KOHELETI 1 - Bibilia Kui Mdedie fo Kimochi

Moo fo wanda ii nyi wulya

¹ Madedo ha Koheleti, mana o Dawidi, mangi kiidi kya Yerusalemu.

² Koheleti nahamba, Wulya tupu, wulya tupu, shindo shose nyi wulya nakamu.

³ Mndu nawode kiira kiki, kiidi kya iṟunda lyake ekeliṟunda orukenyi?

⁴ Kishari kikawecha, kishari kikawehenda; na wuyana wukakaa wui wuwanzi.

⁵ Mnengeṟi fukawaa, mnengeṟi fukaolokia, nafo fukakambiṟa ihenda handu foolokia.

⁶ Otanu lukawuka nuka, lukahalukia mtsudu; kiheri kyose lokehalukia kundu lokunda, lukawuya na alya mawokioonyi.

⁷ Meda yose yekesiiya ipalyipalyinyi, na ipalyipalyi lyeichuopfo; ipfondo meda yekehenda napfo yekewuka-se.

⁸ Shindo shose shiichuo mawina halewa ihamba, riso lyechiihuda iwona-pfo, na kudu kokepeleko iicho pfo.

⁹ Shilya shiweipfo nasho shechikaapfo; na shilya shilewutika nasho shechiwutika; manya kindo kihya ma kimu kuwode kunu orukenyi pfo.

¹⁰ Ngesa na kuwode kindo ma kimu wandu wekehamba ambuya iki nyi kikihya? Kiweipfo wokia mbooko, kacha kachungu manya so lulaweichi.

¹¹ Kuwode ngumbuo yose ya shishari shilemeida; ma shilya shisonguo na shechicha pfo ma kiidi kya walya wechicha numa-pfo.

Shilya Koheleti alewona

¹² Inyi, Koheleti, njiwei Mangi ya Israeli kiidi kya Yerusalemu

¹³ Ngawika mrima foko ngashiha shose shekewutika wuyaenyi ngametambahaluo kui wuṟango; nyi wukiwa wung'anyi Ruwa ainengie wandu; walye wukiwa.

¹⁴ Ngawewona maṟunda hose hai mawute orukenyi, ate shose nyi wulya piu.

¹⁵ Shilya shinyamaṟikie shechiwa isungusia-pfo Ma shilya shilaipfo shechiwa italapfo.

¹⁶ Ngawekusaṟa njechihamba, njiwode wuṟango kota wose wawenjisongoe kiidi kya Yerusalemu; ee da! Mrima foko fumonyi mfoeṟa fo wuṟango na wulaanyi woko.

¹⁷ Ngawika mrima foko ngamanya wuṟango, ngawewona isho shose nyi maai na maai.

¹⁸ Kyamba, kiidi kya mfoeṟa fo wuṟango kuwode fowa, na ichu moengeṟa wuṟango naengeṟa mkuinadiye.