IWUKA 23 - Bibilia Kui Mdedie fo Kimochi

Wukilohi na wusumuhanyi ko wose

¹ Kulaedie mbonyi tsa mboru; kulatarame mndu mmbicho, ma iwuta wuṟingishi wo wongo womtarama.

² Kulaoshane na chila yewuta mawicho manya kulawike wuṟingishi wopfo kiidi kya idedo lyose, indi uhambe lohi mkonu yose.

³ Manya kulakundie mndu mfafa kipfa kya wufafa woke.

⁴ Kowona mmbe ya mkituwa opfo, ang'u nzoi yake idekie, kikuwaṟi nowihiṟiese menyi oyo.

⁵ Kowana nzoi ya icho akusuo iolokie wanda ya mhanda foyo, kikuwaṟi nomtarame.

⁶ Kulapfuluo mondu fo mndu mkiwa ipfo mengenyi.

⁷ Manya kulawute wuṟingishi wo wongo ko mndu ose, manya iwonyia owingo ko kindo kyose kundu nawoho nao alawode mti. Kipfa kowuta kudo njechikuhooṟiapfo.

⁸ Na iyo kulaambie kindo ketsutsumo; cha kipfa kitsutsumo kekepfumba meso ha iwo wawonyi, na ipfuluo madedo ha walya wasumhanyi.

⁹ Kulawonyie mndu mhenu; kipfa nyo muichi mrima fo mndu mhenu chandu fui; cha kipfa nanyo muwei wahenu orukenyi lo Misri.

Maka fo Yubile

¹⁰ Nochiwaya mbeu orukenyi lopfo ko maka iṟandaṟu na isambuo mwengeṟia fotso.

¹¹ Kyaindi maka fo mfungade nochida teri isie moo na ifuda; wakiwawo maata wai kiidi kya wandu wapfo waidime ilya; na ikyo wechitsuhaṟa, mando ha ngeṟenyi haidime ikuliia. Na wudo ochiwuta demenyi lyapfo lya msabibu na demenyi lyapfo lya mtsinefu.

¹² Mkonu iṟandaṟu nochiṟunda iṟunda lyapfo, na mkonu fo mfungade nochisia moo, kundu mmbe tsapfo na nzoi tsapfo tsiidime isia moo, numa mana o kisinga kyapfo na mhenu waidime iwuuyo nyi moo.

¹³ Ringenyi isho shose ngamuwiya; mulasende manyale marina ha maruwa hengi, manya halaichio hawuka dumbunyi lyapfo.

Mkonu mnene iṟaṟu

¹⁴ Makamba haṟaṟu orio maka nochinjiwikia mkonu mnene.

¹⁵ Nochinjiwikia mkonu mnene fo mkate ilantarang'ashe; nochilya mkate ilantarang'ashe ko mkonu mfungade chando njilekuwawasa, kui kiheri kikiteṟie, meri fo Abibu (cha kipfa mfo kulekure kulya Misri) manya kuwode mndu echiwoneka oshangunyi loko na mawoko ha wulyapfo;

¹⁶ na mkonu mnene fo shilimu, ndematso tsapfo tsawuka mademenyi hapfo; na kingise, mkonu mnene fosanyia, masiisonyi ha maka, ilyi ochisanyia isho ulewinyia demenyi.

¹⁷ Makamba haṟaṟu ko maka wasoṟo wapfo wose wache oshangunyi lo Mndumii-Ruwa.

¹⁸ Kulasanze samu ya kidaso kyako handu hamu na mkate fumbike mtarang'ao, manya mafuda ha mkonu foko mnene kulahatsuhaṟe mṟasa ngamenyi.

¹⁹ Shakuwoka sha ipfo msengonyi ya oruka lopfo nochishiende na mmbenyi ya Mndumii-Ruwa opfo. Kulakoṟe kidahina kiidi kya maruwa ha mae.

Kyasa na mawawaso

²⁰ Ambuya, inyi njiduma malaika nakusongoe, kundu nakuringe njienyi, nawekuduo mṟasa alya handu njilekuteseheṟia.

²¹ Kuringenyi oshangunyi loke, mwadanyie ṟu lyake; manya mulamdose nyashi; kyamba; echimuhoṟia madeko hanupfo; cha kipfa rina lyako lyii ipfo kiidi kyake.

²² Kyaindi koadanyia ṟu lyake lohi, na iwuta ishi shose njikeri ihamba; nlyondi inyi njechiwa mkituwa o wakituwa wapfo, na mtuuri o iwo wekekutuura.

²³ Cha kipfa malaika oko nechisonguo oshangunyi lopfo, na ikushitsa ko Mwamori, na Mhiti, na Mperizi na Mkanaani na Mhivi, na Myebusi; na inyi njechiwaarisia kuleshe.

²⁴ Kulaaramie maruwa hawo, manya ihaṟundia; manya kulawute chandu wekewuta, kyaindi nochiirumatsa nakamu, na ngo tsawo nochitsifunja shitumbuṟi.

²⁵ Nanyo mochiṟundia Mndumii-Ruwa onu, nao nechiwikia mboṟa kelya kyanu na mṟinga fonu; na inyi njechiwuta ndaaṟe ipfo kopfo.

²⁶ Kochikaapfo mndu mka echikumbapfo manya mhumbapfo, ipfo orukenyi lopfo; na iitala lya mkonu yapfo njechiiawutsia.

²⁷ Njechiduma ṟiho lyako lyikusongoye, na inyi njechikangaṟitsa wandu wose ochiwakooya, na inyi njechitana wakituwawo wapfo wose wakukumbe mhongo yawo wadiche.

²⁸ Na inyi njechidika shipfi, shikusongoye, sa shechifuna Mhivi, na Mkanaani, na Mhiti, wawuke oshangunyi lopfo.

²⁹ Njechiwafuna wawuke kopfo ko maka fumupfo; oruka lulachedeyo lukiwa, na mando ha nja haengeṟeke ikulisa wukiwa.

³⁰ Njechiwafuna omboho omboho wawuke oshangunyi lopfo tane iyo opfumbuka, na ioṟa orukalo.

³¹ Na inyi njechikuwikia mṟasa fopfo wokia ipalyipalyi lya Shamu tane ipalyipalyi lya Wafilisti na kuwokia nuka tane medafo; cha kipfa njechiwika wenyi orukalo mawokonyi hapfo; na iyo nochiwafuna kuwuka oshangunyi lopfo.

³² Kulawade mkundana nawo manya handu hamu na maruwa hawo.

³³ Wakae orukenyi lopfo, walacheikutewa nonjiwutie inyi wunyamaṟi; cha kipfa koṟundia maruwaho hawo, kindokyo kechida kilakuwiia mdehopfo.