KOHELETI 3 - Bibilia Kui Mdedie fo Kimochi

Ruwa naṟeheṟie orio kindo

¹ Orio kindo kiwode kiheri kyakyo Na kiheri na kitewe iya wanda orukenyi.

² Kiheri kefeo, na kiheri kepfa; Kiheri kewaaya, na kiheri kyesambuo;

³ Kiheri kewaaha, na kiheri kechiṟa; Kiheri kewunduo, na kiheri kewika mba;

⁴ Kiheri kefihiṟa, na kiheri keseka; Kiheri kya fowa, na kiheri kechihiyo;

⁵ Kiheri kekumba maho, na kiheri kesanyia maho; Kiheri kechunguṟia, na kiheri keda ichunguṟia

⁶ Kiheri keshiha, na kiheri kedetsa Kiheri keleṟia, na kiheri kekumba;

⁷ Kiheri keranduo, na kiheri kepfuma kiheri ketsia, na kiheri kededa

⁸ Kiheri kekunda, na kiheri kesuo Kiheri kya shida, na kiheri kya ofoṟo.

⁹ Ngesa mowuta nawode kiira kiki na shilya aiwina nasho.

¹⁰ Njilewona ngataṟa Ruwa ainengie wandu kundu walye wukiwa.

¹¹ Orio kindo nakitanye kicha kui kiheri kyake, kawewika mlungana kiidi kya mrima yawo, indi chando mndu o wandu alechiidima itambahaluo iṟunda lya Ruwa akeri iliṟunda, wokia mawookionyi itano mafurumionyi.

¹² Inyi njiichi kuwode kicha kowo kiidie ichihiyopfo ma iwuta mecha kipfa wai na moo.

¹³ Nyi kisumbo kya Ruwa ke orio mndu nalye na inyo na ikesa kya maṟunda hake hose ahawinyie.

¹⁴ Njiweichi ke orio iṟunda lya Ruwa lyechikaa mlungana; kechiwa iengeṟa kindo-pfo, ma ikinyiiṟa-pfo; na Ruwa nalewuta kudo kundu wandu wamuindiye.

¹⁵ Shilya shiipfo shiweipfo; na isho shechikaapfo nyi shamekaapfo; nao Ruwa naishiha shilya shilemeida.

Wutuṟi wo wuhendelyi wuyanenyi

¹⁶ Ngoseṟa ya isho ngawewona se handu ha mwaanduye kuwode ho deko, na handu ha lohi kuwode iwonyio.

¹⁷ Ngahamba mrimenyi, Ruwa nechianduo kya walya wasumhanyi na walya walasumhanyi kipfa kuwode kiheri cha ikyo ko orio iṟunda.

¹⁸ Ngawehamba mrimenyi nyi kipfa kya wandu, kundu Ruwa nawaheshe, wakuwone wawenyi ke wafananyi na mando ha nja.

¹⁹ Kipfa kilya kekehoya wandu kekehoya mando ha nja; kindo kimu kekewahoya, chandu ichu ekepfa na ichu naawo, wose wawode mṟufu fumu; ma mndu o wandu awode kindo kiidiye indo lya nja pfo kipfa mao nyi maai.

²⁰ Wose wekehenda handu hamu wekewuka kilulinyi wakawehaluka kiluli.

²¹ Nyiu aichi kokoya mumuyo fo mndu fokehenda huye, na mṟufu fo indo lya nja fokehenda wanda?

²² Na wudo ngawewona kuwode kindo kicha kota mndu ichihiyo kya maṟunda hake pfo; kipfa nyi mooko foke; kipfa nyiu echimbihiṟa se nawone isho shechimwituma numa?