IWUKA 26 - Bibilia Kui Mdedie fo Kimochi

Ihema lye kumbuhanyia

¹ “Kiidima sungusia handuho hekaa kuwade masulia ikumi; hasungusie kui nguwo ya katanyi njicha injioke, handu hamu na ndusu tsa fana ya buluu na kimaande, handu hamu na makerubi; iṟunda lyo liwe lya uwaria mcha.

² Wuleshe wo orio isulia wochiwa mita ikumi na tsiwi, na wulandari wochiwa mita tsiwi, masualia hose hechiṟingana.

³ Masulia hatanu hechilungo handu hamu, ili na ili; na masulia hengi hatanu hechilungo handu hamu, ili na ili.

⁴ Numa nochisungusia maṟoche ha fana ya buluu mtsitsionyi fo isulia limu kulya otiṟimonyi lo ohawi lulya lumu, na wudo ochiwuta ora lo mtsitsionyi fo isulia lilya lya ohawi lulya lo kawi.

⁵ Sungusia maṟoche makumi hatanu (50) kiidi kya isulia limu, na maṟoche makumi hatanu (50) kiidi kya ora lo mtsitsionyi lo isulia lilya lyikaa lyilungane ora lo kawi; maṟoche ho hambuyane.

⁶ Numa nosungusie shipfungo makumi hatanu sha sahabu, na ilunga masuliaho handu hamu kui shipfungo shilya; na handuho hekaa hechiwa handu hamu.

⁷ “Na iyo sungusia masulia ha singa tsa mburu hawe mahema huya handu hekaa; sungusia masulia ikumi na limu.

⁸ Wuleshe wo orio isulia wochiwa mita ikumi na tsiṟaṟu, na wulandari wo orio isulia wochiwa mita tsiwi, masuliaho ikumu na limu hechiṟingana.

⁹ Numa nolunge masulia hatanu kyanya, na masulia haṟandaṟu kyanya, na isulia lilya lya kaṟandaṟu nochilihekia huya lilya lya mongo fo ihema lyo.

¹⁰ Sungusia maṟoche makumi hatanu ora lo tsindenyi lo isulia lilya lyitsitsie kiidi kya halya hamalungie handu hamu, na maṟoche makumi hatanu ora lo tsindenyi lo isulia lilya lyii kya nja kiidi kya halya hawi hamalungie handu hamu.

¹¹ Nosungusiese shipfungo makumi hatanu 50 sha aṟeṟa, noshiwike shipfungosho kulya maṟochenyi, na isanza ihema lilya kundu lyiwe ihema limu.

¹² Na kiora kilya kyatsuhaa, kilya kiolokie kya masulia halya ha ihema, kienga kilya kya isulia kiletsuhaa, kechioloka ora lo ipfo numa lo handuho hekaa.

¹³ Kienga kya mita imu ora lumu, na kienga kya mita ora lo kawi, ya wuleshe wo masulia ha ihema luletsuhaa, hechiolokia mbaṟinyi tsa handu hekaa oralu na oralu, kundu shilishikie.

¹⁴ Na iyo sungusia kipfinyiko kya ihema lyo, kya njonyi ya masuwa tsinjishie fana ya kimande, na huyakyo kipfinyiko kya njonyi tsa mburu.

¹⁵ “Na iyo sungusia mbautso tsa handu hekaa tsa ikidi lya mshita, tsihoṟoki.

¹⁶ Orio mbau iwade wuleshe wo mita tsiina na ulandari wo orio mbau wochiwa sentimita 66.

¹⁷ Orio mbau yechiwada njolyimi tsiwi, tsilungie ii na ii; nyi wudo ochisungusia mbautso tsose tsa handu hekaa.

¹⁸ Numa nosungusie mbau tsilya tsa handu hekaa, mbau makumi hawi 20 ko ora lo nuka woambuya kya nuka.

¹⁹ Na iyo nosungusie mrihio makumi haana (40) ya fesa wanda ya mbau tsilya makumi hawi, mrihio iwi ko mbau imu na ira njolimi tsilya tsake tsiwi, na mrihiyo iya iwi wanda ya mbau ingi iambia njolyimi tsilya tsake tsiwi,

²⁰ na ora lo kawi lo handu halya haele, ora lo mtsudu, mbau makumi hawi (20),

²¹ na mrihiyo lyake ya fesa makumi haana (40), mrihiyo iwi wanda ya mbau imu, na mrihiyo iwi wanda ya mbau ingi.

²² Numa nosungusie mbau tsiṟandaṟu kipfa kya ora lo numa lo handuho haele woambuya ora lo kyukanyi.

²³ Sungusiase mbau tsiwi kipfa kya ndumbatso tsa handu haele tsii ora lo numa.

²⁴ Ora lo tsindenyi tsechiwa tsiwi tsiwi; na wudo tsechilungo handu hamu mbau mbasa tane huye kiidi kya pete ya kuwoka; nyi wudo tsechiwa tsose tsitsiwi; tsechiwa kipfa kya ndumbatso tsiwi.

²⁵ Tsechiwa mbau nyanya, na mrihiyo yatso ya fesa, mṟihiyo ikumi na iṟandaṟu; mrihiyo iwi shia mbau imu, na mrihiyo iwi shia mbau ya kawi.

²⁶ Na iyo sungusia mataṟuma ha ikidi lya mshita, mataṟuma hatanu kipfa kya mbau tsa ora lumu lo handu haele,

²⁷ na mataruma hatanu kipfa kya mbau tsa ora lo kawi lo handu haele, na mataruma hatanu kipfa kya mbau tsa ora lo numa lo handu haele luambuye ora lo kyukanyi.

²⁸ Na itaṟuma lya makidi hawi, lyii makidi hawi ha mbautso lyechiida kuwokia mtsitsio fu itane mtsitsio fu.

²⁹ Na mbautso nochitsishikia na sahabu, na pete tsake tseitsapfo mataruma halya nochitsisungusia tsa sahabu; na mataruma ho nochihashikia na sahabu.

³⁰ Na iyo nochiṟihichia handuho haele necha cha ofano lulya kuleloṟo alya fumvuhu.

³¹ “Na iyo sungusia isulia lya ndusu tsa fana ya buluu, na tsa fana ya usuṟungi na tsa fana ya kimaande, na nguwo kitanyi kicha kikioke, lyechipfumo na iwiko makerubi, iṟunda lya wuaria wucha;

³² numa limase kiidi kya ngo tsiina tsa ikidi lya mshita tsinjishikie na sahabu, shipfungo shalyo nyi sha sahabu, huya mrihio ina ya fesa.

³³ Na iyo masa isulialyo wanda ya shipfungosho, na iyo noende isanduku lilya lya kiṟingishio nolyiwike numa ya isulialyo; na isulialyo lyechiletsana handu haele, na handu haele ha haele.

³⁴ Na iyo nochihekia loṟika lo osaṟio huya isandukulyo lya kiṟingishio lii handu halya haele ha haele.

³⁵ Na mesa yo nochiiwika kya nja ya isulia lilya, na kimnaṟa kya taa kiambuyane na mesa iya ora loambuya kya nuka lo handuho, na mesayo noiwike ora loambuya kya mtsudu.

³⁶ “Numa nosungusie keṟihika mongo fo Ihema, kya ndusu tsa fana ya Samawi, na tsa fana ya buluu, na tsa fana ya kimaande, na kitani kicha ki kioke, iṟunda lya moṟehaṟeha.

³⁷ Na iyo sungusia ngo tsitanu tsa ikidi lya mshita tsa keṟihichia kilya, notsishikie na sahabu kulabu tsatso tsechiwa tsa sahabu; na iyo nosalaṟe mrihio ya menya ya aṟeṟa itanu kipfa kya ngo tso.”