KOHELETI 12 - Bibilia Kui Mdedie fo Kimochi

¹ Kumbuo ichu mokuumba maheri ha uwanake wopfo, Ilyi mandi kulamecha mkonu ii njiwicho kulameafukia maaka ochihamba, Inyi njiwode sia kiidi kyayo pfo.

² Ilyindi mnengeṟi na sa na meri na nyenyeri shilamewa meema, mapuchi halamewuya numa ya mvuo.

³ Mkonu iya waringi wa mba wechidedema; Mandi ho wenyi pfinya wechihongoma; Na waka wesa wechitsitsa kipfa nyi waangu na iwo weambuya matiṟishenyi wechiwa meemenyi;

⁴ Mongo yechishingo kiidi kya njia tsing'anyi; Ṟu lya kiuṟi ilyi lyechiwa lyitutu; Mndu iowesho nyi ṟu lya kilehe; Na wana wa waka waimbi wechinyiiṟo,

⁵ Ee wechiowuo kikuiriye; Shindo sheowesha shechikoyo njienyi, na ikidi lyechiwaa shiwaṟo, Ndatari yechilemia; na kiwasi kilakewawa kechiduika; Kipfa mndu nahendia mba yake ya mlungana; Na wekapa shilyio watengeta njienyi;

⁶ Ilyi mandi orusu lo fesa lulamedumbuka; ang'u kitela kya sahabu ipaṟika; ang'u nungu ya mṟinga ipaṟikiya nduwenyi; ang'u oṟo yedosa mṟinga nduwenyi

⁷ Na kiluli iwuuya teri chandu iwei na mumuyo iwuya na ko Ruwa alefuwuta.

⁸ Moonguo nahamba, nyi wulya wung'anyi; shose nyi wulya

Madedo hefurumia

⁹ Kyaindi kipfa moonguo awewode wulaanyi, nekeengeṟa ilosha wandu wuṟango; ee, kahia, kashiha-shiha na ilosha njoṟayo tsifoi.

¹⁰ Moonguo chu kashiha-shiha kundu nawone madedo hechihiṟa, na halya hamaṟehie necha, madedo ha lohi.

¹¹ Madedo ha walaanyi hafananyi na heolongia; cha msumari yekapia na iwadia kindo, nyi wudo wakeri walya madedo hawo iwo wai wanene wa wandu madedo hawukie ko mlisi umu.

¹² Kya ngoseṟa manaoko, idikia itutumo, kuwode mtsitsionyi foṟehia shitapu shifoi pfo; na isoma mnu kokewinyisha mbihu.

¹³ Iki nyi kiheo kishikie kya madedo hose haweichio india Ruwa, nowade mawawaso hake; kipfa ikyo kiwaṟi mndu.

¹⁴ Kipfa Ruwa nechianduya orio iṟunda, na orio idedo lya kiṟika, liwe licha ang'u liwicho.