KOHELETI 10 - Bibilia Kui Mdedie fo Kimochi

¹ Manzi hapfiiye hekepfuṟa mafuda ha opfudano ko ulya mokumba; Na wudo kii ke wutondo kitutu nyi wulemeri kota wuṟango na wuindi.

² Mrima fo ulya mṟango fui ora lo kulyo; Indi mrima fo tondo fui ora lo kumoso.

³ Ee da, tondo, likachumia na njia lyekedetsa wuṟango; na lyekewia orio mndu ke lyo nyi tondo.

⁴ Mumuyo fo msongoru fukapfuluko kipfa kyapfo, ma kulakure handu ui; kipfa mumuyo fo wuhoo fokeoloṟa mawicho hang'anyi.

⁵ Kuwode kiṟihishie ndekiwona shia mnengeṟi, lifananyi na deko ko ulya mochilia;

⁶ Kyamba wutondo wui wuwike handu ha huye mnu, na walya wasuṟi wakawiko wanda.

⁷ Inyi nyi njilewona masinga hadamie frasi, na wanene wechichumia na madende cha masinga.

⁸ Mosuma rina nechiolokapfo amonyi Na mosanja mba njoka yechimmada.

⁹ Motsana maho hechimmbika shifaṟe Na mopaṟa mashidi nechiwonapfo ndenga

¹⁰ Kokoya kulapfuṟanya kisha kya menya ma ikinuo kiwaṟi uṟunde na pfinya ya ngoseṟa Indi nyi kicha uṟunde na wuṟango nowesumbo.

¹¹ Njoka ikaimada ilamelembolembo Kyasia kuwode kiira kya molembalembapfo

¹² Madedo ha mndu mṟango hawode osaṟio Indi dumbu lya tondo lyemmeṟa o amonyi.

¹³ Mawokioonyi ha madedo hake nyi wutondo; ifurumia lya madedo hake nyi waṟumu warie ndenga.

¹⁴ Ngoseṟa wutondo wokeengeṟa madedo; indi mndu o wandu aichi shechikaapfo-pfo; na isho shechikaapfo numa nyiu echiidima ihamba?

¹⁵ Iṟunda lya tondo orio umu nechilehela, Kipfa aichi njia ya mṟi pfo.

¹⁶ Ochia lopfo oruka, kokoya mangi yapfo nyi manake Na wanene wapfo wekelya otuko

¹⁷ Nanga yapfo oruka, mangi yapfo ikawa mana o wandu Na wanene wapfo wakalya kiheri kiwaṟi. Kundu wawade pfinya, ma chi wunanzi pfo.

¹⁸ Kipfa kya wudoko kai lyekewola, Na wawode mawoko mawiriwiri mba yekefuna.

¹⁹ Mfuho fokewiko kipfa kya seko Na mvinyo fokechihiṟa mrima; na fesa tsekeende iawutsia shindo shose

²⁰ Makulasese mangi, ma kiidi kya mahiyo hapfo Ma kulasese wasuṟi kiṟihenyi kyapfo Kipfa ndehe ya ruwehu yechiduo ṟu Na ulya ekerunduka nechihamba.