IWUKA 22 - Bibilia Kui Mdedie fo Kimochi

Wuwawaso wo italaa

¹ Mndu kaiwa mmbe ang'u ichondi, kashinja, ang'u kakumba; nechitaa mmbe tsingi tsitanu handu ha mmbe imu, na machondi haana handu ha ichondi limu.

² Mmiwi kakoyo kechifunja handu, nao kakapo tane apfa, kochikaapfo kiṟache kya samu kipfa kyakepfo.

³ Kyaindi ko koya mnengeṟi fombaa, nlyondi kochikaapfo kiṟache kya samu kipfa kyake; kiwembaṟi ilekia masaa hashikie, kokoya alawode kindo, na nakumbo kipfa kya wuiwi woke.

⁴ Kokoya kindokyo kyaiwo kikakoyo kii na moo mawokonyi hake, kokoya nyi mmbe, ang'u nyi nzoi, ang'u nyi ichondi nechitaa wuhuru wokyo makamba hawi.

⁵ Mndu kalisira demenyi, ang'u demenyi lyamsabibu kadapfo shuma shake, shikalya demenyi lya mndu ungi, nechitaa shindo shii shicha sha demenyi lyake amonyi ang'u sha msabibunyi yake.

⁶ Modo fukaaka, fukawada msha, na Ngano impfunge shihewa, ang'u Ngano ilameweho, ang'u dema, lyikasenekia; icho aatsa modofo kimbaṟi natae.

⁷ Mndu kainengia odoe kichoṟe kya fesa ang'u shindo shingi namwiṟichie, na shindo sho shikaiwio mbenyi ya mnducho; mwiwi kawado nechitaa wuhuru wokyo makamba hawi.

⁸ Mwiwi alamewado, nlyondi menyi mba echisembelia oshangu lo Ruwa, kiwono napata ke chio aleira shindo sha odoepfo.

⁹ Orio kindo kyose kyaende maloyano ko wandu wawi huya masaa, kiwe nyi mmbe, nzoi, ichoondi, nguo ang'u kindo kingi kyose kidekie, mondufo fo wandu wo wawawi fochiendo oshangunyi lo Ruwa; na icho echianduyo nyi Ruwa ke nyio mdeko nechitaa odoe wuhuruwo makamba hawi.

¹⁰ Mndu kainengia odoe nzoi, ang'u mmbe, ang'u ichondi, ang'u shuma shingi kyose, kundu namwikanyie iringa; kyuma kilya kikapfa, ang'u kikaluo, ang'u kikaiwo na kulakaepfo mndu edima iṟingishia;

¹¹ Mnducho nechihenda ilya nyamu rasionyi ko Mndumii-Ruwa ke alemeiwe shindosho pfo, na menyi masaa nechiidikia isho, nao echimtaa kindo kyose pfo.

¹² Kyaindi kokoya kyumakyo kileiwo kii mawokonyi hake, kimbaṟi natae menyi masaa.

¹³ Kokoya kyumakyo kilewaho nyi indo lya ngeṟenyi, mnducho nawari naende kiṟingishio kyayo, na kaende kiṟingishio kyo echitaa ko ikyo kilewoho nyi indo lya ngeṟenyi pfo.

¹⁴ Mndu kaakuo kyuma kya odoe, nakyo kikawada kifaṟe, ang'u kikapfa, menyi alaiho, kimbaṟi natae.

¹⁵ Ko koya menyi naweiho handu hamu na kyuma kyo kyake echitaapfo; kyaindi kokoya kyumakyo kileakuyo, menyi okyo nechitao wueri wulya wo iakuo.

Wuwawaso wo mkao mcha

¹⁶ Mndu kalemba manamkeha alamkose kalaa nao, kimbaṟi naute ngosa kipfa kyake kundu nawe mka oke.

¹⁷ Kokoya ndee o manacho aleha kichikichi imnengia manacho, mnducho nechitaa fesa tsishikie wuhuru wo ngosa ya manacho o waka.

¹⁸ Kulalekie mndu mka msawi nakae na moo.

¹⁹ Mndu oose echilaa na indo lya nja na nawoho.

²⁰ Mndu echishinjia ruwa lyo lyose kidaso, shile ko Mndumii-Ruwa o amonyi, mndu cho nawoho.

²¹ Kulawonyie mhenu, manya kulambutie sha utimbiri; cha kipfa nanyo wuwei wahenu orukenyi lo Misri.

²² Manya kulalise wukiwa mkusu, manya mana mngweda.

²³ Kokoya ochiwuta kudo kyalohi inyi njechiicho kifihiṟo kyawo,

²⁴ na nyashi yako yechimakia na inyi njechimuwaha ko oshu; waka wanu wechiwa wakusu, na wana wanu wechiwa ngueda.

²⁵ Koakuya mndu ai mkiwa, kiidi kya wandu wako wai na iyo; manya kulawe cha mndu ombucha koke.

²⁶ Kokoya oambia nguo lyerekia kiwaṟi nombihiṟie mnengeṟi fulameolokia.

²⁷ Kyamba nyio nguo awode tupu yekushikia, ngesa nyi kiki echikushikia nakyo? Kechiwa, ili echinjifihiṟia inyi, njechimadanyia; cha kipfa inyi nyi menyi osaṟio.

²⁸ Kuladede Ruwa owicho, manya kulasese mnene o wandu wapfo.

²⁹ Kulakeleo injiendie mwano ya ndema lyapfo ya kuwoka ya Ngano na mvinyo, na mafuda ha msinefu. Na nochinjiendie wana wapfo wakisoṟo wawee.

³⁰ Nawudo ochiwuta ko wuwee wo mmbe tsapfo, na machondi hapfo, kyaindi nochishileka shionge ko mayawo ko mkonu mfungade na mkonu fo nyanya nonjiendie.

³¹ Nanyo nyi wandu wako wasambuṟe, koikyo manyamulalye nyama injiwahe nyi mando ha ngeṟenyi, kyaindi nyamayo mochikumbia mashite.