IWUKA 25 - Bibilia Kui Mdedie fo Kimochi

Shidaso sha ihema lyiele

¹ Mndumii-Ruwa kadeda na Mose, kambia,

² “Wia wana wa Waisraeli ke wanjiwikie mwano; orio mndu sa mrima fo foke fomnenga ikunda, mochiambia koke mwano foko.

³ Mwano ochiambia mawokonyi hawo nyi; sahabu, na fesa na aṟeṟa,

⁴ na ndusu tsa rangi ya samawi, na ya sambarau na ya kimande na nguo kitani kicha, na singa tsa mburu;

⁵ na njonyi tsa masuwa tsinjishie rangi ya kimande, na njonyi tsa indo lya mṟingenyi, na mashidi ha mshita,

⁶ na mafuda ha taa iya, na shiungo sha opfamo ko mafuda halya hekushia, na ko uvumba wulya wokepfama necha;

⁷ na shindo sha wuhuru wung'anyi sha shohamu , na shindo shingi shepfumia kiidi kya naivera, na kulya iṟaonyi kya kipeeta.

⁸ Nawo wanjisungusie handu ha haele; kundu njiidime ikaa kiidi kyawo.

⁹ Kisumhanyi na ishi shose njikuloṟa, mfano fo handu hekaa, na mfano fo shihia shaho shose, nyi wudo mochishisungusia.”

Isanduku lya mkundana

¹⁰ “Nawo wasungusie isanduku lya ikidi lya mshita; wuleshe wolyo sentimeta 110, wulandari wolyo nyi sentimita 66, na wuleshe wodo huye nyi sentimeta 166 na kienga.

¹¹ Na iyo nolishie na sahabu njicha, nolishie kya mba na kya nja, na iyo noliwikie mkanda fo sahabu fulitengetie njora tsose.

¹² Sungusia pete tsa sahabu tsiina notsiwike ipfo madendenyi halyo haana, pete tsiwi ora lumu na pete tsingi tsiwi ora lolyo lo kawi.

¹³ Sungusia mashidi maleshe ha mshita noshie sahabuyo.

¹⁴ Na iyo itsa mashidi kiidi kya petetso tsii njora tsiwi tsa isanduku kundu noidime iduo isandukulyo mlembalemba.

¹⁵ Mashidi ho hechikaa kiidi kya petetso tsa isanduku; hechiwutopfopfo.

¹⁶ Numa nowikepfo kiṟingishioki njechikuinenga.

¹⁷ Na iyo sungusia kidi kedamia kya osaṟio kya sahabu njicha; wuleshe wokyo wochiwa sentimita 110, wulandari wokyo sentimita 66.

¹⁸ Na iyo sungusia makerubi hawi ha sahabu; nohawike ko iṟunda lyetsana, ipfo mtsitsioni ya kitimakyo kya osaṟio oralu na oralu.

¹⁹ Leṟia kerubi umu mtsitsionyi fumu na kerubi o kawi mtsitsionyi fo kawi; wika makerubiho ha kindo kimu na loṟika lo osaṟio mtsitsionyi fu na mtsitsionyi fu.

²⁰ Na makerubi wo wechiiria makungo hawo huye, washikie loṟika lo lo osaṟio kui makungoho hawo, na shamu shawo shechiambuyana ichu na ichu, shamu sha makerubiwo shechiambuya loṟika lo osaṟio.

²¹ Hekia loṟika lo lo osaṟio huya isandukulyo; numa nowike uṟingishiwo njechikuinenga kiidi kya isandukulyo.

²² Na inyi njechiwonanaho na iyo, njechideda na iyo njii o huya loṟika lo lo osaṟio, makidi hawi ha makerubiwo wawi wai o huya isandukulyo lya kiṟingishio, kya mbonyitso tsose njechikuwawasa kipfa kya wana wa Waisraeli.”

Mesa ya mkate injiwike kidaso ko Ruwa

²³ “Na iyo sungusia mesa ya ikidi lya mshita; wuleshe woyo wochiwa sentimita 88, na wulandari woyo sentimita 44 na ido huye sentimita 66.

²⁴ Noishikie na Sahabu njicha, noiwikie otiṟimo lo Sahabu lutengetie njora tsose.

²⁵ Numa noisungusie mbau iitengetie njora tsose, wulandari woke wochiwa sentimita 66

²⁶ Noisungusie pete tsiina tsa sahabu, petetso notsiwike ndumbenyi tsalyo tsiina na madendenyi halyo haana.

²⁷ Petetso tsikae kufui na mbau iya, kundu tsiwe handu heitsa shidi shilya sha mshita, sheduo mesayo.

²⁸ Sungusia mashidi halya ha ikidi lya mshita, na ishikia Sahabu, kundu mesayo idao nasho.

²⁹ Na iyo sungusia sahanyi tsakyo na mdiko yakyo, na makopo hayo, na shikombe shayo shesalaṟia; sungusia shose sha Sahabu njicha.

³⁰ Nochiwika mesayo oshangunyi lo isanduku lya mkundana. Na huya mesayo nochihekia mkate iya injiwute cha kidaso oshangunyi loko kiheri kyose.”

Kimnaṟa kya taa

³¹ “Na iyo sungusia kimnaṟa kya taa kya sahabu njicha; kimnaṟakyo kisungusie wokia, tsindenyi na ngo yakyo, shikombe shakyo, mrihiyo yakyo, na shiwaṟo shakyo, shose shiwe kindo kimu;

³² nakyo kechiwada mbaha tsiṟandaṟu tsechiakia mbaṟinyi tsakyo; mbaha tsiṟaṟu tsa kimnaṟakyo ora lokyo lo kawi

³³ shikombe shiṟaṟu shishisungusie cha ofano lo shiwaṟo sha mlozi kiidi kya mbaha ya kawi, mrihiyo na kiwaṟo; na wudo mbahatso tsose tsiṟandaṟu tsiwukie ipfo kimnaṟenyii.

³⁴ Na kiidi kya kimnaṟakyo shikombe shiina shishisungusie kui ofano lo shiwaṟo sha mlozi, mrihiyo yakyo shiwaṟo shakyo;

³⁵ Kochiwada njana wanda ya Orio jozi tsiṟaṟu tsa maṟamba.

³⁶ Kimnaṟakyo kya taa, handu hamu na maṟamba hakyo, na shiwaṟo shakyo, shechiwa sha sahabu injisungusie necha.

³⁷ Na iyo sungusia taa tsakyo mfungade; nawo wechiatsa taa tso tsose, tsiloṟe sa oshangunyi lokyo.

³⁸ Na mamhado hakyo, na shisahanyi shakyo, shose shechiwa sha sahabu njicha.

³⁹ Kimnaṟa kyo kechisungusio ko shilo 35 sha sahabu njicha, handu hamu na shihiasho shose.

⁴⁰ Na iyo ambuya ke noshisungusia cha ofano loke, kuleloṟo kulya fumvunyi.”