IWUKA 34 - Bibilia Kui Mdedie fo Kimochi

Mose asungusia Maṟaṟo Hengi ha Maho

¹ Naho Mndumii-Ruwa kawia Mose, “Pacha maṟaṟo hawi ha maho cha halya ha kuwoka; na inyi njechiṟehia huya maṟaṟoho madedoho hawei huya maṟaṟo halya ha kuwoka, halya kulehafunjafunja.

² Na iyo nokuṟeheṟe ngamenyi, nodo na kulya fumvunyi lya Sinai ngamenyi, nosongoṟe mrimafo fopfo koko alya kitongolohu kya fumvu.

³ Kulado mndu hamu na iyo, manya kulawoneke mndu o mbaṟi yose ipfo fumvuhu; manya ichondi na mmbe tsilaliso ipfo kufui na fumvu.”

⁴ Nao kapacha maṟaṟo hawi ha maho cha halya ha kuwoka, na Mose kalawa ngamenyi otuko, kado na kulya fumvuhu lya Sinai, chandu Mndumii-Ruwa embawasa, kaduo maṟaṟo halya hawi ha maho mawokonyi hake.

⁵ Mndumii-Ruwa kasoka kiidi kya ipuchi lilya, kahoṟoka handu hamu nao, kaedia rina lya Mndumii-Ruwa.

⁶ Mndumii-Ruwa kasonguo mbele yake, kaedia, Mndumii-Ruwa, Mndumii-Ruwa, Ruwa aichuo woloru, awode makulili, elekeicho nyashi owinyi, aichuo isaṟia na wukilohi;

⁷ ekeichio makulili wandu shiku shiku, ekehoṟia wuwicho na madeko na wunyamaṟi; manya ekeitalia mndu mmbicho ke nalawode mti manyalepfo; msa eketaa wana kiṟache kya wuwicho wo wandeawo, na wachuku na njukuṟi daa, tane ufee wo kaṟaṟu na wo kaana.

⁸ Mose kakambiṟa owinyi, kaaramtsa mdo foke tane wanda, kaadapfuma.

⁹ Kahamba, “Kokoya wulalu ngawona osaṟio oshangunyi lopfo, Mndumii-Ruwa ngakuterewa, Mndumii-Ruwa nochumie kiidi kyadu, kyamba nyi wandu luwode ngoo njiumu; nokeluhoṟia wuwicho wodu na wunyamaṟi wodu, nolukudaye luwe waoṟi wapfo.”

Mkundana fowiko wahya

¹⁰ Kahamba, “Ambuya, ngawika mkundana, mbele ya wandu wako wose njechiwuta ṟiho, tsa mbaṟi tsilalemewutike wuyanenyi kose, manya kiidi kya mkambo fo fose; na wandu wose sa okekaa kiidi kyawo wechiwona iṟunda lya Mndumii-Ruwa, kyamba nyi idedo lya kiṟiha njikuwutia,

¹¹ Ambuya idedo lyi njikuwawasia inu; ambuya, mbele yapfo ngawutaho Mwamori, na Mkanaani, na Mhiti, na Mperizi, na Myebusi, na Mhivi.

¹² Kuṟise mrimafo fopfo, kulachewika mkundana na wenyi wa orukalo oluhendia, fulawe mdeho kiidi kyapfo.

¹³ Kyaindi nochiwunduo rasio tsawo, na ifunja-funja ngo tsawo, na imanyamanya maashera hawo.

¹⁴ Kyamba wechiindia ruwa lyingipfo, cha kipfa Mndumii-Ruwa, ichu ai rina lyake nyi menyi wunyenyi, nyi Ruwa menyi wunyenyi.

¹⁵ Kulache iwika mkundana na wenyi oruka, wandu wahende ṟuhuya na maruwa hawo, na iinenga maruwa hawo mwano, mndu umu kakulaha, kolya mwano yawo.

¹⁶ Koalikia wana wapfo walyi wana wawo, na wanawo wawo wa kika wakaṟuhuya na maruwa ho hawo, watewe na wanu waṟuhuye na maruwa ho hawo.

¹⁷ Kulasungusie maruwa hesalaṟa.

¹⁸ “Mkonuyo mnene ya mkate ilantarang'ashe nochiiringa. Nochilya mkate ilantarang'ashe mkonu mfungade, chandu njilekuwawasa, kui kiherikyo kikiteṟie kiidi kya meri fo Abibu; cha kipfa nolekure Misri kiidi kya merifo fo Abibu.

¹⁹ Orio kiwee nkyako inyi; na shuma shapfo mapung'a hose, mahache ha kuwoka ha mmbe na ha machondi.

²⁰ Na ihache lya kuwoka lya nzoi, nochilitalaa ko huṟuwi; na kokoya kulakundi ilitalaa, nochilifunja nzingo. Wana wawee wose wa wana wapfo, nochiwatalaa. Ma kuwode manya umu echicha oshangunyi loko na mawoko ha wulyapfo.

²¹ Nochiṟunda maṟunda mkonu iṟandaṟu, kyaindi mkonu fo mfungade nochisia moo; kiheri kedema madema, na kiheri kesambuo daa, nochisia moo.

²² Na iyo nochiindia mkonu mnene ya mfungade, nayo nyi yewoka isambuo kilimu kya Ngano, na mkonu mnene yesanyia shindo masiiyonyi, ha maka.

²³ Makamba haṟaṟu orio maka wasoṟo wapfo wose wechicha oshangunyi lo Mndumii-Ruwa, Ruwa o Waisraeli.

²⁴ Cha kipfa inyi njechifunyia kuleshe mkambo ya wandu oshangunyi lopfo na ilandaṟa mṟasa fopfo; manya kuipfo msa echilanga oruka lopfopfo, ili ochido ihenda ikuloṟa oshangunyi lo Mndumii-Ruwa opfo makamba haṟaṟu orio maka.

²⁵ Kulalongelonge samu ya kidaso kyako na mkate fumtarang'ashe; manya kidaso kyo kya mkonu mnene fo Pasaka kechitsuhaṟo mṟasa ili lya ngamenyipfo.

²⁶ “Shilimu sha kuwoka sha orukenyi lopfo nochishiende noshiwike mmbenyi ya Mndumii-Ruwa opfo. Kulakoṟe kidahina handu hamu na maruwa ha mae.”

²⁷ Mndumii-Ruwa kawia Mose, “Ṟehia madedoha; cha kipfa inyi njilewika mkundana na iyo, na handu hamu na Waisraeli, chandu madedoha hai.”

²⁸ Nao naweipfo handu hamu na Mndumii-Ruwa mkonu 40, mfiri na kio ; alalya kelya, ma nalanyo mṟinga. Nao kaṟehia alya maṟaṟonyi, madedoho ha mkundana, na mawawasoho ikumi.

Kyamu kya Mose Kyawada Ngela

²⁹ Nalyo kikawa, Mose kekisoka kulya fumuvuhu lya Sinai, na maṟaṟo halya hawi ha wuṟingishi hai mawokonyi ha Mose, kiheri alesoka kulya fumvuhu, Mose alemanya ke oshangu lo kyamu kyake luwei luili-pfo kipfa kya ilyi alededa nao.

³⁰ Kyasia, Aroni na wana wa Waisraeli wekiwona Mose, ambuya, oshangu lo kyamu kyake luiwaa sa; nawo wakaowuo imtikiria.

³¹ Mose kawalaha; Aroni na wanene wose wa kisanzio wakawuya na koke; Mose kadeda nawo.

³² Numa wana wa Waisraeli wose wakamsembelia kufui; kawapfunda madedo halya hose sa Mndumii-Ruwa, alemmbia kulya fumvuhu lya Sinai.

³³ Na Mose kekimaa ideda nawo, kawika kindo keshikia kyamunyi kyake.

³⁴ Kyaindi kui kido kya Mose kiwei kamehenda oshangunyi lo Ruwa ideda nao, nawekewuta kindokyo keshikia kyamu mṟasa nawukepfo; kawukapfo kawia wana wa Waisraeli madedo hose alewio.

³⁵ Wana wa Waisraeli wakawona kyamu kya Mose kiwaa sa; na Mose kawikase kindo kilya keshikia kyamu; tane aida na mba ideda nao.