IWUKA 35 - Bibilia Kui Mdedie fo Kimochi

Wuwawaso Wo Sabato

¹ Mose kasanza chila yose ya wana wa Waisrael na iwawia, Madedo Mndumii-Ruwa alemupfunda nyi iha, ke muhawute.

² Ṟundenyi maṟunda mkonu iṟandaṟu, kyaindi mkonu fo mfungade fochiwa mwele konu; mkonu fo sabato fosia moo nakamu ko Mndumii-Ruwa; mnducho oose echiṟunda kiṟundiokyo kyose mkonufo nechiwoho.

³ Mochiatsa modo ipfo kanyi konu mkonu fo sabatopfo.

Mwano ya Hema liele

⁴ Numa Mose kadeda na chila yose ya wana wa Waisraeli, kawawia, “Idedolyi nlyo Mndumii-Ruwa alelyiwawasia kechihamba,

⁵ Inengyenyi kiidi kyanu shiano ko Mndumii-Ruwa; mnducho oose awode mrima fo ikunda, naende shiano; sahabu na fesa na aṟeṟa;

⁶ na ndusu tsa fana ya mapuchi, na tsa fana ya usuṟungi, na tsa fana ya kimaande na kitani kicha, na singa tsa mburu;

⁷ na njonyi tsa masuwa tsinjishie rangi ya kimaande, na njonyi tsa (pomboo) indo lyekekaa mṟingenyi, na mbau tsa mshita;

⁸ na mafuda ha taayo, na shindo sha opfaamo ko mafudaho heshia, na ko uvumba wo wucha;

⁹ na shindo sha wuhuru sha shohamu, na shindo sha wuhuru shewika kiidi kya naivera, na iṟaonyi kya kipeeta.”

Shihia sha hema lyekoyana na Mndumii

¹⁰ “Na orio mndu kiidi kyanu awode mrima fo osaṟe nache, nawute isho shose Mndumii-Ruwa awawasia;

¹¹ handuho hekaa na ihema lyake, na kipfinyiko kyake, na shipfunga shake, na mbau tsake, na mataruma hake na ngo tsake, na mrihiyo yake;

¹² isandukulyo na mashidi halyo, na loṟikalo lo osaṟio, na isulia lilya lyeshikia;

¹³ na mesayo, na shidi shayo, na shihia shayo shose, na mkateyo yeṟihichia;

¹⁴ na kimnaṟakyo kya taa kelimikia na shihia shakyo, na taa tsakyo, na mafudaho kipfa kya ngeela;

¹⁵ na rasiolyo lyedutsia uvumba, na shidi shalyo, na mafudaho heshia, na uvumbawo wucha, na kindokyo keṟihika mongo, mongonyi fo handu hekaa,

¹⁶ na rasio lya kidaso kemaya modonyi, handu hamu na chekecheke yake ya aṟeṟa, na mashidi hakyo, na shihia shakyo shose, na ibiṟikalyo na mrihiyo folyo;

¹⁷ na mawandaho ha nguo tsa oṟiho, na shingo shake, na mrihio foke, na isulia lya imongo lya oṟiho;

¹⁸ na njomambo tsa handu halya hekaa, na njomambo tsa oṟiho na shihowo shake;

¹⁹ na maṟao ha, mapfume kui wulole, kipfa kya iṟunda kiidi kya handu haele, maṟaoho maele ha mkohanyi Aroni na maṟao ha wana wake; wechiṟunda iṟunda lya ukohanyi.”

Mwano fo ihemenyi lyekoyana

²⁰ Nahong'u chila yose ya wana wa Waisraeli wakakure alya oshangunyi lo Mose.

²¹ Wakacha orio mndu chandu mrimafo foke fomduma, na orio mndu chandu ngo yake yamnenga ikunda, nawo wakaende mwano yeinenga Mndumii-Ruwa, kipfa kya ihema lilya lyekusanzia, na kya wuṟundi woke na kipfa kya maṟao halya maele.

²² Nawo wakacha, wasoṟo na waka wose wawode mrima fo ikunda, wakaende shipuli, na pete-tsa mbuonyi na pete tsa mhuri, na mleta na shihia shose sha sahabu; orio mndu alelekia kiinengo kya sahabu kainenga Mndumii-Ruwa.

²³ Kingise orio mndu alekooya awode ndusu tsa fana ya mapuchi, na ndusu tsa fana ya usuṟungi, na kimaande, na kitani kicha, na singa tsa mburu, na njonyi tsa masuwa tsinjishie fana ya kimande, na njonyi mando hekekaa mṟingenyi, wakashiende.

²⁴ Orio mndu alelekia wuleki wo fesa, na wo aṟeṟa, kaende mwano ko Mndumii-Ruwa; na orio mndu alewona koke ikidi lya mshita lya iṟunda lyo lyose kalyiende.

²⁵ Na waka wose wawewode mrima ya osaṟe, waleoka ko mawoko hawo, nawo wakaende isho waweokie, nguo tsa fana ya mapuchi, na tsa fana ya usuṟungi, na ndusu tso tsa kimaande, na nguoyo ya kitani kicha.

²⁶ Na waka wose sa mrima yawo ilewaitika kiidi kya wuṟango wakaoka singatso tsa mburu.

²⁷ Na wanenewo wakaende shindo sha wuhuru sho sha shohamu na shindo sha wuhuru shewika kiidi kya naivera, na ipfo iṟaonyi kya kipeeta,

²⁸ na shindo sha opfaamo na mafuda; ha taayo, na ko mafudaho heshia, na ko uvumbawo wucha.

²⁹ Wana wa Waisraeli wakaende shiano sheinenga Mndumii-Ruwa kui mrima fo ikunda; wose womi na waka, sa mrima yawo ilewaitika wakunde iende kipfa kya iṟundalyo Mndumii-Ruwa alewawasa lyiṟundo kui owoko lo Mose.

Waaria wewika ihema lyekoyana

³⁰ Lyefurumia Mose kawia wana wa Waisraeli, “Ambuyenyi, Mndumii-Ruwa amemlaha kui rina lyake Bezaleli mana o Uri, mana o Huri, o kisharinyi kya Yuda;

³¹ nao kamwichuṟa mumuyo fo Ruwa kui osaare, na wuṟango, na wumanyi, na iṟunda lya wuaria wo orio mbaṟi;

³² na iwooka imanya maṟunda ha wuṟango, na iṟunda maṟunda na sahabu, na fesa, na aṟeṟa,

³³ na idumbuo shindo sha wuhuru shewikia na iṟeha mashidi, narunde kiidi kya marunda ha wuaria wo orio mbaṟi.

³⁴ Nao nalemmbikia mrimenyi foke kundu naidime ilosha, o, na Oholiabu mana o Ahisamaki o kisharinyi kya Dani.

³⁵ Naleichuṟa wanduwo wurango wo mrimenyi, kundu waṟunde orio mbaṟi ya iṟunda, ya moṟeha maho, na maṟunda ha wuṟango, na ya moṟehaṟeha nguo, kiidi kya ndusu tsa fana ya mapuchi, na tsa fana ya usuṟungi, na ya kimaande, na kitani kicha, na ya mopfuma nguo; ya iwo wekeṟunda maṟunda ho hose, na ya mawooka imanya maṟunda ha wuṟango.”