IWUKA 38 - Bibilia Kui Mdedie fo Kimochi

Isungusia rasio lya shidaso shemaya modonyi

¹ Numa kasungusia rasio lya kidaso kemaya modonyi, ya ikidi kya mshita; wuleshe woyo nyi wuwei mita 2:25, na wulandari woyo wuwei mita 2:25, ihiyanyi kose; ihenda huye kuwei mita 1:34.

² Nao kasungusia ndumba tsayo tsiina, ndumbatso tsiwei tsa kindo kimu nakyo; katsishikia na aṟeṟa.

³ Numa kasungusia shihia shose sha sahabu; safuṟia tsayo makumbi hayo, na mamboṟiko hayo, na uma tsayo na mariko hayo; shihia shayo shose kashitana sha aṟeṟa.

⁴ Na rasio iya kaisungusia chekecheke ya aṟeṟa, kaiwika shi ya minga wotengetianjora tsose, ikakaa makidi hawi ha rasiolyo.

⁵ Nao kasalara pete tsiina tsewika ndumbenyi tsiina tsa cheke chekeyo ya aṟeṟa, tsiwe handu hewika mashidiho heiria.

⁶ Nao kasungusia mashidiho ha ikidi lya mshita kahashikia na aṟeṟa

⁷ Kaitsa mashidi halya kiidi kya pete tsilya tsiwei mbarinyi ya rasiolyo, kundu waiṟie; kasungusia rasio lya mbao sa liwode maṟi ipfo kiidi.

Mboṟiko ya aṟeṟa

⁸ Naho kasungusia mboṟikolyo lya aṟeṟa, na mrihiyo folyo fo aṟeṟa; aṟeṟayo iwei nyi ya shilola sha waka wawekeṟunda mongo fo ihema lyekusanza.

Oṟiho loshikia isanduku lya mkundana

⁹ Nao kasungusia oṟiho lulya; ora lo nuka waambuya kya nuka, isulia lya oṟiholo luwei lo ngo tsakyo tsiwei tsa kitani kicha kikioke kya mita 44;

¹⁰ ngo tsakyo tsiwei 20, na mrihiyo yatso iwei 20 ya aṟeṟa; kalapu tsa ngo na maṟoche hatso shiwei sha fesa.

¹¹ Ora lo mtsudu na wudo luwei dhiraa ihana, nguo tsake makumi hawi na mrihiyo yatso makumi hawi iwei ya aṟeṟa; sasia tsa nguo na maṟoche hatso shiwei sha fesa.

¹² Ora lo kyukanyi kuwei chandaṟuo ya dhiraa makumi hatanu, nguo tsayo tsiwei ikumi, na mrihiyo yatso ikumi; sasia tsa nguotso na maṟoche hatso shiwei sha fesa.

¹³ Ora lo ngamenyi woambuya ora lo ngamenyi nyi dhiraa makumi hatanu.

¹⁴ Chandaṟuo ya ora lumu lo mongo iwei dhiraa ikumi na tsitanu wuleshe woke; na ngo tsake tsiṟaṟu, na mrihiyo yake iṟaṟu;

¹⁵ na wudo na oralo lo kawi; ora lu na oralu alya mongo fo mkonuha kuwewode chandaṟuo ya dhiraa ikumi na tsitanu wuleshe woke; ngo tsake tsiwei tsiṟaṟu, na mrihiyo iṟaṟu.

¹⁶ Chandaṟuo tsa nguo tsose tsa oṟiho lulya tsiletengetia njora tsose tsiwei tsa kitani kicha kikioke.

¹⁷ Na mrihiyo ya nguo tsilya iwei ya aṟeṟa; sasia tsa ngotso na maṟoche hatso shiwei sha fesa, na mdo ya ngotso iwei ya fesa; na ngo tsose tsa oṟiholo tsiwenjilunge na maṟoche ha fesa.

¹⁸ Na isulialyo lya mongo fo oṟiho lyiwei nyi iṟunda lya mndu moṟehaṟeha, lyiwei lya ndusu tsa fana ya mapuchi, na ya usuṟungi, na ya kimaande na kitani kicha kikioke; lyiwewode wuleshe wo dhiraa makumi hawi, na ishelo lyalyo wulandari wolyo nyi wuwei dhiraa tsitanu, kihianyi na chandaṟuo lilya lya oṟiho.

¹⁹ Na ngo tsalo nyi tsiina, na mrihiyo yalyo nyi ina, iwei ya aṟeṟa; sasia tsiwei tsa fesa, na mdo yatso na maṟoche hatso shiwei sha fesa.

²⁰ Na mambo tsose tsa handu halya hekaa na tsa oṟiho lutengetie njora tsose tsiwei tsa aṟeṟa.

²¹ Shihia shilya shose shiweshisungusie kipfa kya handu halya hekaa, handu ha uṟingishi, nyi ishi, chando shiweishiitale chandu mawawaso ha Mose hawei, kipfa kya uṟundi wo Walewi kui owoko lo Ithamari, mana o Aroni, mkohanyi.

²² Na Bezaleli mana o Uri, mana o Huri o kisharinyi kya Yuda, kawuta shose Mndumii-Ruwa alewawasia Mose.

²³ Na Oholiabu nawei kimu nao, mana o Ahisamaki, o kisharinyi kya Dani, awei mwaria morehareha mṟundi mṟango, awekerehareha na ndusu tsa fana ya mapuchi, na tsa fana ya usuṟungi, na kimaande na kitani kicha.

²⁴ Dhahabu yose ileṟundia iṟundalyo, iṟundalyo lyose lya handu haele, mwanoyo ya sahabu iweshikie talanta makumi hawi na kenda, na shekeli mahana mfungade na makumi haṟaṟu, kui kiheo kya shekeli ya handu haele.

²⁵ Na fesa tsawo iwe waleitalo, wandu wa kisanziokyo, tsiweshikie talanta ihana, na shekeli kiku kimu mahana mfungade na makumi mfungade na tsitanu, kui kiheo kya shekeli ya handu haele;

²⁶ mdo beka, nyi kienga kya shekeli, kui kiheo kya shekeli ya handu haele, kui orio mndu aleidaho walya waleitalo, sa awewode maka makumi hawi, na ngoseṟa, wandu wasoṟoshiku mahana haṟandaṟu na waṟaṟu, mahana hatanu na makumi hatanu: (603,550).

²⁷ Na talantatso ihana tsa fesa tsiwei tsesalaṟa mrihiyo iya ya handu haele na mrihiyo ya isulialyo; mrihiyo ihana kui talantatso ihana, talanta imu ko mrihiyo fumu.

²⁸ Na kya shekelitso kiku kimu mahana mfungade, na makumi mfungade na tsitanu, kasungusia shipfungo sha nguotso, na ishishikia na fesa mdo ya shipfungosho na iwika maṟoche hasho.

²⁹ Na aṟeṟayo ileendo iweshikia talanta makumi mfungade, na shekeli shiku shiwi na mahana haana.

³⁰ Nao kasungusia mrihiyo ya aṟeṟayo kipfa kya imongo lya ihema lyekusanzia, na rasiolyo ya aṟeṟa, na checheke ya aṟeṟa kipfa kyakyo, na shihia shose sha o rasionyi,

³¹ na mrihiyo ya oṟiho itengeta njora tsose, na mrihiyo ya imongo lya oṟiho, na mambo tsose tsa handu halya hekaa, na mambo tsose tsa oṟiholo lutengetie njoora tsose.