IWUKA 37 - Bibilia Kui Mdedie fo Kimochi

Isungusia isanduku lya mkundana

¹ Lyefurumia Bezaleli kasungusia isanduku lilya lya mashidi ha mshita wuleshe wolyo wuwei sentimita 110, na wulandari wolyo wuwei sentimita 66, na ido huye wolyo nyi liwei sentimita 66;

² kalyishikia na sahabu njicha, kya mba na kya nja, kalyiwikia na minga ya sahabu kalyitengetia njora tsose.

³ Nao kasalaṟa pete tsiina tsa sahabu kipfa kyalyo, ipfo madendenyi halyo haana; pete tsiwi ora lolyo lumu na pete tsiwi ora lolyo lo kawi.

⁴ Kasungusia na mashidi heliduo, ha mashidi ha mshita, kahashikia na sahabu.

⁵ Nao kawika mashidiho kiidi kya pete tsilya tsiwei owarinyi lo isandukulyo, kundu wakudike naho isandukulyo.

⁶ Numa kasungusia kitima kya osaṟio kya sahabu njicha; wuleshe wokyo nyi sentimita 110, na wulandari wokyo nyi wuwei sentimita 66.

⁷ Numa kasungusia makerubi hawi ha sahabu; kahasungusia kui itsana, hakae mtsitsionyi iwi ya kitimakyo kya osaṟio;

⁸ kerubi limu mtsitsiofu na kerubi limu mtsitiofu; nalesungusia makerubi ho hawi ha kindo kimu na kitima kya osaṟio mtsitsionyi fo makerubiho.

⁹ Na makerubi ho hakahoruo makungo hawo huye, hakashikia kitima kyo kya osaṟio na makungo hawo, na shamu shawo shiweambuyanyi ilyi na ilyi; shamu sha makerubiwo shiweambuye kitimakyo kya osaṟio.

Meza ya mkate njiele

¹⁰ Numa kasungusia mezayo ya ikidi lya mshita; wuleshe woyo wuwei sentimita 88, na wulandari woyo wuwei sentimita 44, na wuleshe wo huye wuwei sentimita 66.

¹¹ Nao kaishikia na sahabu njicha, kasungusia mtsitsio fo sahabu kaitengetia njora tsose.

¹² Kaiṟingichia na kimbau kya milimita 75, njora tsose katengeshia kimbau kilya na wulole wo sahabu.

¹³ Kyasia, kasungusia pete tsiina tsemasa, katsiwika madendenyi haana ha isanduku lilya.

¹⁴ Pete tsilya tsiwei kufui na ndumba tsa isanduku lyo, kundu shikae handu heitsa shidi shilya sheiria mesa.

¹⁵ Na kasungusia shidisho sheduo meza, sha mashidi ha mshita, kaishikia na sahabu, kundu waduo mezayo.

¹⁶ Numa shihia shilya shiwei huya meza, shahani tsatso, na mdiko yayo, na mboṟiko tsayo, na makopo hayo heletsia mvinyo fo shidaso, kashisungusia sha sahabu njicha.

Isungusia kinaṟa ya taa

¹⁷ Numa kasungusia kinara kilya kya taa kya sahabu njicha; kasungusia kinara kilya kya taa kya iṟunda lyetsana, mrihiyo fokyo, na kidi kyake; shikombe shakyo, na shiwaṟoshakyo, na mrihiyo hakyo, shose shiwei sha kindo kimu nakyo,

¹⁸ nakyo kiwewode mbaha tsiṟaru tsiwukie owarinyi lokyo; mbaha tsiṟaṟu tsa kinaṟakyo hawei oralu, na mbaha tsiṟaṟu tsa kinaṟakyo hawei oralu,

¹⁹ shikombeshiṟaṟu, shiweshisungusie cha ofano lo shiwaṟo sha mlozi, shiwei kiidi kya mbaha imu, mrihiyo fumu na kiwaṟo; na shikombe shiṟaṟu shiweishisungusie cha ofano lo shiwaṟo sha mlozi mbahenyi ya kawi, mrihiyo na kiwaṟo; na wudo kiwei ko mbahatso tsiṟandaṟu tsiwei kulya kimnaṟenyi,

²⁰ kulya kimnaṟenyi kuweipfo shikombe shiina, shishisungusie kui ofano lo shiwaṟo sha mlozi mamrihiyo hakyo na shiwaṟo shakyo;

²¹ wanda ya mbaha tsiwi kuwewode mrihiyo liwei lya kindo kimu nakyo na wanda ya mbaha tsingi tsiwi kuwewode mrihiyo lyiwei kindo kimu nakyo; na wanda ya mbaha tsingise tsiwi kuwewode mrihiyo lyiwei kindo kimu nakyo; kipfa kya mbahatso tsiṟandaṟu, halewukana nakyo.

²² Mrihiyo yo yake na mbahatso tsake tsiwei tsa kindo kimu; kinaṟakyo kyose daa nyi iṟunda limu lyetsana, lya sahabu njicha.

²³ Kiidima kasungusia taa tsakyo mfungade, na mhado hakyo, shisahanyi shakyo, sha sahabu njicha.

²⁴ Kakisungusia kya kilogramu 35 sha sahabu njicha handu hamu na shihia shayo shose.

Rasio ya shidaso shepfaama

²⁵ Kiidima kasungusia rasiolyo lyedutsia uvumba ya ikidi lya mshita; wuleshe wolyo nyi wuwei sentimita 45,, na wulandari wolyo wuwei sentimita 45, lyiwehianyi kose kose; wuleshe wodo huye wuwei sentimita 90; na ndumba tsake tsiwei tsa kindo kimu.

²⁶ Nao kaishikia na sahabu njicha ora lo huye, na mbarinyi tsake njora tsose, na ndumbatso tsayo; kaisungusia minga ya sahabu ikatengetia njora tsose.

²⁷ Nao kasungusia pete tsiwi tsa sahabu katsiwika wanda ya mingatso tsayo, njowarinyi tsayo tsiwi, kiidi kya njora tsake tsiwi, shiwe nyi handu hewika mashidi heiiria.

²⁸ Numa kasungusia mashidi ho ha ikidi lya mshita na iishikia na sahabu.

Isungusia mafuda heshimbuo, na hepfaamiṟa

²⁹ Numa kasungusia mafudaho maele heshia, na uvumba wulya mcha, na shiwungo sha opfaamo lucha, kui wuhendeli wo mndu mosungusia shindo sha opfaamo.