KOHELETI 5 - Bibilia Kui Mdedie fo Kimochi

Wika kyasa ko ikuṟisa

¹ Ringa kudende kopfo ili uihenda mba ya Ruwa; Nyi necha itikiria kundu uicho kota iwuta kidaso kya matondo. Iwo walaichi ke waiwuta kiwicho

² Kuladede madedo ha wusembo kui dumbu lyapfo ma mrima fopfo fulawe mwangu ideda oshangunyi lo Ruwa: Kipfa Ruwa nyi ai ruwehu, na iyo nyi iya wanda ui, ko ikyo madedo hapfo hawe maangu.

³ Kipfa ndodo tsekecha kipfa kya maṟunda hafoi; na ṟu lya tondo kui madedo hafoi.

⁴ Iyo kowikia Ruwa kyaasa kulakeleo ikiwuta, kipfa o ekechihiṟo nyi masembo-pfo; koikyo wuta ikyo ulewika kyaasa.

⁵ Nanga koda kulateṟia, kota iteṟia kulainutsie.

⁶ Kulalekie dumbu lyapfo lidetse mbihu fopfo; ma kulahambe oshangunyi lo malaika-cho ke nodekio; kitewe Ruwa nasukio nyi ṟu lyapfo nki, na inyamaṟa iṟunda lya mawoko hapfo?

⁷ Kipfa nyi wudo kii mfoeṟa fo ndodo nyi wulya, na madedo hafoi; indi iyo owuo Ruwa.

Moo fo wanda ii nyi wulya

⁸ Ma chando uwonyi mkiwa aiwonyio, na mwanduye na wulohi ifurunjo kui kinyala kya kihongo, kulaṟihisho nyi isho kipfa, Ai huye kota wai huye naambuya, Kuwode sa wai huye kota iwo.

⁹ Kyaindi hamu na isho, kiira kya oruka nyi mangi eketambahanyia mnu wasoṟo wake kipfa kya dema.

¹⁰ Mokunda fesa echiihuda fesa-pfo Ma mokunda kilula echiihuda shilimu-pfo. Isho nasho nyi maai.

¹¹ Masaa hakafo na welya wawefo; na menyi osho nechiiriaho ki, sile nyi iambuya na meso hake tupu?

¹² Mado ha mndu o mṟimo hekeloda, ke nalya kiangu ang'u nalya kishikiye; indi iihuda lya msuṟi lyemleka nalae adi mado-pfo.

¹³ Kuwode na ṟiho lyiwicho ndeliwona iya orukenyi, nyi mndu alekuotoya kasanyia masaa hafoi mnu,

¹⁴ na masaa ho hakadekadeka alaichi chandu kyawa; nao kokoya Ruwa namsumbiye mana, alawade kindo kii mawokonyi hake.

¹⁵ Chando alewuka wusunyi wo mae nechihendase kitaṟe chandu awecheiye, nalaidime isambuo kindo kyose kui owoko loke naidime ma ikiduo.

¹⁶ Ikyo nyi kindo kiwicho mnu nakamu ke chando alecha na wudo echikuhendya, nao nyi kiira kiki airaho icho alelya wukiwa na itambahana kya wulya?

¹⁷ Mkonu yake yose nyi ilia meemenyi na mawawio hafoi na okuchukuchu na ndaaṟe.

¹⁸ Ambuya inyi njilewona kindo kicha kiwaṟi nyi mndu ilya na inyo, na ikeseka kya maṟunda mecha aṟundie kunu orukenyi mfiri yake yose aleinengo nyi Ruwa kipfa ilo nyi ohawi loke.

¹⁹ Kingi-se kui mbonyi ya mndu o wandu ichu Ruwa amneengie masaa na ngoseṟa kamtarama kalya-ho kitutu na iambia ho ohawi loke na ichihiyo kyasho, iwo nyi wueri Ruwa amsumba.

²⁰ Kipfa mndu echikumbuo mnu mkonu yake pfo; kipfa o Ruwa naidikyana na sia ya mrima foke.