa kahamba,

⁶⁸ “Kuhende kochikuidapfumyo Mndumii-chu ai Ruwa o Israeli; nyi ili indi amsahia wandu wake na ikuwawonyiia okiio.

⁶⁹ Nao nyi ameluṟihichia ombe lo oletso; ipfo mbenyi ya mana ulya oke Dawidi.

⁷⁰ Na chando awehambie na madumbu ha wadedi walya waele kimatsa kacha mṟamna.

⁷¹ Ke naluwonyie oletso lo mesa hadu; na lo owoko lo walya walusuo wose.

⁷² Ke nawikie waku walya wadu osaṟio; na ikutamuya mkundana fulya foke mwele.

⁷³ Nyamu iya elelia ndeadu Abrahamu; kundu naluinenge,

⁷⁴ Lukaae lui waletse owoko lo wakituwa wadu, lulai na wuowu.

⁷⁵ Luwehenda lochimhidia na wuele na wucha wusumhanyi ipfo oshangunyi loke mandi-ha lui na moo mafiri hose.

⁷⁶ Na iyo mkoku nyi ochikaa nolaho nyi ui mdedi o ichu ai huye ya shose; kipfa nyi ochisonguo ipfo mbele ya Mndumii, nohende kochisungusia njia tsake.

⁷⁷ Nokeinenga wandu wake wulaanyi womanyia okiio; ili wechileheṟo manyamaṟo hawo.

⁷⁸ Kipfa kya isaṟia lya mrima fo Ruwa odu; nalyo nyi lyechiluinenga isahio nyi madoenyi ha huye.

⁷⁹ Hahende waaya walya wadamie meemenyi na maṟishenyi ha opfu; kundu madende hadu hahende isumuhantsyo ipfo njiehu ya ofoṟo.”

⁸⁰ Kyasia kimana kilya kikang'ana-ng'ana, kikahenda kyechiwada pfinya ipfo mumuyonyi fokyo, nao kahenda kukaya kundu ko nuka kukatana koshika mfiri fulya echa kuloṟa na wandu wa Israeli.