IWUKA 39 - Bibilia Kui Mdedie fo Kimochi

Isungusia nguwo tsa wakohanyi

¹ Walesungusia maṟao ha wakohanyi ko ndusu tsa fana ya buluu, wusurungi, na mberi tsa kimande tsa machondi, na maṟao ho, hawemapfume ko wuaria mnu kipfa kya wuṟundi wo handu haele. Wakasungusia maṟao hakikohanyi ha Haruni chandu Mndumii-Ruwa alewawasa Mose.

² Nawo wakasungusia naiverayo, ya ndusu tsa sahabu na tsa fana ya buluu, na tsa fana ya usuṟungi, na tsa fana ya kimaande, na kitani kicha kikioke.

³ Nawo wakahuohuo sahabuyo tane yawa mapalu masise mnu, numa wakaicharanduo iwe ndusu kundu waidime ipfuma hamu na ndusutso tsa fana ya buluu na tsa fana ya usurungi, na tsa kimaande, na tsa kitani kicha, na iṟunda lyi liwei lya wuaria wung'anyi mnu.

⁴ Nawo wakasungusia shitambaa sha makosohu kipfa kya naiverayo, wakashilunga ndumbenyi yayo, kundu iidime ipfungo kitsinyi.

⁵ Na mkandafo fumṟundie necha, fuwemsungusie na ndusu tso, fulelungio na naiverayo kikawa kindo kimu, chandu Mndumii-Ruwa alewawasa Mose.

⁶ Nawo wakashisungusia maho ha wuhuru wung'anyi hawode mcharie ya rangi tsa mbaṟi tsifoi, wakahawika huye ya shitaṟa sha sahabu, Wakaṟehia ko iṟeha ko wuaria wung'anyi marina ikumi na hawi ha wana wa Yakobo, huye ya maho ho.

⁷ Nao kashiwika kiidi kya shitambaa shilya sha makosohu sha naiverayo, shiwe shindo sha wuhuru sha ngumbuo ko wana wa Waisraeli; chandu Mndumii-Ruwa alewawasa Mose.

Isungusia iṟao lya kipeeta

⁸ Nao kasungusia iṟao lya kipeeta, ko wuaria wung'anyi mnu, cha lilya lya naivera.

⁹ Liwehianyi njora tsose; wakasungusia iṟao lilya lya kipeeta likalemo kawi; uleshe wolyo wuwei sentimita 22, na wulandari wolyo wuwei sentimita 22.

¹⁰ Na iṟao lilya lya kipeeta wakalichopa na mcharie ina ya maho sha wuhuru. Mcharie fokuwoka fuwei fo akiki, topazi na almasi ya fana ya kimande.

¹¹ Na mcharie fo kawi fuwewode zumaridi, na yakuti ya mapuchi, na alamasi.

¹² Na mcharie fo kaṟaṟu nyi hiakinto, na akiki ya kimaande na ametisto.

¹³ Na mcharie fo kaana nyi zabarajadi, na shohamu, na yaspisi. Shindo shose shiwenjiringichie na mkanda fo sahabu.

¹⁴ Orio huye ya iho limu lya maho halya, kuwerehie rina limu lya wana walya ikumi na wawi wa oshari lo Israeli.

¹⁵ Iṟao lilya lya kipeeta, wakalisungusia mshe fo sahabu.

¹⁶ Nawo wakasungusia mkanda iwi ya sahabu, na pete tsiwi tsa sahabu; wakamasa petetso tsiwi ndumbenyi tsa iṟao lilya.

¹⁷ Nawo wakaitsa mshe iya iwi injioke oke kulya kiidi kya pete tsilya tsiwi tsiwenjimase ndumbenyi tsiwi tsa iṟao lilya.

¹⁸ Na mdo iya iwi ya mshe iya, wakaipfungia shitambeenyi shiwi makosohu ha iṟao lilya lya kipeeta ipfo oshangunyi lolyo.

¹⁹ Nawo wakasungusia pete tsiwi tsa sahabu, wakatsiwika kiidi kya ndumba tsilya tsiwi tsa iṟao lilya lya kipeeta, mtsitsionyi folyo ora lui kufui na naivera lo kyamba.

²⁰ Nawo wakasungusia pete tsiwi tsa sahabu, na itsiwika wanda ya shidami shilya sha naivera iya, kya kusonguo kufui na kipfungo kyake, huya okowa lo naivera lulusuke ko wuaria.

²¹ Nawo wakapfungia ngowa tsiwi petenyi tsa wanda tsa iṟao lilya lya kipeeta na itsilungia petenyi tsa naivera. Walewuta wudo chandu Mndumii-Ruwa alewawasa Mose.

Maṟao hengi hakikohanyi

²² Na ikonya lya ukohanyi liwelisungusie lyose ko mamberi ha machondi, ha fana ya buluu;

²³ na ṟoche lilya leitsa mdo, lyiwei litirime kundu lilaranduke.

²⁴ Nawo wakapfumia makomamanga kulya otirimonyi lo ikonya lilya ha ndusu tsa fana ya buluu, usuṟungi, kimaande, na kitani kicha kikioṟowie.

²⁵ Nawo wakasungusia shicheheṟe sha sahabu njicha, wakawika shicheheṟesho makidi hawi ha makomamangaho njoora tsose,

²⁶ kicheheṟe na ikomamanga, kicheheṟe na ikomamanga, otirimonyi lo ikonya lilya lyikadung'ana riti, shiṟunde, chandu Mndumii-Ruwa alewawasia Mose.

²⁷ Nawo wakasungusia kanzutso tsa nguwo ya kitani kicha kikipfume, ko Aroni na wana wake,

²⁸ na kidami kya mdonyi kya kitani kicha, na kofia njicha tsa kitani, na suruwale tsipfume tsa kitani kicha,

²⁹ na okowalo lo nguwo njicha ya kitani injiokeoke na fana ya buluu, na fana ya usuṟungi, na kimaande iṟunda lya wuaria woṟehaṟeha; chando Mndumii-Ruwa alewawasia Mose.

³⁰ Nawo wakasungusia iṟaṟo lya oṟo njiele lya sahabu njicha, wakaṟehia huye yalyo, “LIELE KO Mndumii-Ruwa.”

³¹ Wakalipfunga mbele ya kidamyi kilya kya mdonyi ko kamba ya bluu, chandu Mndumii-Ruwa alewawasa Mose.

Iṟunda lyasia

³² Kyasia nyi wudo iṟunda lyose lyilemarisika lya handu halya hekaa ihema lesanzia; na wana wa Waisraeli walerunda shose chandu Mndumii-Ruwa alewawasia Mose.

³³ Nawo wakaendie Mose ihema liele na shihia shalyo shose, shipfungo shalyo, na mbau tsalyo, na mataṟuma halyo, na ngo tsalyo na mrihiyo yalyo;

³⁴ na kipfinyiko kyalyo kya njonyi tsa machondi masuwa tsinjishie fana ya kimaande, na kipfinyiko kya njonyi njicha tsa mburu na isulia lyeshikia;

³⁵ na isanduku lya mkundana na mashidi halyo, na loṟika lo osaṟio,

³⁶ na mesa, na shihia shayo shose, na mkate indambike ko Mndumii-Ruwa;

³⁷ na kimnara kya taa kya sahabu njicha, na taa tsakyo, na shihia shakyo shose, na mafuda ha taa;

³⁸ na rasio lya sahabu na mafuda heshia, na uvumba wucha, na isulia lya mongo fo Ihema;

³⁹ na rasio lya aṟeṟa, na cheke cheke yalyo ya aṟeṟa, na mashidi halyo, na shihia shalyo shose, na biṟika iya na mrihiyo folyo;

⁴⁰ na okuta lo nguwo lo mfiṟiha, na ngo tsake na mrihiyo yake, na isulia lya orio mongo, na shihowo shalyo, na mambo tsalyo, na shihia shose sha wuṟundi woṟundia ihemenyi lyesanzia;

⁴¹ na maṟao mecha ha wakohanyi ha Haruni na wana wake.

⁴² Sungusihu na shose Mndumii-Ruwa alewawasia Mose, nyi wudo wana Waisraeli walewuta.

⁴³ Mose kaambuya iṟundalyo lyose, kawona ke walewuta chandu Mndumii-Ruwa alewawasa. Kyasia kawawikia ona.