IWUKA 6 - Bibilia Kui Mdedie fo Kimochi

¹ Mndumii-Ruwa kawia Mose, “Wulalu nochiwona chandu njechiwutia Farao; kyamba kui owoko lukahari nechiwainenga momu wakuhendye kowo, na kui owoko lukahari nechiwafuna orukenyi loke.”

Mndumii-Ruwa alaha Mose

² Numa Ruwa kadeda na Mose kambia, “Inyi nyi Mndumii-Ruwa ;

³ na Inyi njilewonekia Abrahamu, na Isaki, na Yakobo, cha Ruwa Menyiwuitoṟi, indi kui rina lyako Mndumii-Ruwa njilemanyika kowopfo.

⁴ Njileṟingishiase mkundana foko nawo fowainenga oruka lo Kanaani, oruka walekaapfo cha wahenu.

⁵ Na ngoseṟa ya isho, njileicho isungulula lya wana wa Waisraeli, sa Wamisri walewawada masinga, na inyi ngakumbuo mkundana foko.

⁶ Kyasia, wia wana wa Waisraeli, lnyi nyi Mndumii-Ruwa, na inyi njechimuwuta nyo muwuke ipfo shia maṟio ha Wamisri, na inyi njechimuashuo wusingenyi wowo, na inyi njechimukiṟa kui owoko luhoṟotsu, na kui mwanduye fung'anyi;

⁷ na inyi njechimuira muwe wandu wako, njechiwa Ruwa konu, nanyo mochimanya ke inyi nyi Mndumii-Ruwa, Ruwa onu, njimuwutie mkure kiidi kya maṟio ha Wamisri.

⁸ Na inyi njechimuende mṟasa orukenyi sa njileiria owoko loko njiinenge Abrahamu, Isaki, na Yakobo; njechimuinenga luwe kioṟa kyanu; inyi nyi Mndumii-Ruwa.”

⁹ Mose kawia wana wa Waisraeli madedoha, kyaindi walaadanyie Mose kipfa kya fowa mrimenyi, na kipfa kya wuumu wo wusinga.

¹⁰ Mndumii-Ruwa kadeda na Mose, kambia,

¹¹ “Ida na mba, nodede na Farao, mangi ya Misri, kundu nainenge momu wana wa Waisraeli wawuke orukenyi.”

¹² Mose kadeda oshangunyi lo Mndumii-Ruwa, kahamba, “Ambuya, wanawo wa Waisraeli wanjiadanyia inyipfo; Farao chu nechinjiadanyia ada, inyi njii na momu njilemeri?”

¹³ Mndumii-Ruwa kadeda na Mose na Aroni, kawawawasa wahendie wana wa Waisraeli, na Farao, mangi ya Misri, kundu nawute wanawo wa Waisraeli wawuke orukenyi lo Misri.

Kishari kya Mose na Aroni

¹⁴ Iwa nyiwo mdo ya mba tsa wandeawo; wana wa Reubeni, mana mmbee o Israeli; nyi Enoki na Palu, na Hesroni, na Karmi; iwo nyi mbaṟi ya Reubeni.

¹⁵ Na wana wa Simeoni; Yemueli, na Yamini na Ohadi, na Yakini, na Sohari, na Shauli mana o mndu mka o Kikanaani; iwo nyi mbaṟi ya Simeoni.

¹⁶ Na iha nyiho marina ha wana wa Lewi, chandu shisharisho shii; Gershoni, na Kohathi, na Merari; na maka ya moo fo Lewi iweshikie maka ihana na makumi haṟaṟu na mfungade (137).

¹⁷ Wana wa Gershoni; nyi Libni, na Shimei, chandu mbaṟi tsawo tsii.

¹⁸ Na wana wa Kohethi; nyi Amramu, na Ishari, na Hebroni, na Uzieli; na maka ya moo fo Kohathi-cho nyi ihana na makumi haṟaṟu na iṟaṟu (133).

¹⁹ Na wana wa Merari; nyi Mali, na Mushi. Itsi ntso mbaṟi tsa Walewi-wo chando shishari shawo shiwei.

²⁰ Amramu-cho kaalika Yokebedi manomae o ndee; nao kammbonyia Aroni na Mose; na maka ya moo fo Amramu nyi iwei maka ihana na makumi haṟaṟu na mfungade (137).

²¹ Wana wa Ishari; nyi Kora, na Nefegi, na Zikri.

²² Na wana wa Uzieli; nyi Mishaeli, na Elisafani na Sithri.

²³ Aroni kaalika Elisheba, mana o waka o Aminadabu, mshiki o Nashoni; nao kamfeea Nadabu, na Abihu, na Eleasari, na Ithamari.

²⁴ Na wana wa Kora; nyi Asiri, na Elkana, na Abiasafu; itsi nyitso mbaṟi tsa Wakora-wo

²⁵ Na Eleasari mana o Aroni kaalika umu o kiidi kya wana wa kika wa Putieli; na kamfeea Finehasi. Iwa nyiwo wandu wa mdo wa waku wa Walewi sumhana na washari wawo.

²⁶ Iwa nyi Aroni ulya ulya, na Mose ulya ulya, Mndumii-Ruwa alewawia, kechihamba, “Irenyi wana wa Waisraeli wawuke orukenyi lo Misri kui matorito hawo.

²⁷ Nyi iwo walededa na Farao mangi ya Misri kundu nawute wana wa Waisraeli wawuke Misri; nawo nyi Mose ulya ulya na Aroni ulya ulya.”

Mose na Aroni waindia mawawaso ha Ruwa

²⁸ Fuwei mkonu fo Mndumii-Ruwa alededa na Mose kulya orukenyi lo Misri, Mndumii-Ruwa kawia Mose,

²⁹ kahamba, “Inyi nyi Mndumii-Ruwa; wia Farao mangi ya Misri madedo ho hose njikuwia.”

³⁰ Mose kadeda oshangunyi lo Mndumii-Ruwa, “Inyi nyi mndu njilaichi ideda necha, Farao nechinjiicho ada?”