KOHELETI 2 - Bibilia Kui Mdedie fo Kimochi

¹ Ngawia mrima foko, wulalu njechikuhesha na sia; nahong'u ikuchihiṟe na sia na seko. Ambuya nasho shikawa maai.

² Ngahamba kirianyi na seko, nyi waṟumu; na sia, yatarama ki?

³ Ngawekusaṟa mrimenyi foko chando njechichihiṟa mbihu foko na mvinyo na ngoo yako ikawenjisongoya kiidi kya wuṟango iwadana na wutondo, mṟasa njiwone shilya shicha shiwaṟi wandu, kundu wawute isho mkonu yose ya moo fowo aa wanda.

⁴ Ngaṟunda maṟunda manene, ngawika mba tsako, ngawada dema ling'anyi lya msabibu;

⁵ ngawada shiahu shifoi ngadonga pfo mashidi ha ndunda tsa mbaṟi tsifoi,

⁶ ngawewika na nduwa tsa mṟinga tsinose mashidi halya matutu.

⁷ Na inyi ngahuṟa masinga na masinga waka, ngawada oshari lung'any kanyi koko; ngaingiki masaa, mmbe na machondi, kota walya wose wawenjisongoye kiidi kya Yerusalemu;

⁸ kyasia ngawesanyia fesa na sahapu, na okisa lo kimangi shiwukie shihongonyi kose. Ngawewona-pfo na waimbi wa maṟu, wa kiumi na wa kika, na walya wai walange nyi wandu, na waka wa mbai wafoi mnu.

⁹ Nahong'u ngang'ana ngaengeṟeka ngaida wose wawenjisongoye kiidi kya Yerusalemu, ngawekukaya na wuṟango woko.

¹⁰ Njileima kindo ma kimu meso hakopfo; manya mrima foko njilefuima sia fuwelangie-pfo; kipfa mrima foko fulekeseka kya maṟunda halya hose haletano nyi mawoko hako, kipfa iṟunda liwei ohawi loko.

¹¹ Ngawuya ngaambuya maṟunda hose njileṟunda na mawina hako hose, ate shose nyi maai na maai, kuwode ho kiira iya wuyanapfo.

¹² Ngahaluka kundu njitambahaluo wuṟango, waṟumu na wutondo. Mndu aosha mangi nawute ada? Lyo lyii itane naalyo.

¹³ Kyasia ngawona wuṟango wuidiye wutondo, chando sa iidiye meema,

¹⁴ meso ha mndu mṟango hai mdohu koke, kyaindi tondo lyehenda meemenyi, indi ngamemanya ke kuwode kindo kekewawonekia wose kifananyi.

¹⁵ Ngahamba mrimenyi foko; kilya kekekooya tondo nakyo kenjikooya inyi, a wulalu kitewe njiwade wuṟango ngoseṟa nki? Ngawehamba kunu mrimenyi - isho nasho nyi wulya.

¹⁶ Kipfa kuwode ngumbuo ya mndu awode wuṟango ang'u ya tondo yechikaa mlungana-pfo. Kipfa mafiri hawo hakameida wechihadimika wose. Na ulya mṟango nechepfa cha tondo.

¹⁷ Kyasia ngasukio nyi moo, kipfa orio iṟunda ndelitana likanjiwichuya, ke orio kindo nyi wulya na maai.

¹⁸ Inyi ngasuo iṟunda lyose ndelitana na ikulisa nalyo wukiwa; kipfa nyi kinjiwaṟi njideeye icho echa numaako.

¹⁹ A nyiu aichi ke ichu akeri icha nyi awode wuṟango ang'u nyi tondo? Ma kudo nechichilya huya maṟunda hako hose ndewina naho, kiidi kyako inyi njileloṟa wuṟango woko kunu orukenyi. Na isho nyi wulya na maai.

²⁰ Ngahaluka ngalehela piu mrimenyi njechisumukiya kya ikuwinyisha na maṟunda kunu orukenyi.

²¹ Kipfa kuwode mndu maṟunda hake nyi kui wuṟango, kui mahio, kui wuaria; nao nechideeya mndu alahawinyie manya kitutu. Isho se nyi wulya na wukiwa wulechiwa ihamba.

²² Kipfa mndu nyi kiki ekewona ho kui iṟunda lyake lyose, na itambahana lyake iya orukenyi.

²³ Kipfa mkonu yake yose nyi fowa na iṟunda lyake naalyo, ma kalaa kio awode sia-pfo. Isho nyi wulya na maai.

²⁴ Mndu o wandu awode kicha kada ilya na inyo, na iwihiṟia moo foke na shicha kiidi kya iṟunda lyake-pfo. Isho shiwukie owokonyi ko Ruwa.

²⁵ Ngesa nyiu echiidima ilya na iwihiṟia mrima foke moo kanjikooya?

²⁶ Kipfa Ruwa nekeinenga ulya amchihiṟie wuṟango, wulaanyi na sia; indi mdeko nekemneenga wukiwa, kasanyia na iwika kikumbinyi kundu nainenge ichu Ruwa amteseheṟiye. Isho nasho nyi wulya na maai.