IWUKA 40 - Bibilia Kui Mdedie fo Kimochi

Ihema lya Mndumii-Ruwa, lyahoṟotso na ishimbuyo

¹ Mndumii-Ruwa kadeda na Mose, kambia,

² “Mkonu fo kuwoka fo meri fo kuwoka nochihoṟotsa handuho hekaa ihema lyekusanzia.

³ Na iyo nowikepfo isanduku lya wuṟingishi, na iyo nolishikie isanduku lyo na isulia.

⁴ Na iyo noende mesa noiwikepfo, nowikepfo necha shindo shilya huyayo; numa noitse na mba kimnaṟa kilya kya taa, na iatsa taa tsakyo.

⁵ Numa nohoṟotse rasio iya ya sahabu idutsiaho uvumba sumhana na isanduku lya wuṟingishi, na iwika isulia o mongo fo handuho hekaa.

⁶ Numa nowike rasio lya kidaso kemaya modonyi sumhana na mongo fo handu hekaa ihema lyesanzia.

⁷ Numa nowike biṟikalyo makidi hawi ha ihema lyesanzia na rasiolyo noletsiepfo mṟinga.

⁸ Numa nohoṟotse okuta lo oṟiho lutengetie njora tsose, na imasa isulia o mongo fo oṟiho.

⁹ Numa noire mafuda heshia, na ishia mafudaho handuho hekaa, na orio kindo kii ipfo mba, na iihaluo iwe njiele, na shihia shayo shose; na handuho hechiwa haele.

¹⁰ Numa nochishia mafuda rasio lya kidaso kemaya modonyi, na shihia shalyo shose, na iihaluo iwe rasio njiele; na rasiolyo lyechiwa lyiele mnu.

¹¹ Numa nochishia biṟikalyo mafuda na mrihiyo folyo, na ilyihaluo lyiwe liele.

¹² “Numa noende Aroni na wana wake na o mongo fo ihema lyekusanzia, nowasanje na mṟinga.

¹³ Numa noṟike Aroni maṟao maele; na iyo nomshie mafuda, na immbika nawe mwele, kundu naidime injiṟundia kiidi kya iṟunda lya wukohanyi.

¹⁴ Numa noende wana wake na iwaṟika kanzu tsawo;

¹⁵ Na iyo nochiwashia mafuda chandu oshia ndeawo mafuda, kundu wanjiṟundie kiidi kya iṟunda lya wukohanyi; na ishiolyo lyawo lya mafuda lyechiwa nyi wukohanyi wo mlungana shisharinyi shawo shose.”

¹⁶ Mose katana ado shose; chando Mndumii-Ruwa emmbia nyi wudo aletana.

¹⁷ Koikishika meri fo kuwoka maka fo kawi, mkonu fo kuwoka fo meri handu halya hekaa halehoṟotso.

¹⁸ Mose kahoṟotsa handu hekaa, kawika mrihiyo kahoṟotsa mbau tsake, kawikapfo mriiti yake, kahoṟotsa ngo tsake.

¹⁹ Kahekiaho ihema huya handu halya hekaa, kahekia kipfinko kya ihema huyalyo; chandu Mndumii-Ruwa alewawasia Mose.

²⁰ Kaira kiṟingishio kilya kakiwika kulya isandukunyi, kawikaho mashidi helyiduo o huyalyo, kahekia loṟika lo osaṟio huya isandukulyo,

²¹ kiidima kaende isandukulyo kaliwika mba ya handu halya hekaa, nao kamasa isulia lilya lyeshikia kashikia isanduku lilya lya wuṟingishi chandu Mndumii-Ruwa alewawasia Mose.

²² Kawika mesa iya kulya ihemenyi lyesanzia, ora lo handu hekaa luambuye mtsudu, nja ya isulia.

²³ Kaṟihicha mkate iya huyayo oshangunyi lo Mndumii-Ruwa; chandu Mndumii-Ruwa alewawasia Mose.

²⁴ Kiidima kawika kimnaṟa kya taa kulya ihemenyi lyekusanzia, iambuyana na mesayo ora lo mtsudu luambuye ora lo nuka.

²⁵ Kiidima kaatsa taa tsakyo oshangunyi lo Mndumii-Ruwa; chandu Mndumii-Ruwa alewawasia Mose.

²⁶ Kawika rasio lya sahabu kulya ihemenyi lyekusanzia kufui na isulia.

²⁷ Kadutsiaho uvumba wo mafuda hepfaama; chandu Mndumii-Ruwa alewawasia Mose.

²⁸ Kawikapfo isulia lya mongo fo handu halya hekaa.

²⁹ Kawikapfo rasio lya kidaso kemaya modonyi alya mongo fo handu hekusanza, kalekiaho kidaso kemaya modonyi, na kidaso kya mso; chandu Mndumii-Ruwa alewawasia Mose.

³⁰ Kawikapfo mboṟiko kulya ihemenyi lyekusanzia na rasio, kawikapfo mṟinga folyisanja.

³¹ Mose na Aroni, na wana wake wakasambapfo mawoko hawo na madende;

³² mandi wameida na ihemenyi lyekusanzia, na mandi wametikiria hafui na rasio, walesamba chandu Mndumii-Ruwa alewawasia Mose.

³³ Kahoṟotsa omombo lo oṟiho lukatengetia handu halya hekaa na rasio, kamasa isulia lya mongo fo oṟiho lulya. Nahong'u Mose kamarisia iṟundalyo.

Ipuchi huya ihema lya Mndumii-Ruwa

³⁴ Nalyo ipuchi lilya likashikia ihema lyekusanzia, na kiṟumikyo kya Mndumii-Ruwa kikaichuṟa handu halya hekaa.

³⁵ Manya Mose alaidime iida na kulya ihemenyi lyekusanzia, kipfa kya ipuchi lilya lilekaa huyalyo, na kiṟumi kyo kya Mndumii-Ruwa kikaichuṟa handu halya hekaa.

³⁶ Na kiheri ipuchi lileirio kuwuka huya handu halya hekaa, wana wa Waisraeli wakakure wakahenda shaṟonyi shawo shose,

³⁷ Indi kokoya ipuchi lilya lilataṟawuka, kiheri kyo wechiira kyaṟopfo mtano kiheri lyameiroho.

³⁸ Kyamba ipuchi lilya lya Mndumii-Ruwa liwei huya handu halya hekaa kiheri kya mfiri, na liwewode modo kiidi kyalyo kiheri kya kio.