IWUKA 32 - Bibilia Kui Mdedie fo Kimochi

Sanamu ya ihache ya Sahabu

¹ Naho wandu wekiwona ke Mose nakeleo isoka kulya fumvuhu, wakakusanzia handu hamu wakahendia Aroni, wakambia, “Kelusungusieng'u maruwa sa wechilusongoya mbele yadu, kyamba Mosechu aleluwuta kulya orukenyi lo Misri luichi kindo kilemhoyapfo.”

² Aroni kawawia, “Funjenyi pete tso tsa sahabu tsinjimase madunyi ha waka wanu, na wana wanu, na wana wanu wa kika, mutsinjiendie.”

³ Wandu wose wakafunja pete tsa sahabu tsinjimase madunyi hawo waendie Aroni.

⁴ Kaambia mawokonyi hawo kaitsana ko patasi, kaisungusia iwe ofano lo ihache kui iisalaṟa; nawo wakahamba, “Ichu nyio ruwa opfo, aleluwuta kulya orukenyi lo Misri.”

⁵ Nao Aroni kekiwona kindo kyo, kasungusia rasio oshangunyi lolyo; Aroni kaedia kechihamba, “Ngama nyi mkonu fung'anyi ko Mndumii-Ruwa.”

⁶ Wakakure ngamenyi otuko wakalekia kidaso, wakaende mwano ya ofoṟo, wandu wakadamia ilya na inyo, wakakure washine.

⁷ Mndumii-Ruwa kawia Mose, “Kyasia, sokang'u, cha kipfa wandu wapfo kulewawuta orukenyi lo Misri wamekunyamaṟa mrima yawo wawenyi,

⁸ wamedeka oweṟe wakada mchumie fulya njile wawawasa, walekusungusia ihache lyesalaṟa wakaliindia na iliinenga kidaso, wechihamba, ‘Ichu nyio ruwa opfo aleluwuta kulya orukenyi lo Misri.’”

⁹ Mndumii-Ruwa kawiase Mose, “Inyi ngamewona wanduwa, ambuya, nyi wandu wawode nzingo njiumu;

¹⁰ kyasiang'u wulalu leka, kundu nyashi yako iake huyawo, njiwarumatse; na inyi njechikutana iyo nowe mkambo mnene.”

¹¹ Mose katerewa mnu Mndumii-Ruwa, Ruwa oke kechihamba Mndumii-Ruwa, nki ili nyashi yapfo yaakya wanduwa wapfo ulewawuta kulya Misri, kui wuidimi wung'anmyi na kui owoko luwode pfinya?

¹² Nki ili ukundi itewa Wamisri wahambe ke nulewawuta kulya Misri kundu nucheiwawahia kunu mafumvunyi? Hoi Mndumii makulasuo mnu kipfa kya wandu wapfo.

¹³ Kumbuowo Abrahamu, na Isaki, na Israeli, waṟundi wapfo, sa kulewalyiia nyamu kui mrima fopfo, na iwawia, “Njechipfumbutsa kishari kyanu cha nyenyeri tsa ruwehu; na orukalu lose njilededa kyalo njechiinenga kishari kyanu, nawo wechiluoṟa mlungana.”

¹⁴ Na Mndumii-Ruwa kailacha wuwicho wulya alehamba ke nechiwutia wandu wake.

¹⁵ Kyasia, Mose kahaluka kasoka kulya fumvuhu, na maraṟo hamaṟehie njora tsose tsitsiwi; tsinjiṟehie njora tsose tsiwi.

¹⁶ Na maṟaṟo halya hawei nyi iṟunda lya Ruwa, na kiṟehio kilya kiwei kiṟehio kya Ruwa, kikitaruche alya maṟaṟonyi.

¹⁷ Nahongu Yoshua kekiicho kitohio king'anyi kya wandu, kawia Mose, “Kuwode shida ikapano kulya kambinyi.”

¹⁸ Kyasia, Mose kahaluo kahamba, “Ikyo kii cha kitohoyo kya wandu wawinga ang'u wawingo shidenyi-pfo. Kii cha kitohiyo kya wandu wawode mfuho.”

¹⁹ Naho kekitikiria kambi iya kawona ihache lilya na temo tsilya. Nyashi ya Mose ikaaka, kakumba maṟaṟo wanda kahafunja wanda ya fumvu lilya.

²⁰ Kaira ihache lilya walelyisungusia kalikoṟa na modo kalisa lyikawa kilulyi kakipusuya mṟingenyi karutsa wana wa Waisraeli.

²¹ Mose kawia Aroni, “Nkiki wanduwa walekuwutia tane oende wunyamaṟi wung'anyi wudi huyawo?”

²² Aroni kahaluo kahamba, “Kulasuo mnu kipfa kyako. Kyamba ma iyo nyi uichi ke wandu wa wawode mahiyo mawicho.

²³ Cha kipfa walenjiwia, ‘Kelusungusie ruwa sa echilusongoya mbele yadu, kipfa mnducho Mose, aleluwuta orukenyi lo Misri, luichi kindo kilemhoyapfo.’

²⁴ Ngawawia, ‘Mndu cho oose awode sahabu naifunje nanjiinengie; kyasia wakanjiinengia, na inyi ngaisalara modonyi kukachapfo ihachelyi.’”

²⁵ Nahong'u Mose kawona ke wanduwo waleilamia Aroni nao kawada wakatehia na ikusutsa oshangunyi lo wakituwa wawo.

²⁶ Nalyo Mose kahoṟoka alya mongo fo kambi iya, kahamba, “Mndu cho oose ai ora lo Mndumii-Ruwa nache na iya koko,” wana wa Lewi wose wakamṟingichia,

²⁷ Nao kawawia, “Mndumii-Ruwa o Waisraeli, nawawsa adi, ‘Orio mndu naṟae oshu loke kitsinyi kyake, naide ipfo kambinyi nawahe, wanawamaye wake, mbuya tsake, na wamṟasa wake.’”

²⁸ Na wanawo wa Lewi wakawuta chandu Mose alewawia, na mkonufo wakaoloka wanda cha wandu 3000.

²⁹ Kyasia Mose kawawia, “Inu mkuheṟemtsa mukawa wakohayi wa MDUMII, cha kipfa moindia Ruwa koiwuta kindo kiumu mnu kewaha, wana wanu, wanawa mayanu, na wamṟasa wanu. Koikyo Ruwa namuwikia ona.

³⁰ Ilyi lya ngama Mose kawawia wandu walya, mulewuta wunyamaṟi wung'anyi mnu; na wulalu njehenda huye ko Mndumii-Ruwa kofia njiwike kisanza kipfa kya wunyamaṟi wonu.”

³¹ Mose kawuya na ko Mndumii-Ruwa, kahamba, “Apaa! Wanduwa wawuta wunyamaṟi wung'anyi mnu, koisungusia ruwa lyawo lya sahabu.

³² Kyaindi wulalu, ngakuterewa uwahoṟie wunyamaṟi wowo. Shila wudo wuta rina lyako kitapunyi kyapfo.”

³³ Mndumii-Ruwa kawia Mose, “Mndu cho oose alenjiwutia wunyamaṟi nyio njechimbuta, kitapunyi kyako.

³⁴ Kyasia, wulalu henda teteṟa wanduwa mṟasa handu halya njilekuwia mbonyi tsaho; ambuya, malaika oko nechikusongoya; hamu na isho mkonu njechiwachea njechiwataa kiṟache kipfa kya wunyamaṟi wowo.”

³⁵ Kyasia Mndumii-Ruwa kakapa wanduwo, ko ndaṟe injiwicho kipfa waletewa Aroni nawasungusie ihache lilya lya sahabu.