KOHELETI 7 - Bibilia Kui Mdedie fo Kimochi

Madedo ha wuikimbi harianyi na ohendo lo moo

¹ Nanga kiṟumi kicha kota mafuda hepfaama mecha; Na mkonu fopfa kota mkonu fofeo. Nanga ihenda mbenyi ya kilio.

² Kota mba ya kando kipfa ifo nyifo mtsitsionyi fo wandu wose, na icho ai na moo nechiwada mbonyi tso na mrima foke.

³ Nanga ikuinadia kota iseka, kipfa fowa ya kyaamu nyi kiira kya mrima.

⁴ Mrima fo ichu ai mlaanyi fui mmbenyi ya weauka, indi mrima fo tondo fui mbenyi ya kando.

⁵ Nanga iicho ikekedio lya mndu mlaanyi, kota iicho kiimbo kya tondo.

⁶ Chando msha yekeraha safuria, na wudo tondo lyekeseka. Isho shose nyi wulya.

⁷ Nyi lohi wulang'a woketondosha ulya mṟango, Na itsutsuma lyikanyamaṟa imanya.

⁸ Nanga ifurumia lya idedo kota mawookionyi, Na motirisia mrimenyi kota ngoo ya orikiki.

⁹ Kulakambiṟe isuo mrimenyi fopfo, Kipfa nyashi ya tondo ii kipetehu kyake.

¹⁰ Ma kulahambe, kimaduma mkonu iya ya kacha ileida nki? Kipfa chi owesa kui wuṟango pfo.

¹¹ Wuṟango wui wucha cha kyooṟa; Ee da! Wui wucha cha wewona mnengeṟi.

¹² Kipfa wulaanyi nyi wuringi, chandu fesa ii wuringi; na wulalutsu wo wuṟango nyi wudo na wulaanyi wui ko ulya awuwode.

¹³ Kusaṟe mnu iṟunda lya Ruwa; kipfa nyiu ulya echiidima ihoṟotsa kilya Ruwa amonyi akilemie?

¹⁴ Kiheri keiṟimiṟa chihio, Na mkonu fo kiwi ukusaṟe. Ruwa nawikie shoshe shing'ang'ane kundu mndu o wandu nalaidime imanya idedo lyose lyechiituma numa.

¹⁵ Mbonyi tso tsose ndetsiwona kiheri kilya kyesingia wulya, kuwode msa asumuhanyi adekie kiidi kya wusumhanyi woke, kuwewode na mndu mbicho aengeṟie ohendo loke lo moo kiidi kya wuwicho woke.

¹⁶ Kulawe na wusumhanyi ueṟe; Ma kulakuengeṟie wuṟango mnu;

¹⁷ Kyaindi, ulawe mnyamaṟi ielewetsie; manya kulawe tondo! Nkili ukundi ipfa kiheri kyapfo kilameshike?

¹⁸ Kikuwaṟi noindie idedo lyo lya kuwoka, na lilya lya kawi da; cha kipfa kuoindia Mndumii-Ruwa nochihuyo.

¹⁹ Wulaanyi woketana mndu awode wuṟango nawade pfinya kota waitoṟi ikumi wa mṟinyi.

²⁰ Kya lohi, kuwode mhendeli kunu wuyana sa ekewuta mecha kiheri kyose alawute wunyamaṟi malepfo.

²¹ Manya kulaadanyie na iwika mrimenyi madedo hose hekededo nyi wandu, kundu kulaicho mṟundi opfo kekuruma.

²² Kipfa kiheri mrima fopfo fuichi ke iyo kumonyi ulemeruma wandu wafoi.

Iterewa wulaanyi

²³ Ngawehesha isho shose ko wulaanyi; ngahamba: “Inyi njikundi iwa mndu awode wulaanyi?” Kyaindi wulaanyi wukeri kuleshe mnu na inyi.

²⁴ Nyi kuda mndu echiidima imanya kitewe kya ohendo lo moo foke; kindo kyo nyi kikilemeri na kikiumu kudo!

²⁵ Manya kudo, njilelanga imanya na iṟisa iwalia wulaanyi na kitewe kya mbonyitsiipfo, na ngoseṟa imanya wunyamaṟi nyi kindo kya mai, na wutondo nyi uwaṟumu.

²⁶ Kindo kimu njilechaimanya, kii kiwicho na ielewetsa kota opfu, nyi mndu mka sa mrima foke nyi mdeho na maraushi na mawoko hake nyi cha mshe. Kyaindi mndu ulya mochihiṟa Mndumii-Ruwa, nechikurisa na mndumka cho, na ulya ai mnyamaṟi nechiwado mdeho nao.

²⁷ Ishi njikuwia nyi Moonguo mbonyi, nyipfo njilecha imanya kiheri kya iṟisaṟisa lyako litutu litutu.

²⁸ Njilelanga imanya mbonyitso orio kiheri, kyaindi njileidima imanyapfo. Kiidi kya wasoṟo kiku kimu (1,000), njileidima iwona msoṟo umu sa awewaṟi iindiopfo.

²⁹ Ambuya, ngamanya kindo ki kimu; ke Mndumii-Ruwa nalewumba wandu waele, kyaindi wandu wo wawenyi walekuendie mawina.