IWUKA 31 - Bibilia Kui Mdedie fo Kimochi

Mndumii asambuṟa Bezaleli na Oholiabu

¹ Mndumii-Ruwa kadeda na Mose, kahamba,

² “Ambuya, ngamlaha kui rina lyake Bezaleli mana o Uri, mana o Huri o mbaṟinyi ya Yuda;

³ na inyi ngamwichuṟa mumuyo fo Ruwa, kiidi kya osaṟe, na wuṟango, na wumanyi, na wuaria wo orio mbaṟi ya iṟunda,

⁴ kundu nawoke maṟunda ha wuaria, nawe mpfuru o sahabu na o fesa, na o aṟeṟa,

⁵ na idumbuo maho ha shindo sha wuhuru hewika handu, na iṟeha, mashidi, na iṟunda lya wuaria wa mbaṟi yose.

⁶ Ambuyase, ngamsambuṟa, Oholiabu nakae na iyo, mana o Ahsamaki, o mbaṟinyi ya Dani; na inyi ngawika osaṟe mrimenyi ya wose wawode mrima fo wuṟango, kundu waidime iṟunda isho shose njilekuwawasa;

⁷ ihema lyekusanzia na isanduku ya mṟingishie, na loṟika lo osaṟio lui huyalyo, na shihia shose sha Ihema;

⁸ na mesa, na shihia shayo, na kimnaṟa kicha kya taa hamu na shihia shakyo shose, na rasio lyedutsia uvumba;

⁹ na rasio lya kidaso kemaya modonyi na shihia shalyo shose, na biṟika na mrihiyo folyo;

¹⁰ na maṟao ha wana wake, kundu wanjiṟundie ipfo iṟundenyi lya ukohanyi,

¹¹ na mafuda heshia, na uvumba wo opfaamo lucha kipfa kya handu haele, chandu njilekuwawasia shose nyi wudo nawo wechiwuta.”

Mawawaso ha Sabato

¹² Mndumii-Ruwa kadeda na Mose kambia,

¹³ “Kyasia, iyo deda na wana wa Waisraeli; nowawie, nkya lohi mochiringa sabato tsako, kyamba nyi ofano kiidi kyako inyi nanyo kiidi kya shishari shanu shose; kundu mukuwutieho imanya ke inyi nyi Mndumii-Ruwa njekemuheṟemtsa nyo.

¹⁴ Kyasia, mochiringa mkonu fo mwele; kipfa fui mwele konu; orio mndu echifuteṟefutsa nkya lohi kyake nechiwoho, kipfa orio mndu echiṟunda iṟunda mkonufo, mrima foke fochikumbo kuleshe na wandu wake.

¹⁵ Iṟunda lyechiṟundo mkonu iṟandaṟu, kyaindi mkonu fo mfungade nyi mkonu mwele fosia moo nakamu, mwele ko Mndumii-Ruwa; orio mndu echiṟunda iṟunda lyo lyose mkonu fo mwele, kui kiilohi nechiwoho.

¹⁶ Wandu wa Israeli wechiindia mnu mkonu fo Sabato kipfa mkonufo fui kichano kya mkundana.

¹⁷ Nyi kichano kiidi kyako inyi na wana wa Waisraeli mlungana; kyamba mkonu iṟandaṟu Mndumii-Ruwa nalewumba ruwehu na oruka, kasia moo mkonu fo mfungade na ikeseka.”

Maṟaṟo hawi ha maho nyi kiṟingishio kya mkundana

¹⁸ Nahong'u Mndumii-Ruwa kekimarisa ideda na Mose kulya fumvunyi lya Sinai, kamnengia maṟaṟo hawi ha maho hamaṟehie mawawaso ko owoko loke.