KOHELETI 11 - Bibilia Kui Mdedie fo Kimochi

Chando ulya mṟango ekewuta

¹ Kumba kelya kyapfo mṟingenyi; Kipfa nochikiwona numa ya mafiri hafoi.

² Nohawie wandu washikie mfungade, itane nyanya; Kipfa ulaichi kiwi kechihoya oruka.

³ Mapuchi haichuo mṟinga, Hechiletsia oruka loose. Na ikidi likaoloka iambuya kya nuka ang'u mtsudu, Handu lyaoloka naho lechilaa.

⁴ Orio moambuya otanu echiwaayapfo, Na moambuya mapuchi echisambuopfo.

⁵ Chandu iyo ulaichi omongo lo otanu, ma mafuo chandu hekewanga wusunyi; na wudong'u ulaichi iṟunda lya Ruwa, ekewuta mbonyi tsake

⁶ Ngamenyi waaya kilimu kyapfo Kiukanyi kulaime owoko lopfo isambuo Kipfa kulaichi nyi tsiha tsechialuka, kokoya nyi ii ang'u ii, ang'u kokoya tsose tsechialuka necha.

⁷ Lohi saa nyi injicha, na kindo kichihiṟie riso iambuya mnengeṟi.

⁸ Ee mndu kawada maka ifoi nachihiṟo nyi yo yose; kyaindi nakumbuo mafiri ho hakeri icha ha meema, kipfa nyi hafoi. Mafiri ho hose nyi wulya.

Mapfundo ha wanake

⁹ Iyo manake, chihiyo kipfa nyi ui mkoho, na mrima fopfo fuchihiyo ikeseka kiheri ki, uweosha ohendo lo mrima fopfo, na ipfo kiidi kya isho uwonyi na meso hapfo; kyaindi nowemanya ke kipfa kya isho shose Ruwa nechikuende mengenyi nakuanduye.

¹⁰ Ko ikyo wuta fowa tsapfo mrimenyi, naho uwewuta na owicho mbihunyi fopfo; kipfa uwanake nyi wulya na ishitsa lya mndu na wudo.