KOHELETI 8 - Bibilia Kui Mdedie fo Kimochi

¹ Nyiu ai cha mndu mṟango; nyiu aichi itambahaluo idedo? Wuṟango wo mndu wochiwaṟa kyamu kyake, Na wuumu wo kyamu kyake wochiilachika.

India Mangi

² Inyi ngahamba njidi, wada iwawaso lya mangi, kipfa nyi ulelya nyamu ya Ruwa.

³ Uladimedime iwuka oshangunyi loke; kulaengeṟe iwuta owicho, kipfa o nekewuta kilya kimchihiṟie.

⁴ Kipfa idedo lya mangi nyi liwode pfinya; nyiu echiidima iwia icho nkiki uiwuta?

⁵ Mowada wuwawaso aichi idedo liwichopfo; mrima fo mndu mṟango fuichi kiheri kya mwaanduye.

⁶ Kipfa orio kisanzio kuwode kiheri kya mwaanduye; kipfa wulemeri wo mrima fo mndu wui huye nyi wung'anyi;

⁷ Kipfa aichi shechikaa shihoyepfo; nyiu echiidima immbia chandu kechiwa?

⁸ Kuwode msa awode pfinya na ngoo naidime iimapfo Ma awode pfinya mkonu fo opfupfo; Ma kuwode iinengo momu kiidi ya ngapano iyapfo; Ma wuwicho wochiidima ikiṟa ulya awuichiwiepfo.

Wawicho na Wahendelyi

⁹ Isho shose ndeshiwona, ngawika mrima foko kiidi kya orio iṟunda wanda ya mnengeṟi. Kuwode kiheri mndu awode pfinya huye ya manomae indi nyi kui wukiwa woke.

¹⁰ Ngawewona wawicho wechiṟiko wakashitso ṟungunyi; na walya wewuta mecha wakairo handu haele wakahadimo mṟinyi. Ho, isho shose nyi maai na maai.

¹¹ Kipfa mwaanduye fo kindo kiwicho fochishika owinyi pfo, mrima ya wandu yekeṟingishiyo kiidi kyawo kundu wawute mawicho.

¹² Manya mndu mnyamaṟi kawuta mawicho ka ihana, kaengeṟa mkonu yake; indi ma kudo njiichi kui lohi ke kyechiwa nanga ko walya waidikie Ruwa, wai wecha koke;

¹³ indi kechiwa nanga ko wawicho pfo, ma echiengeṟa mkonu yakepfo, kipfa ikeri cha kiṟinje, kipfa alai mcha sumuhana na Ruwa.

¹⁴ Kuwode wuwicho wuwutikie wuyana; ke kuwode wewuta sumuhana, wakatao cha wewuta mawicho; kuwodese wawicho wakatao cha wasumuhanyi. Na inyi ngahamba isho shose nyi maai.

¹⁵ Ngawuya iṟumisha sia, kipfa mndu o wandu awode idedo lyose licha shia mnengeṟi kota ilya pfo, na inyo na iseka; nawekukaya nasho shii shake mkonu yose amneenge yekaa iya wuyana, ainengo nyi Ruwa.

¹⁶ Inyi lilya njilewika mrima foko imanya wuṟango na iwona wuṟundi woko iya wuyana kipfa kuwode elekelaa mfiri ma kio;

¹⁷ Kyasia ndewona maṟunda hose ha Ruwa hechiwa isonjokoṟo nyi mndu o wandupfo, kipfa mndu o wandu ma kakulisa wukiwa kundu namanye echiidima pfo, ma ulya ai mṟango kakusaṟa ke naichi mao echiidima iiwona pfo.