IWUKA 24 - Bibilia Kui Mdedie fo Kimochi

Samu ya mkundano

¹ Naho Mndumii-Ruwa kawia Mose, “Donyi nyo, iyo na Aroni; na Nadabu, na Abihu na wandu makumi mfungade (70) wameku wa Waisraeli, mukooye Mndumii-Ruwa; mumwichimbiṟe mui haleshe;

² na Mose amonyi nyio echisembelia kufui na Mndumii-Ruwa; indi iwo wechisembelia kufuipfo, manya wanduwo wechido handu hamu nanyopfo.”

³ Mose kahenda iwia wandu madedoho hose ha Mndumii-Ruwa, na mdumbuye yake yose; wandu wose wakahaluo kui ṟu limu, wehamba, “Madedo hose Mndumii-Ruwa adeda lochihawuta.”

⁴ Kyasia, Mose kaṟehia madedo ha Mndumii-Ruwa hose, kakure ngamenyi otuko, kasungusia rasio tsindenyi ya fumvu, na ngo ikumi na tsiwi, kui iitala lya mbaṟi ikumi na tsiwi tsa wana wa Waisraeli,

⁵ kadika wanake wa wana wa Waisraeli, walya walewika kidaso kemaya modonyi, wakashinjia Mndumii-Ruwa shidaso sha ofoṟo sha mmbe.

⁶ Mose kaira kienga kya samu iya, kaiwika mboṟikonyi tsifoi na kienga kya samu iya kaipusuya huya rasio.

⁷ Kiidima kaira kitapu kya mkundana kakisoma madunyi ha wandu; wakahamba, “Isho shose Mndumii-Ruwa ahamba lochishiwuta, naso lochiindia.”

⁸ Mose kaira samu iya kaolya wandu, kahamba, “Ii nyiyo samu ya mkundana Mndumii-Ruwa afuwika hamu nanyo kiidi kya madedoha hose.”

⁹ Nahong'u kado na huye, Mose, na Aroni, na Nadabu, na Abihu, na wandu makumi mfangade (70) kiidi kya wameku wa Waisraeli;

¹⁰ wakawona Ruwa o Waisraeli; shi ya madende hake kuwei cha maho mailyi pang'a hekelaho Yakuti hafanyi samawi, cha maloalo halya kui wucha woke.

¹¹ Ma chandu wanene walya wa Israeli walewona Ruwa, alewakapa pfo. Walekulia na inyo handu hamu.

Mose fumvunyi lya Sinai

¹² Mndumii-Ruwa kawia Mose, “Njo na kunu huye koko fumvunyi, nokae kunu; na inyi njikunenge maṟaṟo ha maho na mdumbuye na iwawasolyo njileṟehia kundu nowaloshe.”

¹³ Mose kakure na Yoshua, mṟundi oke; Mose kado na fumvunyi lya Ruwa.

¹⁴ Kawia wamekuwo, “Luwedenyi iya, mṟasa lochimuwuuya; na ambuyenyi Aroni na Huri wakeri kimu nanyo; orio mndu awode idedo nawahendie.”

¹⁵ Mose kado na fumvunyi, ipuchi lilya lyikashikia fumvu lilya.

¹⁶ Na kiṟumikyo kya Mndumii-Ruwa, kikakaa huya fumvu lya Sinai; ipuchi lylya lyikafushikia, mkonu iṟandaṟu; na mkonu fo mfungade kalaha Mose kuwuka kulya ipuchinyi.

¹⁷ Na iwoneka lya kiṟumi kilya kya Mndumii-Ruwa, kiwei cha modo fokekombetsa, huya fumvu mesonyi ha wana wa Waisraeli.

¹⁸ Mose kaida na kiidi kya ipuchi lilya, kado na fumvuhu. Mose kakapfo kulya fumvuhu mkonu makumi haana (40), mfiri na kio.