IWUKA 5 - Bibilia Kui Mdedie fo Kimochi

Mose na Aroni oshangunyi lo Farao

¹ Numa, Mose na Aroni wakahenda iwia Farao, wehamba, “Mndumii-Ruwa o Israeli, nahamba adi, ‘Inenga wandu wako momu wahende, kundu wanjisungusie mkonu mnene ipfo nuka.’”

² Farao kahamba, “Mndumii-Ruwa nyiu, tane ngaicho ṟu lyake, na iinenga Waisraeli momu wakuhendie kowo? Inyi njiichi Mndumii-Ruwapfo, manya njechiinenga Waisraeli wahende kowopfo.”

³ Wakahamba, “Ruwa o Waebri alekumbuhana naso; lokuterewa, luinenge momu luhende kyaṟo kya mkonu iṟaṟu kulya nuka, luwutiepfo Mndumii-Ruwa, Ruwa odu kidaso; nalachekukapa kui ndaaṟe ang'u oshu.”

⁴ Mangi ya Misri kawawia, “Lanye Mose na Aroni, nki ili muihataṟa wandu kiṟundionyi kyawo? Hendenyi na maṟio hanu.”

⁵ Kiidima Farao kahamba, “Ambuyenyi, wandu wa iya orukenyi nyi wafoi, nanyo muiwadokosha, walakudike maṟio hawo.”

⁶ Mkonu na fulya fulya Farao kawawasa wachili na walya wehoṟokia wandu kechihamba,

⁷ “Mulainengese wandu maṟa hesungusia matofaṟi, chandu muweichiwie wuka mawokioonyi; wahende iende maṟa wo wawenyi.

⁸ Kyaindi iitala lya matofaṟi mulaanguṟe manyale, kyamba iwa nyi wai wadoko; ko ikyo waikoṟoṟoma, wehamba, luinenge momu luhende iwutia Ruwa odu kidaso.

⁹ Inengenyi wanduwo kiṟundio kiumu-umu ngoseṟa, waturuchuke, manya walechiadanyia madedo ha wongo.”

¹⁰ Wachiliwo wa wandu na walya wehoṟokia wandu wakakure, wakadeda na wandu, wehamba,

¹¹ “Farao nahamba adi, ‘Inyi njechimuinenga maṟapfo.’ Kekuhendienyi nyo muwenyi, mukuwutie maṟa o handu mochihawona; kyamba iṟunda lyanu lyechianguṟo manyalepfo.”

¹² Kyasia, wanduwo wakanyanyaṟikia orukenyi lose lo Misri kundu waidime isanyiapfo masaho ha mademenyi handu ha maṟa.

¹³ Wachili wawo wakawaitika, wehamba, “Awutsienyi iṟunda lyanu, ṟungusu tsanu tsa orio mkonu, cha lilya mandi maṟa haweipfo.”

¹⁴ Na walya wehoṟokia wana wa Waisraeli, walya wachili wa Farao walewawika, wakakapo, wewio, “Nki ili mulaleawutsia iṟunda lyanu wukowu na inu; mochikapa matofaṟi cha lilya mawokioonyi?”

¹⁵ Kyasia, wehoṟokia walya wa wana wa Waisraeli wakahenda, wakafihiṟia Farao, wehamba, Nki ili oluwutia kudi, so masinga hapfo?

¹⁶ Masinga hapfo wainengose maṟapfo, nawo wailuwia, “Kapenyi matofaṟi; na ambuya, masinga hapfo waikapo; kyaindi dekolyi nyi lya wandu wapfo iyo kumonyi.”

¹⁷ Kahamba, “Nyo nyi mui wadoko; wadoko; kipfa kya iki muihamba, luinenge momu luhende iwikia Mndumii-Ruwa kidaso?

¹⁸ Kyasia hendenyi wulalu, muhende ṟunda; kyamba mochiinengose maṟapfo, na handu hamu na isho mochiende iitala lilya lilya lya matofaṟi.”

¹⁹ Nahong'u wehoṟokia wa wana wa Waisraeli wakawona ke wai handu hawicho lilya walewio, “Mochianguṟio iitala lya matofaṟi hanu manyalepfo; itso ntso ṟungusu tsanu tsa orio mkonu.”

²⁰ Wakakoyana na Mose na Aroni, wahoṟoki njienyi lilya walewuka ko Farao;

²¹ Wakawawia, “Mndumii-Ruwa nawaambuye na idumbuo; kipfa muletana opfaamo lodu lukowa luwicho oshangunyi lo Farao na oshangunyi lo waṟundi wake, mukawika oshu mawokonyi hawo, waluwaahe.”

²² Mose kawuuya Mndumii-Ruwa, kahamba, “Mndumii-Ruwa nki ili kulewutia wanduwa mawicho? Nki ili kulenjiduma inyi?

²³ Cha kipfa wokia njilehenda ko Farao, ngadeda nao kui rina lyapfo, nalewutia wandu wa mawicho; manya kuleashuo wandu wapfo manyalepfo.”