IWUKA 4 - Bibilia Kui Mdedie fo Kimochi

Ruwa ainenga Mose pfinya tsiṟihishiye

¹ Mose kahaluo kahamba, “Kyaindi, ambuya, wechinjiidikiapfo, manya wechiicho ṟu lyakopfo, kipfa wechihamba, Mndumii-Ruwa alekucheapfo.”

² Mndumii-Ruwa kambia, “Nki ki ikyo uwode ipfo owokonyi lopfo?” Kahamba, “Nyi ndichi.”

³ Kammbia, “Ikumbe wanda;” kaikumba wanda, nayo ikahaluka njoka; Mose kadicha oshangunyi loyo.

⁴ Mndumii-Ruwa kawia Mose, “Hoṟuo owoko lopfo, noiwade mhasifo; (kahoṟuo owoko loke kaiwada, nayo ikahaluka ikawa ndichi owokonyi loke),

⁵ kundu wawuteho iidikia ke Mndumii-Ruwa, Ruwa o Abrahamu, Ruwa o Isaki, Ruwa o Yakobo amekuchea.”

⁶ Mndumii-Ruwa kambiase, “Wulalu wika owoko lopfo o kipeta kopfo. Kawika owoko loke alya kipeta koke; nao kekiluwutaho, ate! Owoko loke luwodo nyi saka, lukoila weṟu cha makuṟeṟa ha mtsudu.

⁷ Kahamba, Wikase owoko lopfo o kipeta kopfo.” Kaluwikase alya kipeta koke, nao kekiluwuta alya kipeta koke, ate! Lomewuuya fana iya ya mbihu foke.

⁸ Kyasiang'u kechiwa walamekuidikie, manya iadanyia ṟu lya kichano kya kuwoka, wechiadanyia ṟu lya kichano kya kawi.

⁹ Nahong'u kokoya walameidikie manya shichano shi shishiwi, manya iadanyia ṟu lyapfo, kyasia, ira mṟinga fo medenyi nofupusuye orukenyi handu hahadutsu, na mṟinga fo ofuira medenyi fochiwa samu alya orukenyi handu hahadutsu.

¹⁰ Mose kawia Mndumii-Ruwa, “Hoi Mndumii, wokia kacha inyi chi mndu mokidedapfo, manya wokia mandi ulewooka ideda na mṟundiopfo, kyamba inyi njimwangu idedapfo, na olimi loko luulemeri”

¹¹ Mndumii-Ruwa kambia, “Nyiu awikie dumbu lya mndu o wandu? Ang'u nyiu ekewika mndu pipi ang'u mpfu madu, ang'u msa awonyi, ang'u kipfupfuṟe, Chi inyi Mndumii-Ruwa?

¹² Kyasiang'u wulalu, henda, na inyi njechikaa handu hamu na dumbu lyapfo, na ikulosha isho ochihamba.”

¹³ Mose kahamba, “Ee-wo Mndumii, ngakuterewa, duma mndu ungi.”

¹⁴ Nyashi ya Mndumii-Ruwa ikado kipfa kya Mose, kahamba, “Ngesa! Kuipfo Aroni ichu mano mayo Mlewi? Njiichi ke o neidima ideda necha. Handu hamu na isho ambuya, nao naicha ikuambia; nao ili echikuwona, nechichihio mrimenyi foke.

¹⁵ Na iyo nochideda nao, na iwika madedo dumbunyi lyake; na inyi njechikaa handu hamu na dumbu lyapfo, na handu hamu na dumbu lyake, na imulosha madedo mochiwuta.

¹⁶ Nao nechiwa modeda handu hapfo ko wandu, nao nechiwa handu ha dumbu lyapfo, na iyo nochiwa ofano lo Ruwa ipfo koke.

¹⁷ Na iyo nochiambia ndichi ii owokonyi lopfo, na kui ndichi ii nochiloṟa shichano shilya.”

Mose awuya na Misri

¹⁸ Naho Mose kahenda kawuya na ko Yetro ndee o mka oke, na immbia, “Ngakuterewa, nnenga momu njihende, njiwuye na ko wana wa wama wako wai Misri; njiwaambuye kokoya na wai na moo mṟasa inu.” Yetro kawia Mose, “Ee, kuhendie na ofoṟo.”

¹⁹ Mndumii-Ruwa kawia Mose kulya Midiani, “Ee, henda, wuya na Misri, kyamba wandu walya wose waweiṟinjawia moo fo fopfo walemepfa.”

²⁰ Kyasia Mose kaira mka oke na wana wake, kawadosia mhongohu fo nzoi, na kawuya tane Misri; na Mose kaduo ndichi iya ya Ruwa owokonyi loke.

²¹ Mndumii-Ruwa kawia Mose, “Mandi ochishika Misri, ambuya nowute ṟiho tsilya tsose oshangunyi lo Farao, tsilya njiletsiwika owokonyi lopfo; kyaindi njechiumiṟa ngoo yo yake, nao echiinenga momu wanduwo wakuhendiepfo.

²² Na iyo nowie Farao, Mndumii-Ruwa nahamba adi, Israeli nyi mana oko, mana oko mmbee;

²³ Na inyi ngakuwia, ‘Inenga manachu oko momu nakuhendie, kundu naidime injiṟundia, na iyo koleha imnenga momu nakuhendie; kyasia ambuyang'u, inyi njechiwaaha mana opfo, mmbee.’”

²⁴ Kikashika mandi wawei njienyi handu helaa, Mndumii-Ruwa kakumbuhana nao akundi imbaaha.

²⁵ Nalyo Sipora kawada iho liumu kadina nalyo mana oke, kapaya madende ha Mose kahamba, “Kya lohi iyo nyi ui mndumii o walyi o samu koko inyi.”

²⁶ Naho Mndumii-Ruwa kamlekia. Nyi, lyondi mkacho oke alededa, “Ui mndumii o walyi o samu, kipfa kya idino.”

²⁷ Mndumii-Ruwa kawia Aroni, “Henda kulya nuka uwonane na Mose.” Nao kahenda, kamkoya fumvunyi lya Ruwa, kamhekia momu.

²⁸ Mose kawia Aroni madedoho hose ha Mndumii-Ruwa sa alemduma nahende naho, na ṟihotso tsose alembawasia.

²⁹ Mose na Aroni wakasanyia wameku wose na wana wa Waisraeli.

³⁰ Aroni kawawia madedoho hose Mndumii-Ruwa alededa na Mose, kawuta na ṟiho tsilya oshangunyi lo wandu.

³¹ Wandu wakaidikia, na lilya waleicho ke Mndumii-Ruwa nachea wana wa Waisraeli, na ke nalewona matuuro hawo, wakaaramtsa mdo yawo wakaadapfuma.