IWUKA 30 - Bibilia Kui Mdedie fo Kimochi

Rasio lyepfamiṟa uvumba

¹ Na iyo sungusia rasio handu hedutsia uvumba; nochiisungusia ya ikidi lya mshita

² wuleshe woyo wochiwa sentimita 45, na wulandari woyo wochiwa sentimita 45, yechihiana kose kose; wuleshe wodo huye sentimita 90; ndumba tsayo tsechiwa tsa kindo kimu.

³ Na iyo noishikia na sahabu njicha o huyake, na mbarinyi tsayo mbai na mbai, na ndumba tsayo; na iyo noitengetie na sahabu.

⁴ Numa noitsanyie pete tsiwi tsa sahabu, wanda ya mtsitsionyi foyo, na mbarinyi tsayo tsiwi, kiidi kya njora tsayo tsiwi nochitsisungusia; natso tsiwe handu heitsa mashidi hekudika.

⁵ Na mashidiho hechiwa ha mshita, na iishikia na sahabu njicha.

⁶ Na iyo nochiwika rasio lyo likae kusonguo ko isulia lilya lilimase oshangunyi lo isanduku lyo lya mkundana, hondu njechideda na iyo.

⁷ Aroni nechidutsa uvumba wo opfaamo huyake; orio mkonu ngamenyi ili echisungusia taa tsilya, nechiwudutsa.

⁸ Aroni ili echiatsa taa tsilya kiheri kya kyukanyi, nechidutsa, wuwe uvumba wo kiheri kyose oshangunyi lo Mndumii kiidi kya shishari shanu shose.

⁹ Mochidutsiaho uvumba wuhenupfo, manya kidaso kekoṟapfo, manya kidaso kya msopfo, manya mochiletsiaho kidaso kya kindo kenyopfo.

¹⁰ Nao Aroni nechiwika kisanza huya ndumba tsakyo ili limu ko maka; kui samu ya kidaso kilya kya wunyamari yewika kisanza, limu orio maka nechiwika kisanza, kiidi kya shishari shanu shose; nyi wuele mnu ko Mndumii-Ruwa.

Okamba lo ihema liele

¹¹ Mndumii-Ruwa kadeda na Mose, na immbia,

¹² “llyi ochiitala wana wa Waisraeli, chandu itala lyawo lyechiwa, nlyondi orio mndu echinjitaa wuhuru ko mrima foke, kundu njiwaringe na ndaare tsose.

¹³ Na kindo wechilekia nyi iki; orio mndu echiida ko walya wai waitale, nechilekia shekeli , chandu kiwaṟi handu haele; mwano fo Mndumii-Ruwa.

¹⁴ Orio mndu amuitale, wokia msa awode maka makumi hawi, ang'u ngoseṟa, nechilekia mwanofo fo Mndumii-Ruwa.

¹⁵ Wasuṟi wechiende ngoseṟapfo, manya wakiwa wechiende kilashikiepfo, kya kiengakyo kya shekeli, ili wechilekia mwanofo fo Mndumii-Ruwa, kiheri wechiwika kisanza kipfa kya mrima yanu.

¹⁶ Na iyo nochiambia fesatso tsa kisanza mawokonyi ha wana wa Waisraeli na itsisuṟuma tsa wuṟundi wo ihema lyekoyana kundu tsiwe ngumbuo ya wana wa Waisraeli oshangunyi lo Mndumii-Ruwa, kundu wawike kisanza kipfa kya mrima yanu.”

Mboṟiko ing'anyi ya aṟeṟa

¹⁷ Mndumii-Ruwa kadeda na Mose, kambia,

¹⁸ “Sungusia mboṟiko ya aṟeṟa na mrihiyo folyo fo ilama, lyesambia; na iyo nochiliwika makidi hawi ha ihema lyesanzia na rasio, na iyo nowikepfo mṟinga.

¹⁹ Na Aroni na wana wake wechisanjiapfo mawoko hawo na madende hawo;

²⁰ kiheri keida na mba ya ihema lyekusanzia; wechisamba mṟingenyi kundu walapfe; ang'u ili wechitikiria rasionyi kundu waṟunde, iongoṟia Mndumii-Ruwa kidaso kemaya modonyi;

²¹ Nahong'u wechisanja mawoko hawo na madende hawo walachepfa; na idedolyi lyechiwa iwawaso kowo mlungana, koke o na ko oshari loke kiidi kya shishari shawo shose.”

Mafuda heheṟemtsa

²² Nahong'u Mndumii-Ruwa kadeda na Mose, kambia,

²³ “Ira mafuda hepfaama mecha, ha manemane mawishi lita 6, na madalasini fuwode opfamo lucha kienga kya ikyo lita 3, na kane kilo 3,

²⁴ na kida kilo 3, na lita 4 tsa mafuda ha msinepfu.

²⁵ Sungusia mafuda maele heshimbuo hamasanze cha mafuda ha mpfaamo mcha.

²⁶ Na iyo nochishia ihemalyo lyekusanza mafudaho na isanduku lyo lya kiṟingishio.

²⁷ Na mesayo, na shihia shayo shose, na kimnaṟa kilya kya taa, na shihia shakyo, na rasio lilya lyedutsia uvumba,

²⁸ na rasio lya kidaso kemaya modonyi, handu hamu na shihia shasho shose, na mboṟikoyo na mrihio folyo.

²⁹ Na iyo nochiheṟemtsa shindosho kundu shiwe shiele mnu; na orio kindo kechishipaaya shindo shi kechiwa kiele.

³⁰ Na iyo nochishimbuo Aroni na wana wake, na iwaheṟemtsa, kundu wanjiṟundie iṟunda lya ukohanyi.

³¹ Na iyo nochideda na wana wa Waisraeli nowawie, Iha hechiwa nyi mafuda maele heshimbuo kipfa kyako inyi kiidi kya shishari shanu shose.

³² Hechiletsio mbihunyi fo mndupfo, manya mulasungusie hengi ofano lo ihapfo chandu hai masungusie na shindo shakepfo; nyi hamaele na konu nyo hechiwa maele.

³³ Mnducho oose echilongalonga mafuda ofano lo iha, ang'u mnducho oose echishimbuo mndu mhenu na mafudaha, mnducho nechiletsano kuleshe na wandu wake.”

Mpfaamo fo uvumba

³⁴ Mndumii-Ruwa kawia Mose, “Ira mafuda mecha hepfaama, natafi, na shekeleti, na kelbena, shiungo sha mafuda mecha hepfaama handu hamu na udi wucha; shindoshi shose shiwa sha kiheo kimu;

³⁵ Na iyo nochisungusia uvumba wo shindoshi, mafuda hepfaama hamasungusie nyi mndu mwaria mosungusia mafuda hepfaama necha, mecha, maele,

³⁶ na iyo maataho nochihapochapocha necha, nohawike osehu loṟingishia ipfo ihemenyi lyekusanzia, ili njechikoyana na iyo, naho hechiwa maele mnu konu.

³⁷ Na iyo ulasungusie uvumba wufananyi na iwo pfo, kipfa iwo wui wuele ko Mndumii-Ruwa.

³⁸ Mnducho oose echisungusia uvumba ofano lo iwo, kundu nawupfamire, mnducho nechifunyio kuleshe na wandu wake.”