KOHELETI 6 - Bibilia Kui Mdedie fo Kimochi

¹ Kuwode na ṟiho lyiwicho ndeliwona iya orukenyi nalyo lilemiye wandu wose;

² Mndu amwinenge nyi Ruwa masaa na ngoseṟa, na kiṟumi, nalawone kechituṟa kindo kyose kiidi kya mrima foke, kiidi kya shose alangie, indi Ruwa nalamnenge ilya, kyaindi mhenu kalya. Isho nyi wulya nakamu na ndaaṟe njiwicho.

³ Mndu kafee wana ihana, kakaa maka ifoi mnu kyaindi nalawade sia ma mfiri fumu, na kya ngoseṟa katuṟa momṟika, inyi njiwonyi nanga ulya alenyamaṟikia wusunyi kota o;

⁴ kipfa isho nyi wulya na maai, nyi ai meemenyi na meema fumshikie.

⁵ Kipfa alewona ngela ya mnengeṟi pfo ma wucha wofo; nanga kota mmeku cho;

⁶ ee da, ma kawekaa maaka kiku kawi alakeseke kui mecha, ngesa wechihenda kimu?

⁷ Iṟunda lyose lya mndu nyi kui dumbu lyake ma kudo moo foke fokeihuda-pfo.

⁸ Kipfa mndu mṟango nyi kiki echiiriaho kota tondo? Ang'u mkiwa nyi kiki awode kota icho aichi ihenda oshangunyi lo iwo wai na moo?

⁹ Nanga iwona na meso kota irangia rangia kui lango, isho nasho nyi maai.

¹⁰ Nawe kindo kyose na namlahe rina lyake wokia kacha, nao namanyikiye ke nyi mndu; nao echiidima ilimbana na ichu awode pfinya kota o amonyipfo.

¹¹ Nahong'u kyamba kuwode shindo shifoi sheengeṟa wukiwa na wulya, mndu nyi kiira kiki awonaho?

¹² Kipfa nyiu aichi shii shicha sha mndu o wandu kiidi kya ohendo lo moo foke iya wuyana cha mṟinjenyi? Nyiu echiidima iongoya mndu o wandu shindo shechiituma kamewuka iya wuyana?