KOHELETI 9 - Bibilia Kui Mdedie fo Kimochi

¹ Kipfa kya isho shose, ngawewika mrima foko ishiha-shiha kya ishi; ke wandu wa wusumhanyi, na wawode wuṟango hamu na mawuto hawo, wai mawokonyi ha Ruwa; kiwe ikunda ang'u isuo, mndu aichipfo; shose shawaida.

² Shindo shose shawahoya kimu shiṟinganyi; kuwode kindo kimu kekekooya ulya asumhanyi na ulya alasumhanyi; ko mndu ai mcha na ulya mmbicho; ko mndu mharami na alai mharami; ko ulya ekedasa na ulya alakedasa; chandu kui mndu mnyamaṟi na wudo na o wusumhanyi; ulya molya nyamu na ulya aowoye nyamu.

³ Iho lyo lii kiidi kya shindo shilemewutika iya orukenyi, ke wose wawode kindo kimu kekewatumukia; ee da, ngoseṟa mrima ya wandu wose iichuo mkika, na waṟumu na wusuko wui kiidi kyawo ilyi mandi wai na moo numa wekehenda ko wapfu.

⁴ Kipfa kuwode kikusiriyo ko ulya awadanyi na walya wai na moo; nanga kite kii na moo kota miso fupfu;

⁵ Kipfa walya wai na moo waichi ke wechipfa; indi wapfu waichi kindo kyose pfo, ma kikusiriyo wawode pfo; kipfa ngumbuo yawo yose ilemehadimika.

⁶ Ikunda lyawo na isuo lyawo, na ngafu tsawo shidekie shose handu hamu; ma wawode kita ko kindo kyose kyechiṟundika iya orukenyi pfo.

⁷ Iyo kuhendiye, nokulyiiye kando kapfo na sia, uwenyo mvinyo fopfo na ngoo njilalutsu; kipfa Ruwa amewikia mboṟa maṟunda hapfo.

⁸ Maṟao hapfo haile mkonu yose; manya mndo fopfo fulawuṟe mafuda.

⁹ Ukukaye na sia na mka chu opfo umkundi mkonu yapfo yose ya ngataṟa, umiinenge, kipfa ikyo nyi ohawi lopfo mkonu yose ya moo; na kiidi kya mawina hapfo ulewinyia iya wuyana.

¹⁰ Kyose owoko lopfo lochiidima iṟunda, ṟunda na pfinya tsapfo tsose, kipfa kuwode iṟunda, ma chila, ma wuṟango, ma wulaanyi ipfo waṟumu kundu ukeri ihenda iyopfo.

Ngataṟa yekecha faṟa

¹¹ Ngawuya ngaambuya kunu wuyana, ngawona chi wose wekewikia mteeṟa wakawa wawinzi pfo, ma chi waapfinya wekewinga shidenyi pfo, ma chi waṟango wekewona kando pfo, ma chi wandu waichi wekewona masaa pfo, ma wandu waaria wakundikepfo; indi kiheri kya osu kekeshikia wose.

¹² Kipfa mndu o wandu aichi kiheri kyake pfo; chando makunga hawado kiidi kya mdeho njiwicho, cha kilehe kyawado mdehonyi, kyasia na wandu nawo wekewado kiheri kiwicho ili kyawahoya wose.

¹³ Kyasia ngawewona wuṟango iya orukenyi, nawo wuwei wudi, koko inyi ndewona nyi idedo ling'anyi.

¹⁴ Kuwewode mṟi mtutu, kiidi kyafo kuwewode pfo wandu waangu; kukacha napfo mangi ang'anyi huyafo, kafutengetia kawika omombo lung'anyi kundu nafukape.

¹⁵ Kyasia kukawonekapfo mndu mkiwa mṟango, kui wuṟango wulya woke kakiṟa mṟi fulya; indi ma kudo kuwode alekumbuo mkiwa ulya pfo.

¹⁶ Nlyondi njilehamba, Nanga wuṟango kota pfinya; inding'u wuṟango wo mkiwa wokepiṟo, ma madedo hake hekeadanyi opfo

¹⁷ Madedo ha wenyi wuṟango hakadedo ko osaaṟe hekeichio kota kifahyo kya mchili kiidi kya matondo

¹⁸ Wuṟango wuidiye shisha sha shida; Indi mdeko umu nekenyamaṟa mecha hafoi.